Propetikanhon nga mga Baruganan sa Pagkamatinud-anon

January 2017

Propetikanhong mga Baruganan sa Pagkamatinud-anon

Ni Elder C. Scott Grow

Sa Seventy

Gikan sa usa ka debosyonal nga pakigpulong, “Where Will You Be in 20 Years? [Unsa na Kaha Kamo Paglabay sa 20 ka Tuig?],” nga gipamulong didto sa Brigham Young University–Idaho niadtong Mayo 15, 2012. Alang sa kompleto nga pakigpulong (sa Iningles), adto sa web.byui.edu/devotionalsandspeeches.

Unsa nga mga desisyon ug mga pasalig ang inyong kinahanglang himoon karon ug sa umaabut aron matabangan kamo nga magpabilin nga matinud-anon?

Kapin na sa 20 ka tuig ang milabay, nakompleto nako ang akong serbisyo isip usa ka presidente sa misyon didto sa South America. Ang akong asawa, si Rhonda, ug ako nakakita og dakong kadaugan ingon man sa makahugno sa kasingkasing nga trahedya sa kinabuhi sa among mga misyonaryo 20 ka tuig sukad niadto.

Ang kadaghanan sa among mga misyonaryo malipayong na-sealed sa templo, mipadako og mga matarung nga mga anak ug mipadala kanila sa mga misyon, ug matinud-anong nagserbisyo sa auxiliary sa Simbahan ug sa mga calling sa priesthood. Ang pipila, hinoon, dili kaayo aktibo, ang uban nangaminyo ug nagdiborsyo, ug pipila ang na-excommunicate gikan sa Simbahan.

Unsa man ang nakahimo og kalainan sa kinabuhi sa among mga kanhi misyonaryo? Unsa man kaha ang lahi nga nabuhat sa pipila aron malikayan ang personal nga trahedya? Unsa kaha kamo? Unsa na kaha kamo paglabay sa 20 ka tuig? Unsa nga mga desisyon ug mga pasalig ang inyong kinahanglan himoon karon ug sa umaabut aron matabangan kamo nga magpabilin nga matinud-anon?

Mosugyot ko og 10 ka mga baruganan nga makatabang kaninyo.

1 Padayuna ang Pag-amuma sa inyong Pagpamatuod

Ang mga kasinatian sa usa ka misyon nga puno sa Espiritu nakatukod og pundasyon sa hugot nga pagtuo nga makapanalangin kaninyo sa inyong tibuok kinabuhi. Kana nga pundasyon sa hugot nga pagtuo mokunhod lamang pinaagi sa pagbaliwala o sa sala.

Bag-uhay lang nag-interbyu ako og usa ka returned missionary kinsa dili kaayo aktibo ug miangkon nga nawad-an sa iyang hugot nga pagtuo. Ako siyang gipangutana kon nag-ampo ug nagtuon ba siya sa Basahon ni Mormon, sama sa iyang gibuhat sa dihang usa pa siya ka misyonaryo. Miingon siya nga wala tungod kay nawala ang iyang pagtuo ni Joseph Smith.

Naaghat ko sa pagpangutana niya niini: “Nalambigit kaba sa pornograpiya?” Mitubag siya og oo. Ako siyang gisultihan nga dili ikahibulong nga siya nawad-an sa iyang pagpamatuod.

Akong gipasabut nga ang usa ka pagpamatuod mao gayud ang gihimo nga pagsaksi sa Espiritu Santo diha sa atong kalag sa katinuod sa ebanghelyo ug sa gipahiuli nga Simbahan. Kon mapakyas kita sa pag-ampo ug pagtuon sa mga kasulatan, ang impluwensya sa Espiritu sa atong kinabuhi maluya, mopaubos sa atong pagsagang sa tintasyon. Kon kita makasala ug dili na limpyo, mawad-an kita sa pakig-uban sa Espiritu Santo. Kon wala ang padayon nga pagsaksi sa Espiritu, dali ra kitang makahunahuna nga wala kitay pagpamatuod ug tingali wala gayud.

