Atong mga Panimalay, Atong mga Pamilya
Gusto Kong Mopuyo uban Nimo sa Kahangturan!
Ang tagsulat nagpuyo sa Santo Domingo, Dominican Republic.
Ang hugot nga pagtuo sa usa ka sayis anyos nakatabang nako sa pagpangita pag-usab sa akong hugot nga pagtuo.
Sa dihang 22 nako, ang akong kinabuhi nakasinati sa wala damha nga panghitabo: ang akong mama namatay. Siya ug ang akong papa mga tawo nga may dakong pagtuo, ug sila mipadako nako diha sa ebanghelyo. Human sa iyang kamatayon, ang akong papa mibalhin gikan sa among nasud ngadto sa Estados Unidos. Sa paglabay sa panahon, misugod ko og pagbati og kamingaw tungod kay nag-inusara ra kong anak sa akong mga ginikanan. Wala na koy mama uban nako dinhi sa yuta, ug ang akong papa mipuyo sa layo; makakita lang ko niya sulod sa tulo ka semana sa usa ka tuig.
Tungod niadto nga mga pagbati misugod ko og pangita og kahupayan sa akong “mga higala” sa kolehiyo ug sa opisina diin ko nagtrabaho. Hinay-hinay, misugod ko og pangita og dili mao nga kalipay sa temporal nga mga butang. Wala na ko mosimba, ug sa ngadto-ngadto na-inactive na gayud. Human niadto, naminyo ko sa usa ka talagsaon nga batan-ong lalaki kinsa, bisan siya adunay maayo kaayo nga mga baruganan, wala masayud bahin sa ebanghelyo. Kami adunay tulo ka mga anak: si Leah, Isaac, ug Ismael.
Paghulagway pinaagi ni Kelley McMorris
Usa ka Oktubre niana, ang akong amahan mibisita ug mitan-aw sa bag-ong masuso. Atol sa iyang pagbisita, ang sayis anyos nga si Leah nangutana sa iyang lolo nganong wa niya gikuyog ang iyang lola uban niya. Mipasabut kaniya ang akong amahan nga si Lola atoa sa nindot kaayo nga dapit duol sa Langitnong Amahan. Paglakaw dayon sa akong amahan, si Leah namugos nako og ingon, “Mama, gusto kong makigkita ni Lola. Nasayud ko nga tua siya sa langit, apan gusto sab ko moadto ta og dungan sa umaabut—si Lola ug Lolo, Papa, Isaac, Ismael, ug ikaw, ug ako. Gusto kong mopuyo uban nimo sa kahangturan. Gusto ko nga pareha ta gihapon nga pamilya didto sa langit nga naa kita sa yuta makadula uban ni Lola!”
Wala ko masayud unsay isulti. Akong gihikap ang iyang matahum, inosente nga nawong, ug dayon misulod ko sa akong lawak. Miluhod ko ug mihilak hangtud nahutdan sa mga luha. Mihangyo ko sa Langitnong Amahan alang sa kapasayloan. Nasayud ko nga mibiya ko sa agianan nga motugot kanamo nga magkauban isip usa ka mahangturon nga pamilya. Napakyas ko sa akong responsibilidad sa pagdala kanila sa matarung nga dalan, ug napakyas ko sa pagsulti sa akong bana bahin sa ebanghelyo.
Sa dihang nakabarug na ko, akong gikontak ang usa ka lider sa Simbahan, ug iya kong ipakontak sa mga elder sa akong ward. Pagkasunod gabii, nangabut sila ug mitudlo sa akong bana. Sukad niana nga gabii, ang among kinabuhi nausab sa kahangturan. Karon nagsimba kami kada Dominggo isip usa ka pamilya. Ako adunay calling nga nagtugot kanako sa pagtabang sa dili kaayo aktibo nga mga sister. Nangandam sab kami sa pagtambong sa templo.
Ang espiritu sa Dios usahay mogiya kanato pinaagi niadtong wala kaayo nato damha. Niining higayuna nahitabo kini pinaagi sa akong sayis anyos nga anak nga babaye. Karon ako nasayud nga pinaagi sa pagka-sealed sa templo, ako makapuyo uban sa akong pamilya sa kahangturan.