Mga Tubag gikan sa mga Lider sa Simbahan

Unsaon sa Pagpakigbahin sa Ebanghelyo

Ni Elder M. Russell Ballard

Sa Korum sa Napulog Duha ka mga Apostoles

Gikan sa usa ka pakigpulong sa Abril 2000 nga kinatibuk-ang komperensya.

Dili kita kinahanglan mangayo og pasaylo alang sa atong pagtuo o mosibug sa atong nahibaloan nga tinuod. Apan kita mahimong mopakigbahin niini diha sa diwa sa mahigugmaong pagsabut—walay kahadlok ug kamasaligon, uban ang bug-os nga tinguha ngadto sa himaya sa Dios—sa walay pagpamugos sa atong mga tigpaminaw o pagbati nga kita napakyas sa atong katungdanan kon sila dili dayon modawat sa unsay atong gituohan.

Kon anaa kanato ang pakig-uban sa Espiritu Santo, makahimo kita og yano nga mga butang aron sa pagtabang nga mahatag ang mas maayo nga pagsabut sa ebanghelyo ngadto sa kinabuhi niining mga dili kaayo aktibo nga mga miyembro sa Simbahan ingon man kadtong dili sakop sa atong pagtuo. Wala kinahanglana ang bisan unsang bag-o nga programa sa paghimo niini. Wala kita magkinahanglan og handbook o usa ka calling o miting sa pagbansay. Ang bugtong gikinahanglan mao ang maayong mga miyembro sa Simbahan nga makat-on sa pagsalig sa gahum sa Espiritu Santo ug, uban niining gahum, motabang ug motandog sa kinabuhi sa mga anak sa atong Langitnong Amahan. Wala nay laing mas molabaw pa nga sebisyo nga atong mahatag kay sa pagpakigbahin sa atong personal nga mga pagpamatuod ngadto sa nagkulang sa pagsabut sa gipahiuli nga ebanghelyo ni Jesukristo.

Busa, mga kaigsoonan, andam na ba kita sa pagbuhat og usa ka butang? Mahimo bang mag-usab kita karon sa pagpadugang sa atong personal nga espirituhanong pagpangandam pinaagi sa pagtinguha sa giya sa Espiritu Santo ug dayon, uban sa Iyang gahum isip atong kompanyon, mopanalangin og mas daghan sa mga anak sa atong Amahan uban sa pagsabut ug kahibalo nga ang Simbahan tinuod?

Ako mopamatuod nga ang Manluluwas buhi ug Siya mopanalangin sa matag usa kanato kon buhaton nato ang tanan sa pagpadayon niining talagsaong buhat sa Iyang Simbahan. Hinaut nga ang matag usa kanato modesisyon sa paghimo og butang nga mas labaw pa.

Giunsa Ninyo Kini sa Paggamit?

Mapasalamaton kaayo ko nga gipadako ako diha sa Simbahan. Ganahan ko nga mopakigbahin sa ebanghelyo, ug maningkamot sa pagpakita og maayong ehemplo, tungod kay nasayud ko nga ang akong mga higala ug ang uban nagtan-aw kanako, ilabi na ang akong Langitnong Amahan. Walay butang nga inyong gibuhat nga palabyan o ibaliwala ra sa atong Amahan sa Langit. Kinahanglan gayud nga maningkamot kamo sa pagbuhat og husto ug mopakigbahin sa ebanghelyo uban sa Iyang mga anak, tungod kay anaa ang walay kinutuban nga gidaghanon sa mga oportunidad sa pagbuhat niana; kinahanglan lang gayud kamong mag-ampo aron makit-an ug magamit kana nga mga oportunidad.

Chari G., Arkansas, USA