Te mau taime misionare paari
Te hoê o te mau huru maitai a’e no te mau taata paari faaipoipo no te faatupu i te mau haamana’oraa nehenehe o te tavini-amui-raa ïa i te hoê misioni.
Ia mo’e-ana’e-hia te hoê mea i to maua mau hoa, e 60 e a ore râ, e 70 matahiti to ratou, e mea pinepine maua i te parau i te reira mo’eraa Te « taime misionare paari ». Tera râ, te hinaaro nei au e paraparau atu no ni’a i te hoê huru taime misionare paari taa ē—hoê taime nehenehe mau eita e mo’e-faahou-hia e a muri noa’tu. O te taime ïa e ite ai na misionare paari faaipoipo e, te rave ti’a mau ra raua i te mea ta te Fatu i hinaaro ia rave raua. I taua mau taime mo’e-ore-hia ra, e ite raua e :
-
Te mau ra raua i te hoê iteraa o te oraraa no te faaite, e te mau tareni, te mau aravihi e te iteraa i te evanelia ta raua e nehenehe e faaohipa no te haamaitai ia vetahi ê.
-
E haamaitairaa to raua hi’oraa no ta raua mau tamarii e no te mau tamarii a ta raua mau tamarii.
-
A tavini ai raua, te faatupu ra raua i te mau auhoaraa e vai i te vairaa.
-
E tupu to raua faaipoiporaa i te paari i te mau mahana atoa.
-
E mea au maite te taviniraa i roto i To’na i’oa.
Faatupuraa i te mau taime
E to’u mau hoa paari faaipoipo, a faatupu i teie mau huru taime no outou e rave rahi. A feruri i te aamu tei faati’ahia mai e Elder Jeffrey R. Holland no te Pupu no te Tino Ahuru Ma Piti Aposetolo no ni’a i te ohipa a na taata paari faaipoipo i rave a tavini ai raua i te fenua Taina. Ua pohe te metua o te hoê o te mau elders taure’are’a. Tei te vahi atea te peresideni misioni aita i ti’a ia’na ia farerei oioi i te misionare.
« Tera râ, te vai ra na misionare faaipoipo maitai [paari] e tavini ra i roto i te reira area », te parau ïa a Elder Holland. « Ua haere mai raua e ua parahi i piha’i iho i taua misionare ra e ua aupuru maite ia’na, e ua tamahanahana ia’na e tae roa’tu i te taime ua ti’a i te peresideni misioni ia tae tino roa mai. E mau maisionare maitai roa to roto i ta tatou mau misioni, tera râ, aita hoê misionare taure’are’a e nehenehe e rave i te ohipa no taua misionare ra mai ta teie na taata faaipoipo i rave ».1
To raua aravihi i taua taime ra, o te faaite-noa-raa ïa i te aroha i roto i te hoê taime fifi. Aita raua i haape’ape’a no ni’a i te reo e paraparau, maori râ, te reo o te here o te Mesia. Aita raua i hape’ape’a no ni’a i te ma’iriraa i te hoê oro’a mahana fanauraa o te hoê mootua e a ore râ, te hoê haamaitairaa aiu, noa’tu te faufaa o te reira mau oro’a. Ua haape’ape’a râ raua no ni’a i te vairaa raua i te vahi e nehenehe te Fatu e faaohipa ia raua no te haamaitai i te oraraa o te hoê o Ta’na mau tamarii. E no te mea e, ua hinaaro raua, ua ti’a Ia’na ia faariro ia raua ei ti’a No’na.
E ere te taviniraa i te ohipa ohie
E parau mau, aore e misionare paari i feruri e, e mea ohie ia faaru’e i te faaearaa. Aita atoa o Iosepha Semita, o Brigham Young, o John Taylor, e a ore râ, o Wilford Woodruff. E tamarii e e mootua atoa ta ratou, e ua here ratou i to ratou utuafare mai ia tatou atoa. Tera râ, ua here atoa ratou i te Fatu e ua hinaaro ia tavini Ia’na. E riro tatou i te farerei i te hoê mahana i teie mau pou tei tauturu i te haamauraa i teie tau tuuraa. Ia tae i taua taime ra, e oaoa tatou i te mea e, aita tatou i faataupupu i te taime a titauhia ai ia tatou ia tavini.
