Tutu Atu o ni Tagata Moni o le Meleniuma
Saunia e Peresitene Russell M. Nelson
Peresitene o le Korama a Aposetolo e Toasefululua
Mai se faigalotu i le lalolagi mo talavou matutua, “Avea ma Tagata Moni o le Meleniuma,” na tuuina atu i le Iunivesite o Polika Iaga–Hawaii i le aso 10 Ianuari, 2016. Mo le saunoaga atoa, alu i le broadcast.lds.org.
O outou ”o se tupulaga filifilia,“ na muai filifilia e le Atua e faia se galuega ofoofogia—e fesoasoani e saunia ia tagata o lenei lalolagi mo le Afio Mai Faalua.
Ata na tusia e Scotty Reifsnyder
E toatele tagata ua taua outou o tagata o le meleniuma. O le a ou taliaina faapea a taua outou e tagata suesue i lena upu ma faamatalaina mea ua faaalia e a latou suesuega e uiga ia te outou—o mea tou te fiafia i ai ma le fiafia i ai, o outou lagona ma faamoemoega, o outou malosiaga ma vaivaiga—ua ou le mautonu. E i ai se mea e uiga i le ala latou te faaaoga ai le upu tagata o le meleniuma lea e faapopoleina ai au. Ma e faigofie lava, ou te faale fiafia i mea e fai mai ai le au popoto e uiga ia te outou nai lo le mea ua tau mai e le Alii ia te au e uiga ia te outou.
Pe a ou tatalo e uiga ia te outou ma fesili atu i le Alii pe faapefea Ona lagona e uiga ia te outou, e matuai ese lava ou lagona mai mea ia e fai mai ai le au suesue. O uunaiga faaleagaga na ou mauaina e uiga ia te oe ua alai ona ou talitonu faapea atonu o le upu tagata o le meleniuma e fetaui lelei lava mo oe—ae mo se mafuaaga e ese mamao lava nai lo le mea e ono malamalama i ai le au popoto.
O le upu tagata o le meleniuma e fetaui lelei lava mo oe pe afai o lena upu e faamanatu atu ia te oe po o ai moni lava oe ma po o le a lou faamoemoega moni lava i le olaga. O se tagata moni o le melemiuma o se tasi na aoao atu ma na aoaoina i le talalelei a Iesu Keriso i le muai olaga ma na faia ni feagaiga iina ma le Tama Faalelagi e uiga i ni mea totoa—e oo lava i mea totoa mama—o le a ia faia ao i ai iinei i le lalolagi.
O se tagata moni o le meleniuma o se alii po o se tamaitai na lava le faatuatuaina e le Atua e auina mai i le lalolagi i le tisipenisione sili ona faigata i le talafaasolopito o lenei lalolagi. O se tagata moni o le meleniuma o se alii po o se tamaitai o loo ola nei e fesoasoani e saunia tagata o lenei lalolagi mo le Afio Mai Faalua o Iesu Keriso ma Lona nofotupu i le meleniuma. Ia e faamautinoa atu—na e fanau mai e avea ma tagata moni o le meleniuma.
O le fesili la “E faapefea ona e tu atu ma ola o se tagata moni o le meleniuma?” E fa au fautuaga.
1. Aoao Po o Ai Moni Lava Oe
Faaalu se taimi e mafaufau ai ma le agaga tatalo e uiga i nei mea moni:
-
O oe o se atalii po o se afafine filifilia o le Atua.
-
Ua foafoaina oe i Lona faatusa.
-
Na aoaoina oe i le lalolagi o agaga e saunia ai oe mo soo se mea ma mea uma o le a e feagai ai i le taimi o lenei vaega o nei aso e gata ai (tagai i le MF&F 138:56). O lena aoaoga e tumau i totonu ia te oe!
O loo e ola i le “itula lona sefulutasi.” Ua folafola mai e le Alii o le taimi mulimuli lenei o le a Ia valaaulia ai e e galulue i Lona tovine e faapotopotoina le au filifilia mai itu e fa o le lalolagi. (Tagai i le MF&F 33:3–6.) Ma o oe na auina mai ia auai i lenei faapotopotoina. Ua ou vaaia pea lava pea i le faatosinaga mamana a tagata moni o le meleniuma ao latou aumaia isi i se malamalama o le upumoni. O se vaega lenei o lou faasinomaga ma lou faamoemoega o se atalii o Aperaamo (tagai i le Kalatia 3:26–29)!
