Parau poro’i na te mau tuahine hahaere
Tamahine na to tatou Metua i te ao ra
A tuatapapa na roto i te pure i teie materia ma te imi ia ite e aha te faa’ite atu. Nahea te taa-maita’i-raa i « Te Utuafare : E poro’i i to te Ao nei », i te haamaraa i to outou faaroo i te Atua e i te haamaita’i i te feia ta outou e haapa’o ra na roto i te hahaereraa a te mau tuahine ? No te mau haamaramaramaraa hau atu, a haere i ni’a i te reliefsociety.lds.org.
Te Faaroo, Te Utuafare, Te Totauturu
Te haapii mai nei te mau papa’iraa mo’a ia tatou e, « e mau tamarii tatou na te Atua » (Ohipa 17:29). Ua parau te Atua ia Emma Semita, te vahine a te peropheta Iosepha Semita e, « ta’u tamahine » (PH&PF 25:1). Te poro’i o te utuafare Te haapii mai nei te reira ia tatou e, ua riro tatou tata’itahi « ei mau tamahine varua here… na te mau metua i te ao ra »1
« I roto i te basileia [hou te tahuti nei], ua haapii tatou no ni’a i to tatou ti’araa vahine mure ore », te parau ïa a Carole M. Stephens, tauturu matamua i roto i te peresideniraa rahi o te Sotaiete Tauturu.
« Aita to tatou tere tahuti i te fenua nei i faahuru’e i te reira mau parau mau ».2
« Ua ite to outou metua i te ao ra i to outou i’oa e ua ite i to outou huru oraraa », te parau ïa a Elder Jeffrey R. Holland no te Pupu no te Tino Ahuru Ma Piti Aposetolo. « Te faaroo nei Oia i ta outou mau pure. Ua ite oia i ta outou mau tia’iraa e te mau moemoea, tae noa’tu i to outou mau mata’u e te inoino ».3
« No roto tatou tata’itahi i te utuafare o te Atua e ua hinaarohia tatou », te parau ïa a te tuahine Stephens. « E mea taa ê te mau utuafare ato’a i te fenua nei. E a imi ai tatou i te mau rave’a ato’a no te faati’a i te mau utuafare puai matarohia, te riroraa ei melo i roto i te utuafare o te Atua aita ïa i niuhia i ni’a i te tahi atu huru ti’araa—ti’araa faaipoipo, ti’araa metua, ti’araa faufaa, ti’araa sotiare, e aore ra, te huru ti’araa ta tatou e faa’ite i mua i te taata ».4
Te tahi atu mau papa’iraa mo’a
Ieremia 1:5 ; Roma 8:16 ; Te parau haapiiraa e te mau parau fafau 76:23-24
No roto mai i to tatou aamu
I roto i to’na aamu no te orama matamua,5 ua hi’opo’a te peropheta Iosepha Semita i te mau parau mau e rave rahi—tae noa’tu e, ua ite to tatou Metua i te ao ra i to tatou i’oa.
Ua rohi o Iosepha tamaiti no te ite e, eaha te ekalesia e amui atu e ua itehia iana te arata’iraa i roto i te Iakobo 1:5. Ua faaoti a’era o Iosepha e, e ani oia i te Atua.
I te hoê po’ipo’i no te pu’e tau faatupuraa raau i te matahiti 1820, ua haere oia i roto i te uru raau no te pure tera râ, ’oi’oi roa oia i te haruhia e te tahi mau mana o te poiri. Teie ta’na i papa’i no ni’a i te reira :
« I taua taime mata’u rahi ra, ua ite atu ra vau i te pou maramarama i te faaatiraa i ni’a noa a’e i to’u upoo, e ua pou maira te reira i ni’a iho ia’u.
« I te taeraa mai te reira maramarama, ua tuuhia vau e taua enemi i tape’a ia’u. I te ma’iriraa taua maramarama ra i ni’a iho ia’u, ua ite atu ra vau e piti taata ; to raua teatea e te hanahana a ti’a noa’i raua i ni’a a’e ia’u i roto i te reva ra, e ore roa ïa e ti’a ia faaauhia i te hoê noa’tu mea. Ua parau maira te hoê o raua ia’u, ma te faatoro atu i to’na rima i ni’a i te tahi, e ma te faahiti i to’u i’oa, i te na-ô-raa mai e—O Ta’u Tamaiti Here Teie. A Faaroo iana !» (Iosepha Semita—Aamu 1:16-17).