Te vai ra te tahi pae e mea au a’e na ratou ia tavini ma te ora noa i te fare. I muri a’e i te hoê ma’i mafatu tei vaiiho ia Aase Schmacher Nelson (e ere te fetii) i roto i te hoê pereoo tura’ira’i, ua mata’u oia o te ore e tupu to’na hinaaro maoro ia rave i te hoê misioni e ta’na tane o Don. Ua paraparau mai ra te hoê taata piri mai i to raua faaearaa no ni’a i te raveraa raua i te misioni rave ohipa i roto i te fare haaputuraa tauihaa a te episekopo. Ma te anaanatae, ua paraparau raua i te hoê ti’a faatere no te reira fare, ua faaî i ta raua mau parau, e ua piihia raua ia tavini e piti mahana i te hepetoma i roto i te hoê fare vairaa tauhaa piri mai i to raua faearaa.
« E mea ohie ia parahirahi noa a feruri ai e, ’eita vau e hinaaro-faahou-hia,’ » te na reira ra o Aase Nelson. « I teie nei râ, te feruri nei au e, e hinaarohia vau. Ua riro te reira ei iteraa papû no’u ».
Te hinaaro-mau-hia ra outou
Mai te mea e, te mana’o ra outou e, aita outou e hinaarohia, te haapapû atu nei au ia outou e, oia. Aore e peresideni misioni i roto i te Ekalesia e ore e hinaaro ia farii i te tahi atu â mau taata faaipoipo no te tavini i roto i ta’na misioni. E faaitoito te feia paari i te mau elder e te mau tuahine taure’are’a. E horo’a mai ratou i te patururaa o te tauturu ia vetahi ê ia tavini maitai a’e i roto i ta ratou iho mau hopoi’a. E nehenehe anei outou e feruri eaha te auraa no te hoê ti’a faatere tei riro mai ei melo no te tahi noa tau matahiti te maoro, ia farii ohie noa i te mau melo aravihi o te Ekalesia ? E mea pinepine te mau taata paari faaipoipo i te riro ei pahonoraa papû i te mau pure a te mau episekopo e te mau peresideni amaa.
Te faaitoito nei matou i te mau peresideni misioni ia imi i te mau taata faaipoipo no te pahono i te mau hinaaro i roto i ta ratou mau misioni. E ti’a i te mau episekopo ia imi i te mau taata faaipoipo e nehenehe e tavini. E itehia i ni’a i te LDS.org e rave api no ni’a i te mau rave’a no te mau taata paari faaipoipo. Te mea faufaa roa’tu râ, e ti’a i te feia faaipoipo ia tuturi i raro e ia ani i te Metua i te ao ra e, ua tano anei te taime no ratou ia rave amui i te hoê misioni. I roto i te mau aravihi taatoa, te hinaaro ia tavini te mea faufaa roa a’e (a hi’o PH&PF 4:3).
A faateitei ai au i te ohipa a te mau misionare paari, te ite nei au e, e rave rahi te hinaaro nei e tavini, aita râ e nehenehe. Titauhia ia hi’opo’a maitai i te mau fifi o te matahiti paari e a ore râ te mau fifi o te ea, e tae noa’tu i te mau hinaaro faufaa o te mau melo o te utuafare. Mai te mea e, e tupu mai te hinaaro puai noa’tu teie mau fifi, e nehenehe vetahi ê e riro ei rima e ei avae no outou, e e nehenehe ta outou e horo’a i te moni.
E te mau taata paari faaipoipo, noa’tu o vai, e noa’tu te vahi tei reira outou, a pure no ni’a i teie rave’a no te faatupu amui i te mau taime misionare paari faahiahia. E tauturu mai te Metua i te ao ra ia outou ia ite eaha te ti’a ia outou ia rave.