Ang atong mga pagpamatuod nagkinahanglan ug padayon nga pag-amuma. Kana nga pag-amuma moabut gikan sa personal nga pag-ampo, inadlaw nga pagtuon sa kasulatan—ilabi na sa Basahon ni Mormon—ug pagserbisyo sa Simbahan sa tibuok natong kinabuhi.

2 Sunda ang Tambag sa Buhi nga mga Propeta & mga Apostoles

Akong sublion ang propetikanhon nga tambag nga makatabang kaninyo aron makabaton og usa ka malipayon nga kaminyoon, usa ka matinud-anon nga pamilya, ug usa ka malampuson nga kinabuhi. Nagpasabut ko sa “Ang Pamilya: Usa ka Pamahayag ngadto sa Kalibutan.” Mopakigbahin ko og pipila ka importanting bahin niana nga pamahayag, nga gimantala sa Unang Kapanguluhan ug sa Korum sa Napulog Duha ka Apostoles niadtong 1995. Atong gipaluyohan kining mga Kaigsoonan isip mga propeta, mga manalagna, ug mga tigpadayag. Sila ang mga tigpama-ba sa Dios ngadto sa Iyang mga anak dinhi sa yuta.

Sa adlaw nga naorganisar ang Simbahan, ang Dios namulong kabahin sa Iyang propeta, nag-ingon, “Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo” Dayon ang Ginoo misaad og temporal ug mahangturon nga mga panalangin kon kita mosunod sa tambag sa mga propeta: “Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (D&P 21:5–6).

Pagkadako nga panalangin niining lisud nga mga panahon.

3 Ma-sealed sa Templo Ug Maghupot sa Inyong mga Pakigsaad

Ang mga propeta, manalagna, ug tigpadayag “mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.” Sila midugang: “Ang balaan nga plano sa kalipay makahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangturan.”¹

Ang labing importanteng desisyon nga inyong himoon sa kinabuhi “mao ang pagminyo sa eksakto nga tawo, sa eksakto nga lugar, pinaagi sa eksakto nga awtoridad”² ug dayon maghupot sa inyong mga pakigsaad sa templo. Walay kahimayaan kon wala ang pag-seal sa templo.

Aron mokwalipay sa kahimayaan, ang managtiayon kinahanglan gayud mosulod ngadto “sa bag-o ug walay katapusang pakigsaad, ug [gikinahanglan gayud] gibugkos ngadto kanila pinaagi sa Balaan nga Espiritu sa saad. pinaagi kaniya kinsa nadihogan”—ang propeta. Kon kita maghupot sa atong mga pakigsaad sa templo, kita “makapanunod og mga trono, mga gingharian, mga kayutaan, ug mga kagamhanan, kamadoan, tanan nga mga kahitas-an ug mga kahiladman … ug himaya sa tanan nga mga butang, … diin nga himaya mao ang kahingpitan ug pagpadayon sa mga binhi hangtud sa hangtud.” (D&P 132:19; tan-awa usab sa bersikulo 7).

Ang pagpa-seal sa templo naglakip sa mga saad sa mahangturon nga mga panalangin sa sunod nga kinabuhi ug midugang sa kalagmitan sa usa ka malipayon nga pamiya. Isip usa ka gipahinungod nga anak sa Dios nga lalaki o babaye, kamo mipakigsaad nga moanhi sa yuta niining panahona sa pagtukod sa gingharian sa Dios. Kana nga pagtukod sa gingharian maglakip sa imong kaugalingong kaminyoon sa templo.

