Lima ka Pangutana nga Angay nga Ipangutana Kon Wala Matubag ang mga Pag-ampo
Ang tagsulat nagpuyo sa New York, USA.
Nakasulay ba kamo nga nag-ampo ug naghulat sa tubag nga wala gayud moabut? Wala kamo mag-inusara—apan makasiguro mo nga ang Langitnong Amahan maminaw gayud sa inyong mga pag-ampo. Importante nga mahinumdom nga ang mga tubag sa pag-ampo mahimong dili moabut kanus-a o sa unsa nga paagi nga inyong gusto ug nga ang atong Langitnong Amahan kanunay nga nasayud sa labing maayo.
Aniay pipila ka mga sugyot nga mahimong inyong ipangutana kon kamo naglisud sa pagdawat og mga tubag sa usa ka pag-ampo:
1 Andam ba ako sa pagsunod sa tubag?
Ang pag-ampo pinaagi sa hugot nga pagtuo nagpasabut nga andam nga mosunod sa tubag nga inyong madawat—bisan mao man kini ang tubag o dili nga inyong gipaabut. Si Propeta Joseph Smith sa makausa nakadawat sa mosunod nga instruksyon: “Andama ang imong kasingkasing sa pagdawat ug pagsunod sa mga sugo nga hapit na Ako mohatag nganha kaninyo; alang niadtong tanan kinsa nakabaton niini nga balaod nga gipadayag ngadto kanila kinahanglan nga mosunod niini nga balaod” (D&P 132:3). Kon kamo nag-ampo kon motambong ba kamo o dili sa party, mosunod ba kamo bisan unsa pa (bisan kon ang tubag dili)?
2 Nabuhat ba nako ang tanan?
Ingnon ta nga kamo wala magtuon sa inyong science test tungod kay mikuyog hinoon kamo sa inyong mga barkada. Ang Langitnong Amahan ba motabang ninyo nga makapasar sa inyong test kon kamo mangayo lang sa Iyang tabang?
Kinahanglan nga buhaton nato ang atong bahin aron makadawat sa mga panalangin. Mao nga sa pagtuon alang sa usa ka test, kamo makaampo alang sa kalig-on nga makahimo og maayo sumala sa inyong pagpangandam.
Ikonsiderar ang ehemplo sa mga anak nga lalaki ni Mosiah, kinsa nagmalampuson sa ilang misyonaryo nga buhat sa dihang ilang gidugangan ang ilang paningkamot: “Naghatag ngadto sa ilang kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila nagtudlo, sila nagtudlo uban sa gahum ug pagtugot sa Dios.” (Alma 17:3).
3 Gibaliwala ba nako ang tubag?
Ang Langitnong Amahan kanunay nga maminaw kaninyo, mao nga posible nga Siya mitubag na sa inyong pag-ampo! Sumala sa gisulti sa Doktrina ug mga Pakigsaad 6:14, “Sa makadaghan nga ikaw nagpakisayud ikaw nakadawat og panudlo sa akong Espiritu.” Makaampo kamo alang sa espirituhanon nga mga mata aron makahibalo sa tubag, tungod kay ang mga tubag usahay tubagon sa dili kaayo klaro o dili direkta nga mga paagi—sama sa tubag nga ipaagi sa mga aksyon sa uban.
Ayaw usab, kalimot sa paggahin og panahon sa pagpaminaw. Si Elder Richard G. Scott (1928–2015) sa Korum sa Napulog Duha ka mga Apostoles mipasabut: “Ang mga tubag sa [Langitnong Amahan] tagsa rang moabut samtang nagluhod pa kamo sa pag-ampo. … Hinoon, modasig Siya kanimo sa hilum sa higayon nga ang Espiritu igo kaayo nga motandog sa inyong hunahuna ug kasingkasing” (“Ang Paggamit sa Langitnon nga Gasa sa Pag-ampo,” Liahona, Mayo 2007, 9).
4 Ang ako bang mga tinguha matarung?
Kon kamo mangayo og butang nga dili labing maayo alang kanimo, dako ang kahigayunan nga ang inyong gihangyo dili ihatag. Ang Manluluwas mitudlo nga kita “kinahanglan gayud nga mag-ampo kanunay ngadto sa Amahan sa ngalan ni [Jesukristo]” (3 Nephi 18:19), nga nagsugyot nga kita mangayo sa mga butang nga matarung aron kini ikahatag. Pangutan-a ang inyong kaugalingon, “Unsa kaha ang bation sa Manluluwas mahitungod sa akong mga gusto?” Kon ang inyong mga pangandoy nanukad sa kahakog o bisan unsa nga matang sa dili pagkamatarung, pag-ampo aron mabatunan ang kausaban sa kasingkasing ug aron makahibalo unsa ang gusto sa Manluluwas nga inyong tinguhaon.
5 Sakto ba kini nga panahon?
Unsay atong gipangayo kinahanglan nga matarung, apan ang tayming kinahanglan usab nga sakto. Ang Langitnong Amahan adunay dakong plano nga giandam alang nato, apan ang atong iskedyul usahay medyo lahi gikan sa Iyang iskedyul. “Ang akong mga pulong mga tinuod ug dili gayud makawang. … Apan ang tanan nga mga butang kinahanglan gayud mahinabo diha sa ilang panahon” (D&P 64:31–32). Tingali kini nagpasabut nga maghulat pa og kadiyot nga maayo kana nga kadaot o sa nawala nga hayop nga makit-an, ug usahay ang tayming sa Ginoo naglakip sa sunod nga kinabuhi—apan makasiguro kamo nga Siya maminaw ug motabang kaninyo.
Mahimong lisud ang pagpasensya, kon ang tubag sa inyong mga pag-ampo dili klaro. Apan samtang kamo magsiksik, magmalig-on kamo nga kamo sa kanunay makakita sa mga tubag nga inyong gikinahanglan kon kamo mangita uban sa tinuod nga katuyoan: “Ug kamo mangita kanako, ug makakaplag kanako, sa diha nga kamo mangita kanako uban ang inyong bug-os nga kasingkasing.” (Jeremias 29:13).