A haapii ia ratou ia tai’o i te Buka a Moromona

Emilien Rioux, Quebec, Canada

I roto i ta maua taviniraa i roto i te misioni no Geneve Suisse, ua piihia vau e ua faataahia ei peresideni amaa, e ua piihia ta’u vahine ei peresideni no te Sotaiete Tauturu. Ua rave amui maua i te ohipa ma to maua puai ato’a no te faaora faahou i te amaa fifi. Noa’tu e, ua faati’ahia i te mau matahiti 1960, aita te amaa i ite noa a’e hoê bapetizoraa e rave rahi matahiti e aita i faareva hoê noa a’e misionare i roto i te misioni no te roaraa 15 matahiti.

E mea papû maita’i e, ua hinaaro matou i te tauturu a te Fatu no te imiraa i te mau rave’a no te mau tafifi e rave rahi ta te amaa e farerei nei. I muri a’e i to’u pureraa no ni’a i te mau fifi o te amaa, ua parau maira te Varua o te Fatu ia’u e, « A haapii i te mau melo ia tai’o i te Buka a Moromona, e e manuîa oe ».

I reira iho, ua hamani matou i te mau faanahoraa no te faaue i te mau melo ato’a ia haamata i te tai’o i te Buka a Moromona.

I itehia te mau hopearaa faahiahia. Ua iho faahou mai te hau e te Varua i roto i te amaa. E rave rahi mau utuafare apî tei tomo mai i roto i te Ekalesia. No to’na hinaaro rahi e tavini, ua reva te hoê taurearea i te misioni. E rave rahi faaipoiporaa fifi tei haapaarihia, e ua piri a’e te mau utuafare te tahi e te tahi. Te tamau noa nei teie amaa i te haere i mua i teie mahana.

Matou e te mau melo o te amaa, ua ite matou iho i te mana temeio o te Buka a Moromona. Ua riro mau te reira ei ofa’i tihi no ta tatou haapa’oraa e no to tatou mau iteraa papû i te evanelia e ia Iesu Mesia. Ua here roa matou i te reira ma to matou aau ato’a. Ua riro te reira ei tumu no te ite hope ore e te mou ore.

Te haapii mai nei teie iteraa ia tatou e, te Buka a Moromona, o te rave’a papû a’e ïa no te tauturu i to tatou mau taea’e e te mau tuahine ia haere mai i rapae au i te maru o te mau poiri pae varua e tapo’i nei i te fenua nei. E hopoi mai teie buka i te hau, te poupou, te oaoa, e i te hoê hinaaro u’ana ia pee i te Faaora ia Iesu Mesia.