4 Katambayayong sa Dios sa Pagdala sa Iyang mga Espiritu nga mga Anak dinhi sa Yuta

Gipamahayag sa pamahayag sa pamilya: “Ang unang sugo nga gihatag sa Dios ngadto ni Adan ug Eva mao ang mahitungod sa posibilidad alang kanila isip bana ug asawa nga mahimong mga ginikanan. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”

Ang mga pamilya karon mas gagmay ra kay sa henerasyon nga milabay—gani sa LDS nga mga pamilya. Kanunay kitang makapangrason sa paglangay o pagpugong sa gidaghanon sa atong mga anak. Sama pananglit, “Kinahanglan mogradwar una mi” o “Nagkinahanglan mi og mas maayong trabaho aron makakwarta og dako-dako” o “Ngano gud nga putlon man ang tanang kalingawan pinaagi pagpanganak?”

Napanalanginan kamo og usa ka pagpamatuod sa gipahiuli nga ebanghelyo ni Jesukristo. Aduna kamoy mga panalangin sa kahangturan nga ikatanyag ngadto sa inyong mga anak. Ayaw pagsige og hunahuna nga kinahanglan ikahatag ninyo ang tanang butang nga temporal. Ang labing nindot nga gasa nga inyong ikatanyag ngadto sa inyong mga anak mao ang access ngadto sa tanang espirituhanon nga mga butang sa gingharian sa Dios.

Kon kamong magtiayon mainampuon nga magtinambagay mahitungod sa pagbaton ug mga anak, hinumdumi nga kamo ang mga batan-on nga may dungganon nga katungod sa pagkatawo. Palihug ayaw biyai ang Dios sa inyong pagdesisyon. Ipaambit ang katungod nga matawo ang daghang panimalay. Total, sila ang Iyang mga anak dugay na sa dili pa sila mainyo.

Inubanan sa hugot pagtuo sa Dios ug sa Iyang propetikanhon nga pulong, padayon sa walay pagpangatarungan o pagduhaduha ug tukura ang inyong kaugalingong mahangturong pamilya.

5 Ayaw Pakiglambigit sa Pornograpiya o sa Ubang Imoral nga Kinaiya

Ang pamahayag nagpadayon, “Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahud sa mga panaad sa kaminyoon uban sa hingpit nga pagkamaunungun.”

Ang hingpit nga kamaunongon nagpasabut sa pagkamatinud-anon sa pisikal nga paagi ingon man matinud-anon sa emosyonal nga paagi ngadto sa inyong kapikas. Ang pornograpiya ug pakigrelasyon diha sa internet mao ang pagkadili-matinud-anon sa pagbati. Kon ang kapikas nalambigit sa pornograpiya, siya nakalapas sa sagradong pagsalig sa labing suod nga kinaiyahan. Ang inosenteng kapikas mobati nga giluiban. Ang kompyansa ug pagsalig sa kaminyoon mokunhod. Ang pagpanapaw maoy resulta sa pornograpiya.

Akong ipakigbahin ang mga pagbati sa usa ka lalaki kinsa na-seal sa templo apan nawad-an sa pamilya tungod sa pornograpiya ug sa pakigrelasyon sa usa ka babaye diha sa internet. Masulob-on siyang misulat: “Wala ko mopatalinghug sa mga pulong nga gihatag kanako sa akong patriyarkal nga panalangin, nga namahayag nga si Satanas walay gahum sa akong kinabuhi gawas kon ako motugyan kaniya. Mihatag ko niya og daghan, ug sa hinay hinay ug sigurado nga paagi gidawat niya kini ug migamit niana nga gahum sa pagguba sa akong kinabuhi uban sa akong asawa ug sa akong mga anak. Gihigugma nako sila sa tibuok nakong kasingkasing ug gihigugma pa gihapon, ug sa kanunay maghigugma, apan kana nga paghigugma dili paigo sa paglupig sa gahum nga gituyo nako sa paghatag kang Satanas sa akong kinabuhi aron sa pagguba niini. Ang mga pagtulun-an sa Simbahan naghatag [kanato] og usa ka paagi aron makabalik isip usa ka pamilya nga na-seal alang sa panahon ug sa tanang kahangturan ngadto sa atong Langitnong Amahan, kon naminaw lang gayud unta ko ug mipatalinghug kanila, apan sa katapusan wala nako buhata.”

