Fafau ia faaru’e
Te ora ra te taata papa’i i New York, i Marite.
Aita to’u ite faata’i piana i haere i mua, noa’tu te rahiraa matahiti te haapii-noa-raa. Ua parau mai to’u na metua e, e nehenehe ta’u e faaru’e, no te hoê noa râ tumu: E tamau vau e 50 himene.
Ua horo vau i roto i to’u fare, ma te ta’i, i muri a’e hoê faahou â haapiiraa piana au ore. Te maharaa teie te matahiti to’u haapiiraa i te piana, e aita i afaro atura te himene ra « Twinkle, Twinkle, Little Star. » Ua tamata to’u orometua i te imi i te tahi ohipa maita’i no te parau no ni’a i ta’u ha’utiraa au ore, tera râ, rahi roa’tu to’u au-ore-raa. Ua aufau noa to’u na metua i te moni no te mau haapiiraa faata’i piana ta’u aita i hinaaro, e aita hoê rave’a.
Ua hinaaro vau ia faati’a to’u na metua ia faaru’e au. Ua taparu vau, « faati’a pa’i. E rave au i te mau mea ato’a. Eaha te titauhia ? »
I muri a’e i te aparauraa i te reira i rotopu ia raua, na ô maira raua e, « mai te mea e, e haapii oe e 50 himene, e faati’a maua ia faaru’e oe ».
I tera iho taime, ua haamata vau i te haapii. No to’u hinaaro rahi ia faaru’e, ua ti’a ia’u ia horo’a i te taime hau i ni’a i te piana. Te himene matamua, « Mauruuru matou e te Atua » (Hiemene, no. 10), fatata hoê ava’e i mau ai. Te vai noa ra â te hinaaro i roto ia’u ia faaru’e, no reira, ua tamau noa vau i te haapii.
Ua tupu maira te hoê ohipa au roa: ua ohie a’e te haapiiraa i te mau himene. Ua oaoa a’e au i roto i te roaraa o te hepetoma. Ua himenemene au i te mau himene i roto i te roaraa o te mahana, e te himene puai i roto i te pureraa oro’a.
I te pae hopea, aita vau e tapa’o faahou ehia rahiraa himene ta’u i ite. Ia rahi rii mai to’u ite i ni’a i te piana, ua ite a’era vau e, e nehenehe ta’u e haapii i te hoê himene apî, fatata roa i te hoê faito maita’i roa, i raro mai i te 30 minuti.
I te pae hopea, a tai’o ai au i te taato’araa, ua haapii au hau atu i te 50 himene. E aita roa vau e hinaaro faahou e faaru’e i te ha’uti i te piana. Ua rahi roa to’u ti’aturi i roto i to’u aravihi ia ha’uti e ua farii au i te mana o te mau himene i roto i to’u oraraa.
E au te mau himene mai te huru i te mau papa’iraa mo’a; e parau ratou i te parau mau. Ia ha’uti ana’e au i te mau himene, e au e, te hopu ra vau i roto i te mau papa’iraa mo’a. Ua riro te haapiiraa ia ha’uti i te mau himene ei rave’a no te hamata i te patu i to’u iteraa papû e i te haapii mai i te parau mau. Te tai’o nei au i te mau parau o tera e tera himene no te tauturu ia’u i roto i te roaraa o te hoê mahana. Ua haapuai te ha’utiraa i te piana i to’u iteraa papû, e ua iriti i te mau uputa no’u i te mau vahi ato’a ta’u e haere.