Mangutana

Santiago 1:5–6

Stephen W. Owen

Kinatibuk-ang Presidente sa Young Men

Bonnie L. Oscarson

Kinatibuk-ang Presidente sa Young Women

“Ug kon aduna man kaninyoy nakulangan og kaalam, papangayoa siya sa Dios nga nagapanghatag ngadto sa tanang mga tawo sa madagayaon gayud ug sa walay pagpamoyboy; ug kini igahatag kaniya.

“Hinoon kinahanglan nga mangayo siya uban sa pagtuo, sa walay pagduha-duha. Kay siya nga nagaduha-duha sama sa balud sa dagat nga ginahandus ug ginakoso-koso sa hangin.”

Santiago 1:5–6

Ngano man nga gipili kini nga tema, ug unsa man ang kahulugan niini nganha kanimo? Si Brother Stephen W. Owen, Kinatibuk-ang Presidente sa Young Men, ug si Sister Bonnie L. Oscarson, Kinatibuk-ang Presidente sa Young Women, mipakigbahin sa ilang mga hunahuna.

Nganong kini man nga kasulatan?

Sister Oscarson: Ang Ginoo nasayud unsa nga mensahe ang inyong gikinahanglan, ug talagsaon kini kon sa unsang paagi ang ubang mga isyu nga miabut atol sa tuig gitubag sa tema ug sa unsang paagi kini mihaum sa unsay nanghitabo sa inyong kinabuhi.

Sa among paghisgut sa Santiago 1:5–6 isip maoy posibilidad alang sa tema karong tuiga, ang Espiritu milukop sa kwarto. Ug tanan kami nagkasinabut nga kini mahimong labing nindot nga kasulatan alang sa atong mga kabatan-onan tungod kay kini adunay daghang koneksyon. Kini adunay mga koneksyon sa kasaysayan sa Simbahan—mao kini ang kasulatan nga gibasa ni Joseph Smith nga nagdasig niya sa pag-adto sa sagrado nga kakahoyan ug mag-ampo. Ug ang ikaduhang dakong koneksyon mao nga kini nagpamatuod sa balaan nga misyon ni Joseph Smith, usa ka butang nga atong gikinahanglan sa panahon nga ang iyang reputasyon ug ang kasaysayan sa Simbahan padayon nga gidudahan sa kalibutan. Mensahe usab kini kon unsaon nato pagdawat og personal nga pagpadayag sa atong kinabuhi, diin ang tanan kinahanglan nga masayud

Brother Owen: Daghan pa kaayo ang padayong manghitabo sa inyong kinabuhi karon, ug daghan pa kaayo kamo og mga pangutana. Sa tanan nga social media ug search engines nga anaa nato karon, adunay daghang kapanguhaan diin makakuha ka og mga tubag alang sa inyong mga pangutana sa hugot nga pagtuo. Kini nga importante nga kasulatan nagpakita sa proseso sa pagpadayag ni Joseph Smith, nga maoy modelo nga atong sundon.

Unsaon sa kabatan-onan pag-personalize ug paggamit sa Santiago 1:5–6?

Sister Oscarson: Kini nga kasulatan adunay mahinungdanon nga mensahe. Nag-ingon kini, “Mangayo uban sa pagtuo, sa walay pagduhaduha” (Santiago 1:6). Kini makapaguol. Kinahanglan kamo mangayo uban sa hugot nga pagtuo, dili magduha-duha.

Brother Owen: Ug ang pagpangutana inubanan sa hugot nga pagtuo nagpasabut nga mangutana uban ang tinuod nga katuyoan. Sa dihang si Joseph Smith nakadawat sa tubag kon asa nga simbahan mopasakop, wala lang siya moingon nga, “Nan, maayo kana nga mahibaloan, hinoon …” Siya mipadayon inubanan sa hugot nga pagtuo.

Sister Oscarson: Hinumdumi nga ang matarung nga pag-ampo dili ang pagpangayo sa atong gikinahanglan apan pagpangita unsa ang gusto sa Dios alang kanato.

