Te iteraa papû o Etana
Te ora nei te taata papa’i i Utah, i Marite.
Mai te huru ra e, e iteraa papû to te mau taata ato’a, maori râ to Ethan.
« Faaroo, faaroo. E muhumuhu mai te Varua maitai. Faaroo, faaroo i te reo iti ha’iha’i » (Buka himene na te mau tamarii, 106).
Ua parahi o Etana i roto i te taime faaanaanataeraa e ua hi’o a faaite ai tona hoa rahi roa o Sam i tona iteraa papû. Tona hoa o Sarah, te tia’i ra ïa i tona taime. Ua paraparau o Sam no ni’a i te hoê ohipa taviniraa ta’na i rave. Te parau ra oia e, e iteraa papû to’na no ni’a i te taviniraa. Ua faa’ite ato’a te orometua o Etana i tona iteraa papû. Ua paraparau oia no ni’a i te ohipa hiero. Ratou paato’a, ua faa’ite ratou e, e Ekalesia mau teie. Mai te huru ra e, e iteraa papû to te mau taata ato’a, maori râ to Ethan.
« E iteraa papû to’u no ni’a i te aha ? » Ua uiui noa o Etana.
Ua haamana’o oia i te mau matahiti i ma’iri i te taime a bapetizohia ai oia e to’na mau hoa. To’na orometua paraimere, te tuahine Calder, ua horo’a oia i te hoê a’oraa no ni’a i te Varua maitai.
« E nehenehe te Varua maitai e horo’a i te ahu i roto i to outou aau. E nehenehe ta’na e tauturu ia outou ia ite te mea parau mau », ta’na ïa parau. « E e mea na reira e roaa ai to outou iteraa papû no ni’a i te mea ta outou e ti’aturi ra ».
Ua tamata o Etana i te rave i te mea ti’a ia nehenehe iana ia farii i te Varua maitai. Ua tai’o oia i te mau papa’iraa mo’a e ua pure. Tera râ, aita roa’tu oia i farii i taua mana’o ahu ra ta te taata e parau ra. Te auraa ra, aita ïa oia i farii i te hoê iteraa papû ?
Ua mau roa teie uiraa i roto i te upoo o Etana i te mahana i muri iho. Te feruri noa ra â oia i te reira a faahee haere noa ai raua o Sam i muri a’e i te haapiiraa. Ua uiui noa oia e, nahea oia ia ui ia Sam no ni’a i te reira ;
I te pae hopea ua ui o Etana e, « Hey, Sam, ua ri’ari’a anei oe a faa’ite ai oe i to oe iteraa papû i nanahi ra ? »
Ua ou’a a’era o Sam i raro i to’na iri faahee e ua haere atura i ni’a i te aihere. « Aita », ta’na ïa parau, a parahi ai oia i raro. « Ua faa’ite au i to’u iteraa papu i roto i te pô utuafare na mua a’e ».
Ua haere maira o Etana i piha’i iho iana e ua tuu i ta’na iri faahee i ni’a i to’na turi. « Tera râ nahea oe i ite ai e, e iteraa papu to oe ? »
« Ua pure au e ua tupu te ahu i roto ia’u no te reira ».
Ua ta’iri’iri marû noa o Etana i te upoo e ua faaohu i te hoê huira i to’na rima. Ua hinaaro ato’a oia ia ite i te reira mana’o.
I taua pô ra, a poiri ai i roto i te fare e a vai ai te hau, ua tuturi a’era o Etana i piha’i iho i to’na ro’i no te pure.
Na ô a’era oia, « E te Metua i te ao ra, a tauturu mai oe ia’u ia farii i te hoê iteraa papû. A tauturu mai ia’u ia ite e, e parau mau te Ekalesia. E peropheta o Iosepha Semita. E parau mau te Buka a Moromona ».
I te afaraa o ta’na pure, ua faaea o Etana. Feruri ihora maa minuti. I reira, ui ihora oia iana iho e, « Ahani na, ua ite anei au i te hoê mea ? »
E i reira, ua tae maira te hoê mana’o marû e te hau i roto iana. E ere ïa i te hoê mana’o ahu puai. Tera râ ua ite o Etana e, o te Varua maitai tera.
Ua puta maira te hoê mana’o i roto i te feruriraa o Etana : Ua ite au e ua ite au ». E a feruri ai oia no ni’a i te reira, ua ite a’era oia e, ua farii oia i teie mana’o hau na mua a’e nei.
Ia tai’o ana’e oia i te Buka a Moromona, e mea maita’i e e mea ti’a. I teie nei, ua ite oia e, taua mana’o ra o te Varua maitai ïa tera e faa’ite papû ra iana. Ia haere oia i te pureraa e e mea maita’i e e mea ti’a ia tae i reira, o te Varua maitai ato’a ïa tera. Ua roaa a’e na to’na iteraa papû !
Aita i titauhia iana ia ite i te mau mea ato’a i teie nei. Ua ite râ oia e, te vai mau ra te Varua maitai, e e nehenehe ta te Varua maitai e tauturu iana ia patu tamau noa i to’na iteraa papû.
Ua haamata a’era o Etana i te pure faahou. Tera râ, i teie taime, no te parau ïa e, mauruuru.