I ni nai masina talu ai sa ma maua ai ma lou toalua, o Wendy, se aafiaga maoae i se nuu maotua o Saipiria. Faatasi ai ma i latou na matou malaga faatasi i la matou aso sauniuni i Irkutsk o le peresitene lea o le misiona, o Gregory S. Brinton; lona faletua, o Sally; ma le la tama ua maea le misiona, o Sam, lea na auauna atu i lana misiona i Rusia. Na matou asiasi i le Vaituloto matagofie o Baikal ma se maketi i ona laufanua.
Ina ua matou foi mai i la matou veni, na matou iloaina ua leai Sam. I ni minute mulimuli ane na ia toe foi mai ai, faatasi ai ma se tamaitai pe tusa e i le vaitausaga o le 40 lona matua e igoa ia Valenitina. I lana gagana masani faaRusia, sa valaau mai ai ma le naunautai Valenitia, “Ou te fia feiloai i le tina o lenei alii talavou. E ese lona faaaloalo, atamai, ma agalelei! Ou te fia feiloai i lona tina!” Na tosina Valenitina i foliga fiafia ma le susulu o Sam.
Na faafeiloai e Sam Valenitina i lona tina ma lona tama, tuuina atu ia te ia se tamai tusi e uiga i le Faaola, ma faatulaga se taimi mo faifeautalai e asiasi ai ia te ia. Ina ua o ane faifeautalai mulimuli ane ma se kopi o le Tusi a Mamona, sa ia folafola mai o le a ia faitauina. O nisi foi o tamaitai sa galulue i le maketi sa fiafia foi e uiga i le tusi fou na maua e Valenitina. Tatou te lei iloaina le iuga o lenei tala, ae ona o le malamalama na faasusulu atu e Sam, na faafeiloai atu ai Valenitina ma nisi o ana uo i le talalelei.
O tagata moni o le meleniuma e pei o Sam ua iloa po o ai moni lava i latou. O i latou o ni soo faamaoni o Iesu Keriso o e faaaoga i taimi uma lava avanoa e fesoasoani ia i latou ma isi e saunia mo le nofotupu o le Faaola i le meleniuma.
O le mea lea, o la’u fautuaga muamua o le aoao mo outou lava po o ai moni lava outou. Ole atu i lou Tama Faalelagi i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. Tusi i lalo na uunaiga, iloilo soo, ma mulimuli sao i ai.
Ou te folafola atu ia te oe afai o le a amata ona e mauaina tau lava o se vaaiga i le ala e silasila ai le Tama Faalelagi ia te oe ma mea o loo Ia faamoemoe mai ia te oe e faia mo Ia, o le a le toe tutusa lou olaga!
2. Faatalitali—ma Saunia—e Faataunuu mea Faigata
E masani lava ona talosaga mai le Atua i Ana fanau o le feagaiga e fai mea faigata. Ona o outou o atalii ma afafine tausi-feagaiga a le Atua soifua i le vaega mulimuli o nei aso e gata ai, o le a talosaga mai le Alii ia te oe e fai mea faigata. E mautinoa lava o le a tupu—o tofotofoga faa-Aperaamo e lei gata ai ia Aperaamo (tagai i le MF&F 101:4–5).
Ou te iloa o le a i ai le le fiafia pe a talosagaina e fai se mea e foliga mai e matuai le oo lava i ai lou gafatia. Faatoa 19 masina talu ona avea au ma se tasi o le Korama a Aposetolo e Toasefululua ina ua maliu Peresitene Spencer W. Kimball (1895–1985). I le fonotaga muamua a le au Peresitene Sili ma le Korama a Aposetolo e Toasefululua ina ua mavae le faauuga o Peresitene Ezra Taft Benson (1899–1994), sa ia tuuina atu ni tofiga faapitoa i le Toasefululua. O ana faatonuga ia te au na aofia ai upu nei: “Elder Nelson, e tatau ona e tatalaina atunuu o Europa i Sasae mo le talaiga o le talalelei.”
