Te mau faehau i ni’a i te pare
Tiai
Te mau faehau e mau tiai ïa i ni’a i te patu e a ore râ i ni’a i te hoê pare no te hi’ohi’o e no te faaara i te mau fifi e piri mai ra. Ua faaohipahia ratou no te paruru i te mau oire e tae noa’tu i te mau ô vine, te mau faaapu e a ore râ te mau fenua faaamuraa animara.
Te mau huru pare
Te mau pare i roto i te mau patu o te oire ua patuhia ratou i te uputa e a ore râ i roto i te mau poro (a hi’o 2 Paraleipomeno 26:9). Ua riro teie mau pare i te uputa e i te poro ei mau vahi teitei no te hi’ohi’o i te mau fifi e tapiri mai e no te paruru i te mau aroraa a te enemi (a hi’o 2 Paraleipomeno 26:15).
Te mau pare e a ore râ te mau fare teitei e mau vahi ti’araa ateatea ïa hamanihia i te vahi teitei e a ore râ i te tahi atu huru vahi paruruhia. I te tahi mau taime e mau vahi ateatea maita’i te reira o te riro ei haapuraa hopea no te huiraatira taato’a o te hoê oire tei topa i roto i te aroraa (a hi’o Te mau tavana 9:46-52).
Te mau pare i roto i te mau ô vine, te mau faaapu, e a ore râ te mau fenua faaamuraa animala e mau hamaniraa na’ina’i ïa no te paruru i te mau faaapu maa e te mau nana i te feia eiâ e i te mau animara (a hi’o 2 Paraleipomeno 26:10 ; Isaïa 5:2 ; 27:3). Pinepine te tahua i raro iho i te riro ei piha vairaa tauhaa.
Te mau tia’i i ni’a i te pare:
E hi’oraa teitei to ratou. Ia pii e ia haamana ana’e te Atua i te mau tavini, e faataa êhia te mau peropheta i to te ao nei, e haafatatahia ratou iana, e e faariihia ratou ia hi’o i te mau mea i roto i te hoê hi’oraa no te ra’i.
Ia hi’o i te mau mea o te ore e h’iohia e te toe’a o te taata. « Area e ti’a i te hi’o ia ite i te mau mea i tupu na, e te mau mea hoi e tupu a muri atu, e na ratou e faa’itehia mai te mau mea ato’a, oia hoi e faa’itehia mai te mau mea moe, e e tae mai hoi i te maramarama tei hunahia ra, e e faa’itehia mai te mau mea ite-ore-hia e ratou ; e e faa’ite-ato’a-hia mai te mau mea aore e tia ia faa’itehia na roto i te ravea ê » (Mosia 8:17).
E mea haapa’o maita’i E hopoi’a hanahana ta te mau peropheta ia faaara mai ia tatou i te mau fifi e tupu mai, e e tamau noa ratou i te na reira noa’tu te huru o te mana’o o te taata e a ore râ te hinaaro o te sotaiete.
E faaara i te mau mea e tupu mai noa’tu tei te atea ê roa te reira. « E faahapa te peropheta i te hara ma te tohu ato’a no ni’a i to te reira mau faahopearaa. E taata a’o oia no te parau ti’a. I te tahi taime, e nehenehe te mau peropheta e faauruhia no te tohu i te ananahi ei maita’i no te taata nei » (Buka arata’i no te mau papa’iraa mo’a, « peropheta », lds.org/scriptures/gs).
E pûpû i te hau e te parururaa. Na roto i te haapa’oraa i te mau faaararaa a te mau peropheta, e iteahia ia tatou te hau e e haapae tatou i te mau ati e topa mai i ni’a ia tatou, te taata hoê e a ore râ, te sotaiete, mai te mea e, aita tatou e haapa’o.