Noa’tu e mea mamahu outou

Na Elder José A. Teixeira

No te Hitu Ahuru

A ti’aturi i te Fatu, e e haamaita’i Oia ia outou i roto i ta outou mau tautooraa no te faa’ite i te evanelia.

A riro ai au ei peresideni misioni apî i Beresilia, te uiui ra vau i te tahi mau orometua. Ua ani au i te hoê ia parau mai no ni’a iana iho.

« E mea mamahu roa vau », tana ïa parau. Ua haape’ape’a oia o te haafifi tona huru mamahu iana ia tavini.

Ua ui au e, « noa’tu te reira, te mana’o ra anei oe e, e nehenehe te Fatu e tauturu mai ia oe ia riro ei misionare maita’i ? »

« Te ti’aturi nei au e, e nehenehe te Fatu e rave i te mau mea ato’a ».

« No reira, a vaiiho iana ia tauturu ia oe. Ia mana’o oe, e nehenehe anei ta oe e rave i te reira ? »

« E nehenehe ta’u », tana ïa i parau.

E ti’a ia’u ia faa’ite atu e, a haere atu ai oia, ua feruri au e, « mea maita’i e, e tupu ».

Ua ma’iri te mau hepetoma e ua haere faahou mai teie mau misionare no te mau uiuiraa. I teie taime, ua parau mai te elder mamahu e, « peresideni, aita vau i ite e, eaha ta oe i parau iana, tera râ, ua faatupu mau te reira i te taa-ê-raa. E mea maita’i roa oia i teie nei ia paraparau i te taata ». E no reira, ua tia’i maoro vau no te farerei faahou iana.

I tona tomoraa mai i roto i to’u piha ohiparaa, ua hi’o oia i raro i tona avae.

Na ô maira oia e, « e mau parau apî maita’i ta’u ». « E mea mamahu noa â vau, tera râ, ua ani au i te Atua ia tauturu mai ia’u. E ua hamama vau i to’u vaha e ua haamata i te paraparau. E ua ite oe e, eaha ? Te na reira nei au pauroa te taime i teie nei. Aita vau e haamana’o i ta’u e parau. Te ohipa maere roa’tu,maori râ, e mea au roa na te taata. Ua farii ratou i te Varua. Te ti’aturi nei ratou ia’u e i te parau ta’u e parau ia ratou ».

Ua maere au i te iteraa i te huru o te tauiraa teie misionare na roto i tona tuuraa i tona ti’aturiraa i roto i te Fatu. Ua riro oia ei mauhaa rahi no te horo’araa i te oaoa i te mau taata e rave rahi.

Te upooti’araa i ni’a i te ri’ari’a

Ia faa’ite ana’e tatou i te evanelia, i te tahi mau taime, e ri’ari’a rii tatou. Tera râ, mai ta teie misionare i faa’ite mai, e arata’i te Fatu ia tatou mai te mea e, e ti’aturi tatou Iana. E tauturu mai te Varua maitai ia tatou ia ite eaha te parau e parau (a hi’o 2 Nephi 32:2-3), e ia ite ana’e te taata i te Varua, pinepine ratou i te pahono ma te maita’i. E rave rahi te taata e maere rii i te mea ta tatou e ti’aturi e e hinaaro ratou ia ite atu â.

Oaoa rahi

Te vai nei to’u iteraa papû e, e arata’i te Metua i te Ao ra ia tatou i roto i ta tatou mau tautooraa no te faa’ite i te evanelia, e e farii tatou i te oaoa rahi i roto i te reira ohipa. Oia ïa, e vai taua oaoa ra i roto ia tatou eiaha i teie nei noa, i roto ato’a râ i te ao a muri a’e. (A hi’o PH&PF 18:16). Tera ïa te hoê rave’a maita’i roa no te haere i rapae i to outou vahi mahanahana, e ia rave i te hoê ohipa, noa’tu e mea mamahu outou.

E toru mata’u ta outou e nehenehe e haavî

Taa ê atu te mamahu, te ite nei au e toru â mata’u e parau ai te tahi pae o tatou e, « te mata’u nei au i te mea e, ia paraparau ana’e au no ni’a i te evanelia, e ere au i to’u mau hoa ». Aua’e pa’i e, na roto i te faaroo, e nehenehe e upooti’a i ni’a i teie mau mata’u.

1. Aita i nava’i to’u ite.

   Mai te mea e, te ere ra outou i te ite no ni’a i te evanelia, e nehenehe te mau misionare rave tamau e tauturu mai. E nehenehe ta ratou e haapii mai ia tatou i te parau poro’i o te Faaho’i-faahou-raa mai, e tauturu mai ia tatou ia haapuai i to tatou faaroo i te Fatu ia Iesu Mesia, e e tauturu mai ia tatou ia haroaroa i te parau no te tatarahapa e nahea ia faaohipa i te reira i roto i to tatou oraraa, e no te aha e mea faufaa te bapetizoraa e te horo’araa o te Varua maitai. Te tahi atu pû no te ite o te buka ïa A poro haere i ta’u nei evanelia. Te faaitoito nei au i te feia apî tamaroa e i te feia apî tamahine taato’a ia rave i te hoê buka mai teie, e ia tai’o i te reira i te mau mahana ato’a e ta outou mau papa’iraa mo’a.

2. Aita vau i rave a’e nei i teie ohipa na mua a’e nei.

   Mai te mea e, te ere ra outou i te ite, a haapiipii i piha’i iho i te mau misionare ! E nehenehe ta ratou e tauturu ia outou ia ite eaha te parau e aore râ eaha te ore e parau i roto i te tahi taime. Mai te mea e, e horo’a outou i to outou taime i piha’i iho i te mau misionare, e ite ïa outou i to ratou here i te evanelia e i te taata. Ua itehia ia ratou te itoito no te faa’ite i te evanelia ; e nehenehe ta ratou e tauturu mai ia outou ia na reira ato’a.

3. E ri’ari’a vau ia faa’ite.

   Ia faa’ite ana’e tatou i to tatou iteraa papû, te tauturu ra ïa tatou i to tatou mau hoa ia hi’o i te mau mea teitei a’e, e e haamata ïa ratou i te faatura ia tatou e ia here ia tatou i roto i te tahi maramarama taa ê. Te tupu nei te reira fatata i te mau taime ato’a. E rave rahi feia apî e parau nei e, « ua ri’ari’a roa vau, i to’u râ paraparauraa ma te parau-ti’a, ua haamata a’e ra to’u hoa i te ti’aturi mai ia’u e i te ui mai i te tahi atu mau uiraa. » Eiaha tatou e mata’u ia faa’ite i te mea e mauhia nei e tatou. E faufaa rahi to te reira i te mea e, no ô mai ïa i te Atua ra. E eaha’tu ïa rave’a maita’i a’e no te faa’ite i te here i to tatou mau hoa i te faa’iteraa ia ratou i te mea ta tatou i ite e, e parau mau ?