O le 1985 lena. O le vaitaimi lena o tausaga faigata o faigamalo lea tatou te taua o le Cold War, e le gata na i ai moni lava se pa e vavae ai le aai o Perelini, ae sa i ai foi Europa i Sasae atoa i lalo o faatosinaga saua a komunisi. Sa tapunia lotu, ma na faatapulaaina tapuaiga faalelotu e le malo.
Na ou faaaluina le tele o lou olaga faigaluega i le tatalaina o fatu i le faia o ni taotoga faaolaina, ae sa leai sou poto masani o le a taitaia au e talitonu e mafai ona ou tatalaina ni atunuu mo le talaiga o le talalelei. Ae o lea, ua tuuina mai e se perofeta se tofiga ia te au, o lea na ou alu atu ai e fai le mea sa foliga mai sa matuai le mafai lava.
Mai lava i le amataga, sa i ai le tele o faafitauli i lo’u ala. Na ou taunuu i le tele o atunuu ma le le iloa po o fea e alu i ai. E tusa lava pe faapea sa ou mauaina le igoa o se taitai talafeagai o le malo, sa le o se mea fou le faaleaogaina po o le tolopoina foi o se fonotaga i se taimi mulimuli lava. I se tasi o atunuu, ina ua toe tuu i tua se taimi atofaina mo le lua aso, sa tele ni faaosoosoga sa tuuina mai e tofotofoina ai au—sa aofia ai ni maketi mo faatauga le mama ma nisi gaoioiga e faasaina. I se tasi taimi, na amataina se fonotaga i le faatonuga ia ou tuua vave le atunuu!
Ae sa mafai ona faia e le Alii Lana lava galuega (tagai i le 2 Nifae 27:20–21), ma na faamanuiaina au e matamata i se faagasologa o vavega—i taimi uma lava, ma seiloga lava ua uma ona ou aumaia ou mafaufauga sili, au tamafaiga lototoa sili, ma au tatalo sili ona filiga i le galuega.
O le faailoaina o le Ekalesia na faatagaina mai e nisi o na atunuu ae lei solo i lalo le Olo o Perelini. O le faailoaina mai e nisi na oo mai mulimuli ane. I le 1992, na mafai ai ona ou lipoti atu ia Peresitene Benson ua faatuina le Ekalesia i atunuu taitasi i Europa i Sasae!
I le avea ai ma tagata moni o le meleniuma e faalagolago i ai le Alii, o le a mafai foi e oe ona faataunuuina ni mea maoae o le talafaasolopito! O le a talosagaina oe ia taliaina ni tofiga faigata ma avea ma meafaigaluega i aao o le Alii. Ma o le a Ia faia oe ia faataunuu mea e faigata.
O le a faapefea ona e faataunuuina mea e faigata? E ala i le faia o soo se mea e faamalosia ai lou faatuatua ia Iesu Keriso, e ala i le faateleina o lou malamalama i aoaoga faavae ua aoaoina i Lana Ekalesia toefuataina, ma e ala i le sailia ma le filiga o le upumoni. Pe a talosagaina e faia ni mea faigata, i le avea ai o oe—ma se tagata moni o le meleniuma ua faavaeina i aoaoga faavae mama—o le a mafai ona taliaina le tofiga ma le faatuatua ma le naunau malosi ma faia ma le fiafia mea uma i lou malosi e faataunuu faamoemoega a le Alii (tagai i le MF&F 123:17).
O le a i ai ni ou aso o le a e matuai lotovaivai ai lava. O lea ia tatalo ai mo le malosi ia aua le fiu! O le a e manaomia lena malosi aua o le a faaauau pea ona faaitiitia le tautaua o le avea ai ma se Au Paia o Aso e Gata Ai. O le mea e faanoanoa ai, o nisi na e manatu o ni au uo o le a faalataina oe. Ma o nisi o mea o le a foliga mai lava e le talafeagai.
Ae peitai, ou te folafola atu ia te oe a e mulimuli ia Iesu Keriso, o le a e maua le filemu tumau ma le olioli moni. A e tausia au feagaiga ma le faateleina o le maelega, ma ao e puipuia le Ekalesia ma le malo o le Atua i le lalolagi i le aso, o le a faamanuiaina oe e le Atua i le malosi ma le atamai e faataunuu ai mea faigata.
