Te imiraa i te mau horo’a Varua

Na te peresideni George Q. Cannon (1827-1901)

Tauturu matamua i roto i te Peresideniraa Matamua

No roto mai i The Latter-day Saints Millennial Star, 23 no eperera 1894, 258-61 ; ua tauihia te tereraa e te huru o te papa’iraa.

Ehia outou e imi nei i teie mau horo’a ta te Atua i fafau e horo’a mai ?

E nehenehe ta te tane e te vahine taato’a i roto i te Ekalesia a te Mesia e farii i te mau horo’a a te Varua o te Atua i horo’ahia ia ratou ia au i to ratou faaroo e ia au i te hinaaro o te Atua …

Ehia outou… e imi nei i teie mau horo’a ta te Atua i fafau e horo’a mai ? Ia pi’o ana’e outou i raro i mua i to outou Metua i te Ao ra i roto i to outou utuafare e a ore râ i roto i to outou mau vahi mo’emo’e, ehia outou e rohi nei ia horo’ahia mai teie mau horo’a i ni’a ia outou ? Ehia outou e ani nei i te Metua, na roto i te i’oa o Iesu, ia faa’ite mai iana iho ia outou na roto i teie mau mana e teie mau horo’a ? E a ore râ, te ora ra anei outou i tera mahana e tera mahana, mai te hoê opani i ni’a i to’na mau hinere, ma te mana’o ore no ni’a i te parau tumu, ma te faa’ite ore i te faaroo, ma te mauruuru ua bapetizohia e ua riro ei melo no te Ekalesia e ia faafaaea i reira, ma te feruri e, ua papû to outou faaoraraa no te mea ua ravehia e outou teie ? …

Ua ite au e, e hinaaro te Atua ia faaora i tei feia ma’i, e hinaaro Oia ia horo’a i te horo’a o te ite i te mau varua, te horo’a o te paari, o te ite e o te tohu, e te tahi atu mau horo’a e titauhia. Mai te mea e mea ti’a ore tatou, e hopoi’a na tatou ia pure no te horo’a o te faariro ia tatou ei taata maita’i roa. Te vai ra anei to’u mau hapehape ? Ua î roa vau i te reira. Eaha ta’u ohipa ? Ia pure i te Atua ia horo’a mai ia’u i te mau horo’a o te faatitiaifaro i teie mau hapehape. Mai te mea e, e taata riri au, e ohipa ïa na’u ia pure no te aroha, i te mea e, e faaoromairaa roa to te aroha e te hamani maita’i. E taata nounou anei au ? E ohipa na’u ia imi i te aroha, e ore hoi te aroha e feii. Mai te reira ato’a no te mau horo’a ato’a o te evanelia. Ua faataahia te reira no teie tumu. Eita e ti’a i te hoê taata ia parau e, « eita ta’u e nehenehe e taui; to’u tera natura ». E ore oia e faati’ahia i te reira, i te mea e, ua fafau mai te Atua e, e horo’a mai oia i te puai no te faatitiaifaro i teie mau mea, e e horo’a mai oia i te mau horo’a o te haamou i te reira. Mai te mea te ere ra te hoê taata i te paari, e ohipa na’na ia ani i te paari i te Atua. Mai te reira no te tahi atu mau huru mea ato’a. Tera ïa te opuaraa a te Atua no Ta’na Ekalesia. Te hinaaro nei Oia ia maita’i roa To’na Feia Mo’a i roto i te parau mau. No reira Oia i horo’a mai ai i teie mau horo’a, e e horo’a Oia ia ratou o te imi nei i te reira, ia riro hoi ratou ei mau taata maita’i roa i ni’a i te tino o te fenua nei, noa’tu te rahi o to ratou mau ino, no te mea, ua fafau mai te Atua e, e horo’a mai Oia i te mau horo’a e maita’i roa ai ratou.