Te reo o te feia mo’a i te mau mahana hopea nei
Te piti o te fana’oraa
Kaylee Baldwin, Arizona, Marite
Te taime matamua a farerei ai au iana, te tapea ra vau i ta’u fira.
Ua haafatata maira oia i piha’i iho ia’u a tomo ai au i roto i te piha tamaaraa, e ta’u afata fira i te tupa’ipa’i noa i ni’a i to’u avae.
« Fira », ta’na ïa parau a haafatata mai ai oia.
Ua pahono atura vau e, « E ».
Aitâ vau i paraparau a’e nei i te hoê taata huma e aita vau i ite e, eaha te parau e parau. Ua apee maira oia ia’u i ni’a i ta’u amuraa maa e ua parahi i piha’i iho ia’u, ma te faatoro i ni’a i ta’u afata fira.
Ua parau faahou a’era oia e, « Fira ».
Ua tatara a’era vau i ta’u afata e ua anaana a’era to’na na mata. Ua pata oia i te mau niuniu ma te puai. Ua pe’ap’e’a roa vau o te mutu te hoê niuniu o ta’u fira, e ua tapiri au i te afata. Ua tauahi maira oia ia’u no te apa hou a haere ê atu ai.
Ua ite pinepine au iana i muri a’e i teie farereiraa.
Ia ite ana’e mai oia ia’u, e tauahi oia i to’na na rima i ni’a i to’u na tapono ma te apa i te ni’araa o to’u upoo.
No te toe’a o te haapiiraa tuatoru, ua tamata vau i te ape iana i te mau taime ato’a ia ite au iana ia haere mai ia’u ra. Ia ite-ana’e-hia vau iana e ia tauahi mai oia ia’u e ia apa, e farii au i te reira no te tahi noa tau tetoni ma te ataata faahepo e i muri iho, e haere ê atu vau ma te vitiviti ma te parau ore i te hoê parau.
« Auê ho’i e », ta’u ïa huru amuamu i to’u iteraa’tu iana i ta’u aru’i himeneraa a te fare haapiiraa tuarua. I muri mai i te concert, ua imi oia i te rave’a ia tae mai i te vahi tei reira vau te ti’araa e to’u mau hoa i rapae i te fare.
Ua faanuu rii to’u mau hoa i muri a haere mai ai oia ia’u ra ma te ataata, e te rima mahora no te apa mai.
« William ! »
Ua fariu atura vau e ua ite atu vau i te hoê vahine te horohoro maira ia’u ra.
« Eiaha e inoino », ta’na ïa parau, ma te tapii i to’na rima e to William. « E mea au roa na William te fira. Ua taparu mai oia ia’u ia afa’i mai iana i teie aru’i himeneraa. Haere mai, hani ».
Tae roa mai i taua taime ra, aita roa vau i ite noa a’e e, aita vau i ite i to’na i’oa. Ua farerei au ia William e piti matahiti na mua’tu, tera râ, ua rahi to’u taime i pau no te aperaa iana, aita roa’tu vau i faaitoito no te haamatau iana. A hi’o atu ai au ia William e i to’na mama i te haereraa’tu, ua manii maira te mau are haamâ i ni’a ia’u.
Tau matahiti i muri mai, ua faaipoipohia vau, e ua fanau vau i te hoê tamaroa iti na’ina’i ‘trisomique’ e ua pii matou iana o Spencer. Pinepine au i te feruri ia William ia hi’o ana’e au i ta’u tamaiti, e ua uiui au e, e farii ato’a anei o Spencer hoê â mau fifi. E haapae anei te taata iana i te mea e, e apa rahi roa oia e a ore râ e tauahi puai roa oia ? E haamâ anei to’na mau hoa i to’na mau fifi ?
Ia tae’ahia to Spencer e maha ava’e, ua afa’i au iana i te fare ma’i no te tahi farereiraa. A iriti mai ai au iana i rapae i te pereoo, ua ite atu vau e piti na taata te haere maira i rapae i te fare ma’i. Ma te ti’aturi ore, ua ite a’era vau e, o William e to’na mama.
« William ! » Ta’u ïa tuo a fatata rii ai maua, ma te tupa’ipa’i to’u mafatu.
« Hi ! » Ua horo maira oia na roto i te tapearaa pereoo, e te mata ataata. Ua toro maira oia i to’na rima e ua haru i to’u ma te oaoa rahi.
« Eaha to oe huru ? » Ta’u ïa aniraa iana.
« Fira », ta’na ïa parau, ma te mata oaoa.
Fira. Ua haamana’o ato’a oia ia’u. « E », I faatupu vau i te maere na roto i te hoê ata « ua ha’uti au i te fira ».
A paraparau noa ai maua, ua î to’u aau i te pure no te mau maita’i o te hoê Metua i te ao ra o tei ite i to’u hinaaro rahi ia farerei faahou ia William. E oaoa rahi to’u i te mea e, ua ite mai te Atua ia’u—te hoê metua vahine apî i roto i te ati tei hepohepo no te mau fifi ea o ta’u tamaiti e te haape’ape’a no to’na ananahi—e ua horo’a mai ia’u i te hoê iteraa o tei faahaamana’o mai ia’u e, ua ite oia ia maua.