3. Aoao i le Ala e Maua ai le Mana o le Lagi
E tofu uma lava i tatou ma fesili. O le saili e aoao, malamalama, ma iloa le upumoni o se vaega taua o lo tatou aafiaga faaletino. O le tele o lo’u olaga sa faaaluina i suesuega. O le a lelei foi lou aoao i le faia o fesili musuia.
O nisi o outou o loo tauivi i le taimi lava lenei ia iloa le mea e tatau ona e faia i lou olaga. O nisi o outou atonu o mafaufau pe ua faamagaloina outou ia outou agasala. O le toatele o outou o loo mafaufau po o ai ma po o fea o i ai lau soa faavavau—ma o i latou e le o faia ua tatau ona faia.
O nisi atonu o fesili pe aisea e fai ai e le Ekalesia nisi o mea o loo faia. Atonu o le toatele o outou e le o mautinoa pe faapefea ona maua tali i au tatalo.
Ua saunia lo tatou Tama Faalelagi ma Lona Alo e tali i au fesili e ala i le auaunaga a le Agaga Paia. Ae ua ia te oe le tiute e aoao ai i le ala ia agavaa ai ma mauaina na tali.
O fea e mafai ona e amata ai? Amata i le faaaluina atili o le taimi i nofoaga paia. O le malumalu o se nofoaga paia. E faapena foi le falesa, lea e faafou ai au feagaiga i aso Sa taitasi e ala i le aai ma feinu i le Faamanatuga. Ou te valaaulia foi oe ina ia avea lou fale mautotogi, le fale o e nofo tumau ai, lou aiga, po o lou potumoe ma se nofoaga paia e mafai ona e nofo saogalemu ai mai faatosinaga leaga o le lalolagi.
O le tatalo o le ki lea. Tatalo ia iloa mea e taofia le faia ma mea e amata ona fai. Tatalo ia iloa mea e faaopoopo i lou siosiomaga ma mea e aveese ina ia faateleina le faatasi ai o le Agaga ma oe.
Aioi atu i le Alii mo le meaalofa o le iloatino. Ona ola ai lea ma galue ina ia agavaa e maua lena meaalofa aua a oo mai mea faanenefu i le lalolagi, o le a e iloa lelei lava po o fea e moni ao fea e le moni (tagai i le 2 Nifae 31:13).
Auauna atu ma le alofa. O le auaunaga alofa ia i latou ua leiloa lo latou ala po o ua manunua i le agaga e tatala ai lou loto i faaaliga patino.
Faaalu se taimi tele—se taimi e sili atu ona tele—i nofoaga e maua ai le Agaga. O lona uiga ia tele atu le taimi ma uo o e o loo saili ia maua le Agaga ia i latou. Faaalu ia tele atu le taimi i ou tulivae i le tatalo, tele atu le taimi i tusitusiga paia, tele atu le taimi i le galuega o talafaasolopito o aiga, tele atu le taimi i le malumalu. Ou te folafola atu ia te oe ao e tuuina atu e le aunoa i le Alii se vaega o lou taimi, o le a Ia faateleina mea e ausia i le taimi o totoe.
Matou te lagolagoina tamalii e toa 15 ua faauuina o ni perofeta, tagata vaai, ma tali faaaliga. A tulai mai se faafitauli matuia—ma ua foliga ua sili atu le matuia i aso taitasi—o nei tamalii e toa 15 e tauivi ma le faafitauli, ma taumafai e vaai i taunuuga uma o vaega eseese o faatinoga, ma e latou te saili ma le filiga ia faalogo i le siufofoga o le Alii. A uma ona ou anapogi, tatalo, suesue, manatunatu loloto, ma fefautuaai ma ou Uso e uiga i ni mataupu taua, e le o se mea fou mo au le fafaguina i le taimi o le po ma nisi uunaiga e uiga i le faafitauli lea o loo matou popole ai. Ma o le aafiaga lava lea e tasi e maua e ou Uso.
O le Au Peresitene Sili ma le Korama a Aposetolo e Toasefululua e fefautuaai faatasi ma fefaasoaai mea uma ua faatonu mai e le Alii ia i matou ia malamalama ai ma lagonaina taitoatasi ma faatasi foi. Ona matou vaavaai lea ao uunaia e le Alii le Peresitene o le Ekalesia e folafola atu le finagalo o le Alii.