Unsa nga tambag ang inyong mahatag sa mga kabatan-onan kabahin sa paggamit sa pag-ampo sa ilang mga kinabuhi?

Sister Oscarson: Batasana kini. Kamo dili makalimot niini. Kamo dili makapasagad niini. Ang igsoong lalaki ni Jared mihatag kanato og ehemplo niana (tan-awa sa Ether 2:14).

Brother Owen: Ang paghikalimot sa kanunay nga pag-ampo usa ka butang, apan ang mas makapasubo mao ang pagtalikod gikan sa Ginoo ug ang pagkadili ganahan nga mag-ampo. Kon kamo mobati nga dili kamo kinahanglan nga mag-ampo, mao kana ang higayon nga kinahanglan gayud kamong mag-ampo. Ug kon kamo nag-ampo ug nagbasa sa mga kasulatan, kamo nahiangay sa espiritu. Ug kon kamo wala, gipahilayo ninyo ang inyong kaugalingon.

Sister Oscarson: Makaistorya kita direkta sa Dios. Siya walay ibutang nga kinutuban. Nindot kini nga gasa nga mahibalo nga makahimo kita niini ug nga Siya kanunay nga anaa.

Giunsa ninyo pagkat-on sa pag-ampo nga makahuluganon?

Sister Oscarson: Wala koy mahunahunaan nga kasinatian; kinatumyan kini sa tibuok kinabuhi. Ang pag-ampo nahimo na nga usa sa pinakamahuluganon nga bahin sa akong adlaw tungod kay naningkamot ko nga magmakanunayon. Nahimo akong mas maayo sa pagpaminaw ug pagdawat og mga tubag. Makat-on kita ug mahimo kitang mas maayo kon buhaton nato kini. Gikinahanglan lamang ang pagmakanunayon niini sa matag adlaw, maniguro nga dili ko makapalta sa kahigayunan nga makigsulti sa akong Langitnong Amahan. Kon kanunay kitang mag-ampo, mas momaayo ang atong pagpaminaw sa mga tubag.

Brother Owen: Sa akong pagkabatan-on kon gusto gayud akong mahibalo og usa ka butang, makahinumdom ko sa Unang Panan-awon ug maghunahuna, “Si Joseph Smith mihimo niini. Wala ako magkinahanglan og dako nga padayag, apan nagkinahanglan ako og tubag.” Ug mao sa hugot nga pagtuo gisunod nako ang sundanan. Nahinumdum ko nga miluhod ug miduko sa akong ulo ug nag-ampo og kusog. Ang padayon nga pagsunod niana nga sundanan nakapanalangin sa akong kinabuhi sa makadaghan sa pagdawat og personal nga pagpadayag.

Unsa man ang usa ka pinaka importanting mga butang nga makat-unan sa mga kabatan-onan gikan niini nga kasulatan?

Brother Owen: Gusto lang nako nga hatagan og gibug-aton ang sundanan sa pag-ampo nga gibuhat ni Joseph Smith. Sa edad lang nga 14 anyos, nalibug siya, mao nga mibasa siya sa mga kasulatan. Ang Unang Panan-awon dili lang hamubo nga higayon diin si Joseph miluhod. Daghan kaayo ang gibuhat sa wala pa kadto. Balik-balik siyang namalandong sa iyang pangutana. Sa dihang iyang nahibaloan sa Santiago 1:5–6, siya miingon, “Wala pay bisan unsa nga tudling sa kasulatan nga mituhop uban sa labaw nga gahum ngadto sa kasingkasing sa tawo kay sa nahimo niini nga panahon ngari kanako.” (Joseph Smith—Kasaysayan 1:12). Mituhop kini uban sa hilabihan nga gahum sa iyang kasingkasing, ug dayon iya kining gibuhat. Nag-ampo siya uban sa tinuod nga katuyoan ug mipadayon sa unahan sa hugot nga pagtuo. Ug mao kana ang among gitinguha nga inyong mabati niini nga kasulatan sa tibuok 2017.