Hangtud sa Sunod Natong Panagkita
Pag-usisa alang sa usa ka Buhi nga Propeta
Niadtong 1939, sa wala pa ang Ika-2 nga Gubat sa Kalibutan, si Brother Brown giimbitar sa sakop sa House of Commons sa England aron sa paghatag og legal nga argumento sa gisulti ni Brother Brown nga si Joseph Smith usa ka propeta. Sa usa ka pakigpulong nga gihatag didto sa Brigham Young University niadtong Oktubre 4, 1955, nga giulohan og “Ang Profile sa usa ka Propeta,” si Presidente Brown mihulagway sa ilang pakig-istoryahanay (tan-awa sa speeches.byu.edu).
Paghulagway pinaagi ni James Johnson
Gisugdan nako … , “Moingon mo nga ang akong gituohan nga ang Dios nakigsulti ngadto sa usa ka tawo niini nga kapanahunan usa ka salikwaut ug dili tinuod?”
“Alang kanako mao kini.”
“Motuo ka ba nga ang Dios nakigsulti gayud sa usa ka tawo?”
“Sa pagkatinuod, sa tibuok Biblia duna tay ebidensya niana.”
“Nakigsulti ba siya kang Adan?”
“Oo.”
“Ngadto kang Enoch, Noe, Abraham, Moises, Jacob, Joseph, ug ngadto sa mga propeta?”
“Mituo ko nga Siya nakigsulti sa matag usa kanila.”
“Mituo ka ba nga mihunong ang pakigsulti tali sa Dios ug sa tawo sa dihang si Jesus mipakita dinhi sa yuta?”
“Wala, ang mao nga komunikasyon miabut sa kinatumyan niini, sa kinatas-an niini, niadtong higayuna.”
“Mituo ba ikaw, sir, nga human si Jesus nabanhaw, dunay usa ka abogado—kinsa usa usab ka tighimo og tent sa pangalan nga Saulo sa Tarsus—sa dihang padulong siya sa Damascus nakigsulti kang Jesus sa Nazareth, nga nalansang, nabanhaw, ug misaka ngadto sa langit?”
“Mituo ako.”
“Kang kinsang tingog ang nadungog ni Saulo?”
“Tingog kadto ni Jesukristo, kay Siya mipaila sa Iyang kaugalingon.”
“Nan, ako mosumiter kanimo sa tanang ka seryuso nga mao kadto ang naandan nga paagi sa kapanahunan sa Biblia sa pagpakigsulti sa Dios ngadto sa tawo.”
“Tingali moadmitar ako niana, apan nahunong kini sa makadiyot human sa unang siglo sa kapanahunan sa Kristiyanismo.”
“Ngano kaha nga nahunong man kini?”
“Dili ko makaingon.”
“Sa imong hunahuna ang Dios wala na kaha makigsulti sukad niadto?”
“Nakasiguro ko nga Siya wala gayud.”
“Aduna gayud kanay rason. Makahatag ka ba kanako og rason?”
“Wala ko kahibalo.”
“Mahimo bang mosugyot ako og posibleng mga rason? Tingali ang Dios dili na makigsulti sa tawo tungod kay dili na Siya makahimo. Nawagtang na Kaniya ang gahum.”
Miingon siya, “Siyempre matampalason kana.”
“Hinoon, kon dili ka modawat niana, tingali dili na Siya makigsulti sa katawhan tungod kay wala na Siya mahigugma kanato ug dili na Siya interesado sa mga kalihokan sa katawhan.”
“Dili,” miingon siya, “Ang Dios nahigugma sa tanang katawhan, ug Siya walay pinalabi sa mga tawo.”
“Nan, hinoon, kon Siya makasulti, ug kon Siya nahigugma kanato, nan ang mao lamang nga laing posible nga tubag, sa akong tan-aw, mao nga wala nato Siya kinahanglana. Nakahimo na kita og paspas nga mga kalamboan sa siyensya ug edukado na kaayo kita nga wala na kita magkinahanglan sa Dios.”
Ug dayon siya miingon—ug ang iyang tingog mikurog sa iyang paghunahuna sa nagsingabut nga gubat—“Mr. Brown, wala pa gayud mahitabo sa kasaysayan sa kalibutan nga ang tingog sa Dios gikinahanglan sama sa gikinahanglan karon. Tingali makasulti ka kanako nganong dili Siya makigsulti.”
Ang akong tubag mao: “Siya gayud nakigsulti, Siya nakigsulti na; apan ang katawhan nagkinahanglan og hugot nga pagtuo aron makadungog Kaniya.”