Te mau Parau Tumu o te Evanelia
Te Autahu’araa Hoê tutau papû
Na Elder L. Tom Perry (1922-2015)
No te Pupu no te Tino Ahuru ma Piti Aposetolo
Ua faaineinehia teie papa’iraa na Elder L. Tom Perry i te 28 no me 2015, e piti mahana na mua a’e a pohe ai oia, no te faa’ite i te feia apî tei mau i te autahu’araa.
Te puai rahi a’e i roto i to’u oraraa o te autahu’araa ïa o te Atua. Te ti’aturi nei au e, e riro ato’a te reira ei tutau papû no outou e te feia apî tamaroa. Tera râ, no te riroraa te reira ei mana i roto i to outou oraraa, titauhia ia outou ia haroaroa e ia faaohipa i te reira.
Te mau iteraa matamua no ni’a i te autahu’araa
Ua paari au i roto i te hoê nohoraa au maita’i i Logan, Utah. Aita vau i farerei i te mau tafifi o te tamariiriiraa no ni’a i te maa, te nohoraa e aore râ te haapiiraa. Penei a’e paha no te ohie te oraraa, ua titauhia ia’u ia tape’a i te hoê mea o te tutau ia’u.
No’u nei, taua tutau ra o te autahu’araa ïa a te Atua. Tei roto vau i te hoê vairaa taa ê roa a tupu ai au i te paariraa. Hoê noa â to’u matahiti a piihia ai to’u papa ei episekopo, e o oia to’u episekopo no te roaraa 19 matahiti. Ua riro ta’na arata’iraa metua e i te pae varua ei tautururaa rahi no’u.
Te mana’o nei au e, o te reira te tumu rahi i tia’i maoro ai au ia farii i te autahu’araa a Aarona i te 12raa o to’u matahiti. Te haamana’o nei au i te mahana taa ê a ite ai au i te rima o to’u metua tane i ni’a i to’u upoo a faatoro’a ai oia ia’u. I muri a’e i te reira, ua nuu noa vau i roto i te mau toro’a o te autahu’araa a Aarona e ua farii hoi i te mau piiraa ta’u i oaoa maita’i.
Ua riro te opereraa i te oro’a mo’a ei ohipa taa ê roa no’u. E nehenehe ta outou e ite i te taata o tei fafau ia haapa’o i te mau faaueraa a te Fatu a rave ai ratou i te mau tapa’o o Tona tino e Tona toto.
Te tupuraa i te rahi i roto i te haroaroaraa i te autahu’araa
A tere noa ai te tau, ua haafetiahia vau i te haapiiraa tuarua, e hoê matahiti i muri a’e i te haapiiraa tuatoru, ua piihia vau i roto i te misioni. Ua oaoa vau i te mau minuti ato’a o te reira e ua here au i to’u mau hoa. Ua riro mau hoê ei haapuairaa ia’u. E rave rahi te mau mea ta’u i haapii mai na roto mai iana a rave ai maua i ta maua mau hopoi’a.
No te mea hoi e, tei roto te fenua i te tama’i, i to’u ho’iraa mai na ta’u misioni, ua tomo vau i roto i te nuu ihitai a te Hau Marite. Ia hope a’e ra te tama’i, ua ho’i faahou vau i te haapiiraa tuatoru, ua faaipoipo e ua faatupu i te hoê utuafare. Na roto i te mau ratereraa no ta’u ohipa, ua tere au na te mau vahi e rave rahi na roto i te fenua marite, i reira to’u haapiiraa i te mau mea e rave rahi a tavini ai au i roto i te mau piiraa e rave rahi o te autahu’araa. I te pae hopea, ua tape’a vau i Boston, Massachusetts, i reira to’u taviniraa ei peresideni titi. I reira to’u piiraahia ei tauturu no te Tino Ahuru Ma Piti, e i muri iho, 17 ava’e i muri mai, i roto i te Pupu no te Tino Ahuru Ma Piti Aposetolo.