O lenei faagasologa faavaloaga na mulimulitaia i le 2012 i le suiga o le tausaga e sili ona itiiti o faifetautalai ma faapena foi i le faaopoopoga talu ai nei o le tusitaulima a le Ekalesia, i le sosoo ai ma le faatagaina o faaipoipoga o le itupa e tasi i nisi o atunuu. I le faatumuina i le agaalofa mo tagata uma, ma aemaise mo le fanau, sa matou fagatua mo se taimi umi lava ia malamalama i le finagalo o le Alii i lenei mataupu.
I le manatuaina pea o le fuafuaga o le faaolataga a le Atua ma Lona faamoemoega mo le ola e faavauvau mo Ana fanau taitasi, na matou mafaufau ai i eseesega ma tuufaatasiga e le mafaitaulia o ni ata faamoemoeina e mafai ona tulai mai. Na matou feiloai pea lava pea i le malumalu i le anapogi ma le tatalo ma saili atili le taitaiga ma le uunaiga. Ma, ina ua musuia e le Alii Lana perofeta, o Peresitene Thomas S. Monson, e folafola atu le mafaufau ma le finagalo o le Alii, sa matou lagonaina taitoatasi i lena taimi paia se faamautinoaga faaleagaga. O se faamanuiaga mo i matou o ni Aposetolo ia lagolagoina le mea ua faaalia ia Peresitene Monson. O faaaliga mai le Alii i Ana auauna o se faagasologa paia, ma e faapena foi le faamanuiaina o oe mo le mauaina o faaliga patino.
Ou uso e ma tuafafine pele, ua ia te outou foi le avanoa i le mafaufau ma le finagalo o le Alii mo lou lava olaga e pei ona matou faia o ni Aposetolo mo Lana Ekalesia. E pei ona manaomia e le Alii i tatou ia saili ma manatunatu loloto, anapopogi ma tatalo, ma suesue ma fagatua ma ni fesili faigata, Na te manaomia foi oe e faia lena lava mea ao e sailia tali i au lava fesili.
E mafai ona e aoao e faalogo i le siufofoga o le Alii e ala i musumusuga a le Agaga Paia.1 E pei ona foliga mai e fesoasoani le Google, Twitter, ma le Tusifoliga, latou te le saunia lava ni tali i au fesili e sili ona taua!
Au uo talavou faapelepele, e mafai ona outou iloa le mafaufau ma le finagalo o le Alii mo lou lava olaga. E te le tau mafaufau po o e i ai i le mea e finagalo le Alii e te i ai po o e faia le mea e finagalo o Ia e te faia. E mafai ona e iloa! O le Agaga Paia “o le a tau atu ia te outou mea uma e tatau ona outou faia” (2 Nifae 32:3).
4. Mulimuli i Perofeta
I le 1979, ao auauna atu o se peresitene aoao o le Aoga Sa, na valaaulia au e auai i se semina a Sui Risone i le taimi na tuuina atu ai e Peresitene Kimball se lauga musuia e uiga i le tatalaina o faitotoa o atunuu ia na tapunia i le Ekalesia, e pei o Saina. Na ia luiina i latou uma na auai e suesue i le gagana Mandarin ina ia mafai ona ofoina atu a matou tomai faalegaluega e fesoasoani i tagata o Saina.
Ia te au, o le lui a Peresitene Kimball na foliga mai o se faatonuga faaperofeta. Ma o lena lava po na ou fesili atu ai i lou toalua ua maliu, o Dantzel, pe o le a ia malie ma te suesue faatasi i le faaMandarin. Sa malie i ai o ia, ma sa maua se faiaoga e fesoasoani ia i maua. E moni ma te lei aoao ia matua lelei i le tautatala faaMandarin, ae na lava mea na ma aoaoina ma ina ua valaaulia au i le tausaga lava na sosoo ai (e ala i se faagasologa o ni mea na faafuasei lava ona tutupu) e alu i Saina o se polofesa asiasi e aoao atu le taotoga o se fatu ua tipi, sa ou i ai i se tulaga sili atu e taliaina le valaaulia.