Pagkasubo nga trahedya.

6 Itudlo ug Sundon ang Ebanghelyo sa Inyong Panimalay

Ang pagpamahayag nagtudlo kanato sa mga butang nga kinahanglan gayud natong buhaton aron magmalipayon sa atong mga panimalay. “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo. Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan.”

Dihang ang akong asawa ug ako bag-o pa nga managtiayon, balik balik kami nga naningkamot sa pag-establisar og usa ka lig-on nga kinaiya sa pagbasa sa mga kasulatan kada adlaw isip pamilya. Sa dihang ang among kamagulangan hapit na mag-desisyete anyos, nahimo na gyud namo nga inadlaw nga kinaiya. Nagbasa una sa buntag, matinud-anon namong gipadayon sukad nianang higayuna. Dihang ang kinaiya naestablisar na uban sa among mga anak, ang mga manghud ganahan na nga mangapil samtang sila nagdako. Kanunay kaming magbasa sa wala pay alas 6:00 sa buntag tungod kay dunay sayo sa buntag nga seminary.

Ang batan-ong managtiayon anaa sa kahimtang sa pagsugod sa ilang kaugalingong matarung nga mga tradisyon sa pamilya—magpahigayon og inadlaw nga pagtuon sa kasulatan sa pamilya, pag-ampo sa pamilya, ug pag-andam sa ilang mga anak alang sa mga misyon ug pagminyo sa templo.

7 Pagtahud sa mga Tahas sa Amahan ug Inahan sa Pagpadako sa mga Anak

Ang pamahayag mipakigbahin usab og pipila ka importanting tambag mahitungod sa pagpadako sa mga anak: “Ang unang mga kapangakohan sa mga inahan mao ang pag-atiman sa ilang mga anak. Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban.”

Usahay ang usa sa ginikanan mahimong mobati nga siya mas kwalipikado sa pagpadako ug pagdisiplina sa mga bata. Ang propeta niining dispensasyon balik-balik nga nagtudlo nga ang mga bana ug asawa magkatimbang diha sa kaminyoon, nga ang tanang desisyon kalabut sa pamilya kinahanglan nga himoon sa panagtambayayong ug panagsinabtanay.

Ang katimbang nga kauban mao ang pagkahimong patas nga kauban. Magtinambagay ug mag-uban sa pag-ampo. Magpagiya pinaagi sa Espiritu aron masayud sa labing epektibo nga paagi sa pagpadako sa mga anak. Ang ilang mahangturon nga padulngan maapektuhan sa inyong mga desisyon.

8 Gamita ang Inyong Moral nga Kabubut-on aron Mopili sa Pagsunod sa Manluluwas

Ang desisyon kon unsa na unya kamo paglabay sa 20 ka tuig o 20 ka siglo anaa ra ninyo. Gawasnon kamo sa pagpili, hinoon, ang mahangturon nga sangputanan maggikan sa inyong mga pagpili. Tungod sa Pag-ula sa Manluluwas, ang mga tawo “natubos gikan sa pagkapukan [ug] sila nahimo nga gawasnon sa kahangturan, nasayud sa maayo gikan sa dautan; sa pagbuhat alang sa ilang mga kaugalingon ug nga dili pagaaghaton, gawas kon kini mao ang silot sa balaod sa mahinungdanon ug katapusan nga adlaw, sumala sa mga sugo nga gihatag sa Dios.

“Busa, ang mga tawo … gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa; kay siya nagtinguha nga ang tanan nga mga tawo unta mahimo nga mauyamot sama ngadto kaniya.” (2 Nephi 2:26–27; empasis gidugang).

