Te ʼanaʼana nei ʼo Star
Tē ora nei te ta’ata pāpa’i i Colorado, Marite.
« It’s nice to be here with you in Primary » (Children’s Songbook, 254).
’Ua huti Star i tōna ’ahu. E mea huru ’ē roa ’ia ʼōʼomo i te hōʼē ’ahu roa i te fare pureraʼa. I tāna fare pureraʼa tahito e ʼōʼomo te mau tamāhine i te mau piripou ’āvae roa ’aore rā te mau piripou poto i te mahana sābati. ’Aita rā i roto i tāna fare pureraʼa ʼāpī. ’Ua bāpetizohia ʼoia e tōna māmā ’aita i maoro aʼenei i roto i te ʼĒkālesia ʼa Iesu Mesia i te Feiā Moʼa i te mau Mahana Hopeʼa nei.
’Ua autā ihora Star ’a hiʼo ai ʼoia i roto i te hiʼo. ’Ua ʼoaʼoa ʼoia i te haere i te fare pureraʼa nō te taime mātāmua ’ei melo mau, ’ua taiā atoʼa rā ʼoia. Nā mua atu, ’ua pārahi ʼoia i piha’i iho i tōna māmā i te tāʼātoʼaraʼa ʼo te taime i te fare pureraʼa. I teie rā taime e haere ʼoia i te Paraimere.
’Ua hiʼo atu ʼoia iāna iho i roto i te hiʼo. E mai te mea e’ita ʼoia e fāri’i-maita’i-hia ? E mai te mea e’ita te tahi atu mau tamariʼi e au iāna ?
« Star ? ’Ua ineine ’oe ? ’Ua piʼi mai māmā.
’Ua pou aʼera Star. « E mea maitaʼi tōʼu hiʼoraʼa ? » ’ua ani ʼoia.
’Ua ʼataʼata māmā. « E mea hāviti ’oe ».
’Ua fāita aʼera Star i tōna ʼutu. « E tiʼa ia ’oe ’ia parau i te reira. ʼO ’oe tōʼu māmā ».
« Ua tano ’oe. E tiʼa iāʼu ’ia parau i te reira. Nō te mea e parau mau ».
’Ua ʼatariʼi Star. E raveʼa tā māmā nō te faʼaʼoaʼoa ia Star. Tē vai noa rā te tahi mau manaʼo taiā i roto iāna. E mai te mea ē e’ita roa te tahi atu mau tamariʼi e hinaʼaro i te paraparau iāna ? E hoa tōna i te fare haʼapiʼiraʼa, e ʼere rā rātou i te melo nō tāna ʼēkālesia ʼāpī. ’Ua hinaʼaro ʼoia ʼahani tē vai ra te hōʼē noa aʼe hoa o te haere i te pureraʼa nā muri iāna.
« Tē haʼamanaʼo nei au i te tahi mea e tiʼa iāʼu ’ia rave », ’ua parau atu ʼoia i tōna māmā.
’Ua horo atu ʼoia i niʼa ’e ’ua tūturi i pihai iho i tōna roʼi. « Te Metua here i te Ao ra, ʼa tauturu mai na iāʼu ’ia noaʼa tōʼu mau hoa. Tē tiʼaturi nei au ē e parau mau te mau mea tā te mau misiōnare i haʼapiʼi, ’ua riʼariʼa rā vau ».
’Ua faʼaea Star i niʼa i tōna nā turi ʼāvae ’e ’ua faʼaroʼo. I muri aʼe i te tahi taime ’ua ʼite ʼoia i te hōʼē manaʼo maitaʼi ’e te hau, ’e ’aita ʼoia i taiā faʼahou.
I te fare pureraʼa ’ua pārahi Star ’e ’o māmā i piha’i iho i te hōʼē ʼutuāfare e toru tamāhine iti. ’Ua faʼaʼite mai te mau metua e ʼo vai rātou ’e ’ua haʼamata i te paraparau ia māmā hou ʼa haʼamata ai te pureraʼa. ’Ua tauturu Star i te mau tamāhine ’ia peni i te hōʼē hōhoʼa ʼo Iesu.
’Ua haere mai te ’episekōpo Andrews e fārerei ’ia rāua. « E te tuahine Cunningham ! Star ? E mea maita’i ’ia ʼite atu ia ʼorua i teie mahana ». ’Ua ʼataʼata ʼoia ’e ’ua aroha rima mai ia rāua. ’Ua moʼehia ia Star te maitaʼi ʼo te taʼata atoʼa i te fare pureraʼa. Peneiaʼe e noaʼa te hōʼē hoa iāna i te hopeʼa.
I muri aʼe i te pureraʼa ʼōroʼa ’ua haere atu Star i te Paraimere. ’Ua hiʼo ʼoia i te tahi atu mau tamariʼi ma te taiā ’a pārahi ai ʼoia. Tā paraparau ra rātou te tahi i te tahi ’e e au ra ’aita rātou i tāuʼa mai iāna. ’Ua ʼoto te ʼāʼau o Star. ’Ua faʼaea noa ʼoia anaʼe.
I reira ’ua tomo mai ra te hōʼē tamāhine mai te fāito matahiti ʼo Star. « E huru taiā tōna », manaʼo aʼera Star. « E nehenehe tāʼu e haere e paraparau iāna ».
’Ua huti hōhonu ihora ʼoia i te aho e haere atu ra i taua tamāhine ra. « Iaorana, ʼo Start tōʼu iʼoa E mea ʼāpī au. E hina’aro ānei ’oe e pārahi i piha’i iho iāʼu ? » ’Ua faʼaea aʼera Star i te huti i tōna aho. E hinaʼaro ānei teie tamāhine ’ia riro ’ei hoa nōna ?
’Ua ʼataʼatari’i aʼera teie tamāhine. « O Sarah vau. E mea ʼāpī atoʼa vau. ’Ua tae mai tōʼu ʼutuāfare nā Ontario mai ».
« ’Ua bāpetizohia tōʼu māmā ’e ʼo vau e piti hepetoma i teie nei », ’ua parau atu o Star. « ’Aita vau i pāpū roa e aha te tiʼa iāʼu ’ia rave.
’Ua rahi roa atu te mata ʼataʼata ʼo Sarah. « E feruri ’āmui ïa tāua i te reira ».
’Ua pārahi Star ’e ’o Sara ’e tā rāua piha haʼapiʼiraʼa. ’Ua haru Star i te tahi taime i te mata o Sarah ’e ’ua ʼata. ’Ua ʼata mai o Sarah. ’Ua ’ite Star i te hau ’e te ʼoaʼoa. ’Ua ʼite ʼoia ē ’ua pāhono mai te Metua i te Ao ra i tāna pure ’e ’ua tauturu iāna ’ia ʼimi i te hōʼē hoa.
I roto i te piha haʼapiʼiraʼa ’ua ani te ’orometua haʼapiʼi ia Star ’e ia Sarah ’ia faʼaʼite ē ʼo vai rāua.
’Ua tiʼa mai o Star. « ʼO Star Cunningham tōʼu iʼoa. ’Ua bāpetizohia tōʼu māmā e ʼo vau nei e piti hepetoma i teie nei ». ’Ua faʼaea ʼoia, ma te hōʼē mata ʼataʼata ’a hiʼo ai ʼoia i tōna ra hoa ʼāpī. « ’E teie tōʼu hoa ʼo Sarah ».