Te mau haapiiraa i apohia mai i to’u riroraa ei aposetolo
Eaha ta’u i apo mai ei melo no te Pupu no te Tino Ahuru Ma Piti ?
Ua haapii mai au e, te vai ra hoê arata’i, hoê tutau e hoê parururaa i roto i te autahu’araa.
I vai tamau noa na te autahu’araa. Hou Adamu a haere mai ai i ni’a i te fenua nei, e autahu’araa tona. A purara ai te huaai o Adamu e te autahu’araa, ua titauhia a’e ra ia faanaho e nahea ia faatere i te autahu’araa. Ua rave te Fatu i te reira na roto i te piiraa ia Aberahama ia faatere i ni’a i tona utuafare o te feia tei mau i te autahu’araa. Ua vai noa teie faanahonahoraa i raro a’e ia Isaaka e ia Iakoba, tei hurihia tei i’oa o Iseraela i muri a’e.
E rave rahi tenetere i muri a’e, ua topa te tamarii Iseraela i roto i te titiraa. Ua tono atura te Fatu ia Mose no te faaora ia ratou, tera râ, i te haereraa o Mose e rave i te reira, ua faa’ite maira ratou e, aita ratou i ineine ia riro ei mau taata no te Autahu’araa a Melehizedeka. No reira, ua vaiiho-noa-hia ratou i ni’a i te Autahu’araa a Aarona e tae roa’tu i te anotau o te Faaora.
Ua feruri au e, e mea faahiahia roa te ohipa ta te Faaora i rave matamua a haamata ai Oia i Tana tau ohiparaa. Ua faanahonaho Oia i te Autahu’araa a Melehizedeka. Ua pii oia ahuru ma piti Aposetolo e ua haapii atu ra ia ratou i te mau ture e te faanahoraa o te autahu’araa. Ua pii Oia ia Petero ei faatere Aposetolo, ma te haamau i te hoê reni o te mana i roto i Tana Ekalesia. I roto i taua tau ra e i teie tau, na Iesu Mesia e ma’iti i Tana faatere Aposetolo no te faatere i ni’a i te Ekalesia, e na te Faaora e arata’i iana i roto i tana mau ohipa no te autahu’araa.
No reira, te vai ra hoê reni afaro ti’a to te autahu’araa mai ô mai i to tatou Fatu ra e te Faaora na roto i te faatere Aposetolo tae atu i te tahi atu mau Aposetolo e tae atu i te tahi atu mau taata e mau nei i te autahu’araa i roto i te Ekalesia. Ua horo’ahia te mau taviri o te mana i te mau Aposetolo ra, e maoro noa’tu to teie mau taviri vairaa i ni’a i te fenua nei, e arata’ihia tatou e te Fatu iho. Na teie arata’iraa hanahana e paruru ia tatou e e haapapû ia tatou e, eita te Ekalesia e fariu ê i te parau mau. E vai maite oia no te mea, aita oia i arata’ihia e te taata no te tino nei. Na te Fatu e arata’i nei i te reira.
Haapii i te mau haapiiraa tumu o te autahu’araa
Ta’u a’oraa rahi roa a’e na outou e te feia apî tamaroa o te haapiiraa ïa i te mau haapiiraa tumu o te autahu’araa, ia haroaroa i te mana e mauhia nei e outou i roto i te faaohiparaa i to outou autahu’araa, e a haapii e nahea te reira i te haamaita’i i to outou oraraa e i te oraraa o vetahi ê.
Te fafau nei au e, mai te mea e, e haapii outou i te mau haapiiraa tumu o te autahu’araa, e e faaoti outou i ta outou mau ohipa no te autahu’araa, e riro ïa te autahu’araa ei tutau papû o te paruru noa ia outou i te pae varua e o te hopoi mai i te oaoa rahi ia outou. Ia riro outou ei pupu autahu’araa mau. A farerei i to outou mau hoa e a arata’i mai ia ratou i roto i ta outou pupu autahu’araa. A faatupu i te hoê autaea’eraa i roto i ta outou pupu o te riro ei niu tamau no to outou oraraa.