Tae atu i te taime e fārerei faʼahou ai tātou
Te mana ʼo te Atua
Nō roto mai i te hōʼē aʼoraʼa i roto i te ’āmuiraʼa rahi nā te autahuʼaraʼa tei topahia « Te haʼapiʼiraʼa tumu ʼa te Autahuʼaraʼa », Ensign, Me 1982, 32–34; ’ua faʼatanohia te pāpaʼiraʼa.
Te faʼaroʼo ʼo te mana ïa ’e te mana ʼo te autahuʼaraʼa ïa.
Te ’Oire ʼo Ziona i tāhiti-’ē-hia, nā Del Parson
E Atua te Atua nō te mea e faʼahōhoʼaraʼa ʼOia nō te tāʼātoʼaraʼa o te faʼaroʼo e ʼo te mana e ʼo te autahuʼaraʼa. Te oraraʼa Tāna e ora nei ʼo te ora mure ʼore ïa.
’E te huru e riro ai tātou mai Iāna ra te huru tei te huru ïa e noaʼa ai ia tātou Tōna faʼaroʼo, e roaʼa ai ia tātou Tōna mana, e faʼaohipa ai tātou i Tōna ra autahuʼaraʼa. ’E ’ia riro ana’e tātou mai Iāna te huru i roto i te ’īra’a ’e te aura’a mau, i reira e fāriʼi atoʼa ai tātou i te ora mure ’ore.
E haere ʼāpipiti te fa’aro’o ’e te autahu’ara’a. Te faʼaroʼo ʼo te mana ïa ’e te mana ʼo te autahuʼaraʼa ïa. ’Ia roaʼa anaʼe ia tātou te faʼaroʼo, e fāriʼi tātou i te autahuʼaraʼa. I reira, nā roto i te autahuʼaraʼa, e tupu rahi tātou i roto i te faʼaroʼo e tae roa atu, te fāri’ira’a i te tā’āto’ara’a o te mana, e riro mai tātou mai tō tātou ra Fatu.
’Ua faʼataʼahia tō tātou taime i ’ō nei i roto i te tāhuti nei ’ei hōʼē taime nō te hiʼopoʼaraʼa ’e nō te tāmataraʼa. E haʼamaita’iraʼa nō tātou ʼa ora ai tātou i ’ō nei nō te haʼamaitaʼi a’e i tō tātou faʼaroʼo ’e ’ia tupu rahi i roto i te mana nō te autahuʼaraʼa…
’Ua haʼamaitaʼi rahi te autahuʼaraʼa moʼa i te mau taʼata i te tau nō Enoha hau atu i te tahi ’ē atu tau. Tei matauhia i taua taime ra mai te haʼapaʼoraʼa ’a Enoha (hiʼo PH&PF 76:57), ʼo te mana ïa i tāhiti-’ē-hia atu ʼoia ’e tōna ra nunaʼa. ’E ua tāhiti-’ē-hia atu rātou nō te mea e faʼaroʼo tō rātou ’e ’ua faʼaʼohipa rātou i te mana ʼo te autahuʼaraʼa.
’Ua rave te Fatu i te hōʼē fafauraʼa mure ʼore ’e o Enoha ē te feiā atoʼa o te fāriʼi i te autahuʼaraʼa e noaʼa ïa ia rātou te mana, nā roto i te faʼaroʼo, ia faʼatere ’e ’ia haʼavī i te mau mea atoʼa i niʼa i te fenua nei, ’ia ’aro atu i te mau nuʼu ʼa te mau nunaʼa, ’e ’ia tiʼa ma te hanahana ’e te faʼateiteiraʼa i mua i te Fatu.
E taʼata ʼo Melehizedeka mai te reira huru faʼaroʼo, « ’e ’ua riro mai tōna nunaʼa ’ei nunaʼa parau-tiʼa, ’e ’ua noaʼa ia rātou te raʼi, ’e ’ua mā’imi rātou i te ’oire ’o Enoha » (’Īritiraʼa a Iosepha Semita, Genese 14:34)…
Nō reira, e aha ïa te haʼapiʼiraʼa tumu a te autahuʼaraʼa ? ’E nāhea ïa tātou ’ia ora mai te mau tāvini ʼo te Fatu ?
Teie haʼapiʼiraʼa tumu ’oia ho’i e taʼata hanahana te Atua tō tātou Metua, te maitaʼi, ’e tei faʼateiteihia, tei iāna te mau pūai atoʼa, te mau mana atoʼa, e te mau faʼatereraʼa atoʼa, tei ʼite i te mau mea atoʼa e tei mure ʼore i roto i Tōna mau maitaʼi atoʼa, ’e tē ora nei i roto i te faʼanahoraʼa ʼutuāfare.
Tē fanaʼo nei tō tātou Metua Mure ʼOre i teie fāito teitei nō te hanahana ’e te maitaʼi ’e te mana nō te mea e mea maitaʼi Tōna faʼaroʼo e mea hope ʼore Tōna autahuʼaraʼa.
Taua autahuʼaraʼa ra ’o te iʼoa iho ïa ʼo te mana ʼo te Atua, ’e mai te mea e tiʼa ia tātou ’ia riro mai Iāna ra te huru, e tiʼa ïa ia tātou ’ia fāriʼi ’e ’ia faʼaʼohipa i Tōna autahuʼaraʼa aore rā mana mai Tāna e faʼaʼohipa nei…
E mana ïa tō tātou, nā roto i te faʼaroʼo, ’ia faʼatere ’e ’ia haʼavī i te mau mea atoʼa, nō te pae tino ’e nō te pae vārua ; ’ia faʼatupu i te mau temeio ’e ’ia haʼamaitaʼi i te mau oraraʼa ; ’ia tiʼa atu i mua i te aro ʼo te Atua ’e ’ia riro mai Iāna ra te huru nō te mea ’ua noaʼa ia tātou Tōna faʼaroʼo, Tōna mau maitaʼi, e Tōna mana, ʼoia hoʼi te ’īraʼa ʼo Tōna autahuʼaraʼa.
Nō reira, teie ïa te haʼapiʼiraʼa tumu ʼo te autahuʼaraʼa, e ’aita ïa e ʼohipa rahi aʼe. Teie te mana e nehenehe e noaʼa ia tātou nā roto i te faʼaroʼo ’e te parau-tiʼa…
ʼOia mau, tē vai nei te mana i roto i te autahuʼaraʼa—te hōʼē mana tā tātou e tūtava nei ’ia noaʼa nō te faʼaʼohipa, te hōʼē mana tā tātou e pure itoito nei ’e ’ia pārahi mai i niʼa iho ia tātou ’e i niʼa iho i tō tātou huā’ai e a muri noa atu.