Si Satanas nasilag kaninyo tungod sa inyong pagka-kamo ug unsa ang inyong girepresentar. Gusto siya nga himoon kamong miserable, sama kaniya. Si Jesukristo nahigugma kaninyo! Iyang gibayran ang bili sa inyong mga sala. Iyang gihatag ang Iyang kinabuhi alang kaninyo. Nagdapit siya kaninyo sa pagsunod Kaniya ug paghinulsol, kon gikinahanglan. Kon kamo mosunod sa Manluluwas, makaangkon kamo og “hingpit nga kalipay niining kinabuhia ug sa kinabuhing dayon sa umaabut nga kalibutan.”³

9 Palamboa ang pagtuo aron Molahutay hangtud sa Katapusan

Ang hugot nga pagtuo moabut kon kamo nakabig ngadto sa Ginoo. Ang propeta nga si Nephi mitudlo: “Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20).

Si Presidente Thomas S. Monson bag-uhay lang miingon diha sa kinatibuk-ang komperensya, “Ang kaugmaon sama kahayag sa inyong hugot nga pagtuo.”⁴ Kana nagkalip sa pagtuo aron sa paglahutay ug pagbuntog sa tanang babag, lakip sa mga pagkasilo, pagluib, ug mga kasagmuyo. Ang inyong pagtuo aron sa paglahutay motumbok sa inyong padulngan, gani sa inyong mahangturon nga padulngan.

10 Itugyan ang Inyong Kabubut-on ngadto sa Kabubut-on sa Dios

Nag-ampo ko nga ang Dios motandog sa inyong kalag uban sa tinguha sa pagbuhat sa mas maayo ug mahimong mas maayo ug aron mosunod sa tambag sa atong buhi nga mga propeta. Nanghinaut ko nga inyong nabati ang tinguha sa pagpalig-on sa inyong mga pasalig nga mahimo gayud nga tawo nga maoy gusto sa Dios diin kamo giorden nang daan nga mamahimo.

“Mga kaigsoonan [ug sa mga sister], kita dili ba mopadayon sa hilabihan nga mahinungdanon nga katuyoan? Padayon ug ayaw pagsibug. Pagmaisugon, … ug sa kanunay, ngadto sa kadaugan! … Kita kinahanglan, busa, ingon nga usa ka simbahan ug usa ka katawhan, ug ingon nga mga Santos sa Ulahing mga Adlaw, mohalad ngadto sa Ginoo og usa ka halad sa pagkamatarung” (D&P 128:22, 24).

Unsa kaha kana nga halad nga ikahatag ninyong matag indibidwal ngadto sa Dios? Mao kana ang usa ka gasa nga wala niya i-require gikan kaninyo. Mao kini ang halad sa inyong kabubut-on nga kamo motugyan sa Iyang kabubut-on. Mao kini ang pagbutang sa inyong mga kabubut-on sa altar sa personal nga pagsakripisyo.

Usa sa Lectures on Faith, naandam pinaagi sa mga nag-unang Kaigsoonan niining dispensasyon, namahayag: “Ang relihiyon nga wala magkinahanglan og sakripisyo sa tanang butang wala gayuy igong gahum sa pag-ugmad og pagtuo nga kinahanglan sa kinabuhi ug kaluwasan.”⁵

Ang inyong kabubut-on mao ang usa ka butang nga tinuod inyoha nga inyong mahatag isip usa ka halad ngadto sa Dios. Pinaagi sa pagboluntaryo sa inyong kabubut-on ngadto sa Iyang kabubut-on, kamo mahimong sama Kaniya.

Motapos ko uban sa akong pagsaksi sa Manluluwas. Hangtud sa punto nga kamo mopakita og hugot nga pagtuo kang Jesukristo, motugyan sa inyong kabubut-on ngadto sa kabubut-on sa Dios, mosunod sa tambag sa Iyang mga propeta, ug motuman sa mga pag-aghat sa Espiritu, kamo mahimong matinud-anon, malipayon, ug malampuson.