I le lima tausaga mulimuli ane i le 1985, o le tausaga ina ua mavae le valaauina o au i le Korama a le Toasefululua. I se tasi aso sa ou maua ai se talosaga faanatinati e alu i Saina e fai se taotoga o le fatu i le tagata pese tautaua o lena atunuu, e lauiloa i Saina atoa o se toa manumanu o le atunuu. Na ou faamatala atu o lou tiute faalelotu i le taimi atoa e le mafai ai ona ou sau, ae na aioi mai fomai i Saina ia ou alu atu loa lava e fai le taotoga e faasaoina le ola.
Sa ou talanoa e uiga i le mataupu i lou peresitene o le korama ma le au Peresitene Sili. Sa latou lagona se uunaiga faapea, i le avea ai ma se auaunaga i tagata o Saina, e tatau ona ou faia le faigamalaga ma faia le taotoga.
Sa ou alu. O le mea e faafetai ai, na manuia le taotoga! O le isi mea, o le taotoga mulimuli lava lena o se fatu na ou toe faia. Sa faia i Jinan, Saina, i le aso 4 Mati, 1985.
Na toe faaauau le tala i se taimi mulimuli ane, o le taimi lea ia Oketopa 2015. Na valaaulia i maua ma Wendy e toe foi i le Aoga Faafomai o le Iunivesite o Shandong i Jinan. Na faateia i maua ina ua faafeiloaia au ma le fiafia “o se uo ua leva” a Saina ma na toe faatasia ma fomai tipitipi na ou aoaoina i le 35 tausaga talu ai. O se faatumutumuga o la ma asiasiga o le feiloai lea ma le atalii ma le atalii o le atalii o lena tagata pese tautaua. O nei aafiaga ofoofogia uma sa mafai ona faia mo se mafuaaga e tasi: na ou faalogo i le fautuaga a se perofeta e suesue le faaMandarin!
E silasila perofeta i luma. Latou te vaai i tulaga lamatia faigata ua tuuina e le fili pe o le a tuuina i lo tatou ala. E muai vaaia foi e perofeta avanoa matagofie ma faamanuiaga o faatalitali mai ia i latou o e faalogo ma le manao ia usiusitai. Ou te iloa e moni lenei mea! Ua ou oo i ai mo au lava ia i le tele o taimi.
Ua folafola mai e le Alii ia i tatou Na te le faatagaina le perofeta e taitai sese i tatou. Na folafola mai e Peresitene Harold B. Lee (1899–1973): “Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faale-olaga nei. E ono faalavelave i le ituaiga olaga o loo e ola ai. Ae afai e te faalogo i nei mea, e pei o loo tuuina mai i le fofoga o le Alii Lava Ia, faatasi ma le onosai, ma le faatuatua, o le folafolaga e faapea ‘o le a le manumalo faitotoa o seoli ia te outou; ioe, a e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa’ (MF&F 21:6).”2
Atonu e te le malamalama i taimi uma i folafolaga taitasi a se perofeta soifua. Ae afai e te iloaina o se perofeta o se perofeta, e mafai ona e tatalo atu i le Alii i le lotomaualalo ma le faatuatua ma ole atu mo sa oe lava molimau e uiga i soo se mea ua folafola mai e Lana perofeta.
I le vaitaimi o le 40 T.L.M. e toatele sa Nifae na auai i le Ekalesia, ma na ola le Ekalesia. Ae o taupulepulega faalilolilo na amata ona faateleina, ma o le toatele o o latou taitai pepelo na lalafi solo i tagata ma na faigata ai ona iloaina. Ao faateteleina pea lava pea le faamaualuga o tagata, o le toatele o sa Nifae na “faatauemu i mea ua paia, ma faafitia le agaga o le valoaga ma faaaliga” (Helamana 4:12).
O na lava foi taufaamatau ua i ai ia i tatou i aso nei. O le meamoni matautia e faapea o “auauna a Satani” (MF&F 10:5) ua lalafi solo i le lalolagi. O lea ia matuai faaeteete ai po o le fautuaga a ai e te mulimuli ai (Helamana 12:23).
Ou uso e ma tuafafine, na outou fananau mai o ni tagata moni o le meleniuma. O outou “o se tupulaga filifilia” (1 Peteru 2:9), na muaifaauuina e le Atua e faia se galuega ofoofogia—e fesoasoani ai i tagata o lenei lalolagi mo le Afio Mai Faalua o le Alii!