Te reo o te feia mo’a i te mau mahana hopea nei
Haere a tauturu iana
Thomas Robbins, California, i Marite
Ua ti’a vau i roto i te ana’iraa i te hoê fare pamuraa mori. I mua ia’u, hoê metua vahine e piti tamarii na’ina’i ta’na te ani ra e $3 mori pereoo, e e piti hapaina pape to’eto’e vanira.
I te hi’oraa matamua e nehenehe au e ite e, e mea iti roa ta ratou faufaa. Aita to te tamarii e tiaa e e ahu mahaehae to raua.
Ua faaroo vau i te reira vahine i te tuuraa i te mau moni paari i ni’a i te pa’epa’e mai te mea ra e, aita e hopearaa, no te aufau i ta’na tarahu.
Ia oti au i te aufau i to’u mori pereoo, ua haere atu vau i rapae e ua apetahi to’u mata i ni’a i te pereoo o tera mama. E faito pereoo tahito roa, e aita paha i faatere-rahi-hia.
Ua tupu te aroha i roto ia’u no teie mama e piti tamarii, tera râ, ua faatere au i to’u moto, e ua reva.
Aita i tae’ahia hoê minuti to’u tereraa na ni’a i te purumu rahi, ua tae maira te hoê reo i roto ia’u: « Haere a tauturu iana ». E piti taime te taeraa mai te muhumuhu.
Ua ta’iri’iri au i to’u upoo, ma te feruri e, ua reva a’e na paha ïa oia. Atira râ, eaha ta’u e parau iana ?
No te toru o te taime, ua tae faahou maira taua reo ra ma te maramarama: « Haere a tauturu iana ! »
Ua ho’i au i te fare pamuraa mori, ma te tamata i te imi e, eaha ta’u e parau mai te mea e, tei reira noa â oia.
I to’u taeraa’tu, ua ite atura vau e, te matara noa ra to’na opani pereoo. Te parahi ra oia i ni’a i te parahiraa o te taata faahoro, e te amu ra ta’na na tamarii i te pape paari ma te oaoa i ni’a i te parahiraa i muri.
Ua pure a’era vau i te hoê pure iti poto, ma te ani i te Metua i te ao ra i te mea ta’u e parau. Na ô maira taua reo iti â ia’u e, « A faa’ite o vai oe e a ui e, te hinaaro ra anei oia i te tauturu ». Ua tapiri atura vau i piha’i iho i to’na pereoo e ua faa’ite atura e o vai au. Ua faa’ite atura vau iana e, ua puta mai te mana’o i roto ia’u ia ani iana e, e hinaaro anei oia i te tauturu.
Ua haamata a’era oia i te ta’i e na ô mai nei e, « No hope noa a’e nei ta’u pure ia Iesu, no te ani iana ia tono mai i te hoê taata no te tauturu ia’u ».
Ua pahono te Metua i te ao ra i ta’na pure. Ua aufau vau ia faaî-roa-hia to’na mori pereoo e ua horo’a iana i te numera niuniu o te hoê taata i roto i ta matou pupu peresibutero e tihepu ra i taua taime ra. Aita vau i ite e, eaha tei tupu i nia i teie metua vahine apî i muri a’e, tera râ, te oaoa nei au i te mea e, ua pee au i te muhumuhu ia tauturu iana.