Te reo ʼo te Feia Mo’a i te mau mahana hopeʼa nei
Te pute moni tei mo‘e
Fa’ahōho’ara’a nā Wilson Ong
ʼAita i maoro aʼenei ’ua haere atu vau i roto i te hōʼē fare ʼāpī ’e ’ua ani i te tahi mau melo nō te ʼĒkālesia ’ia tauturu iāʼu nō te hōʼē ʼōpuaraʼa i tōʼu fare. I ropu i te ʼopuaraʼa, ’ua haere atu vau nō te hoʼo mai i te tahi mau materia i hinaʼarohia e mātou nō te faʼaoti i te ʼohipa. I muri aʼe i tō mātou faʼaotiraʼa i te ʼohipa, ʼite aʼera vau e ʼaita tāʼu pute moni. ’Ua riʼariʼa vau nō te mea tei roto i tāʼu pute moni te mau parau atoʼa ’e te moni tāʼu i fāriʼi nā te hōʼē hōani i taua poʼipoʼi ra. ’Ua hoʼi faʼahou vau i te vāhi i reira tōʼu hoʼoraʼa mai i te mau tauhaʼa ’aita rā i manuia. ’Ua hoʼi atu vau i te fare ’e ’ua māʼimi nō te hiʼo e ’aita ānei au i faʼatopa i te reira i te tahi vāhi, ʼaita rā i ʼitehia mai. ’Ua haʼamata vau i te feruri i te hāmani faʼahou i te mau hōhoʼa nō te mau parau atoʼa. I reira hou ʼa faʼaru’e ai au i tōʼu fare, ’ua ani mai te hōʼē hoa, « ’ua pure ānei oe ? »
’Ua manaʼo ihora vau, « ’oia mau ’ua pure aʼena vau ! »
ʼAita rā vau i pure ma te manaʼo pāpū. ’Ua hinaʼaro rā vau e faʼahepo i tōʼu hinaʼaro i niʼa i te Metua i te Ao ra ’e Nāna aʼe te hōpoiʼa ’ia tauturu iāʼu ’ia ’imi i tāʼu pute moni. I reira ’ua haʼamanaʼo rā vau i te pāpaʼiraʼa moʼa i roto i te Isaia 55:8 : « E ’ere ho‘i tō’u ra mana‘o i tō ʼoutou ra mana‘o, e ʼere ho‘i tō ʼoutou ra haereʼa i tō’u ra haereʼa, te nā reira maira Iehova ».
I te sābati ’ua haere atu vau i te fare pureraʼa, ’e ’ua parau mai te hōʼē melo tei haere mai na muri iāʼu inanahi ra ē ’ua pure ʼoia ma te pūai i te Metua i te Ao ra ’e ’ia nehenehe iāʼu ’ia ʼite i tāʼu pute moni. ’Ua parau ʼoia ē ’ua ʼite ʼoia ē e ’itehia iāʼu. I muri mai, ’a pārahi ai au nō tāʼu iho tuatāparaʼa, ’ua haʼamata vau i te taiʼo i te Fariʼiraʼa i te mau pāhonoraʼa i tā tātou mau pure nā Elder Gene R. Cook, e melo hope nō te Hitu ʼAhuru. Tē faʼatiʼa nei te ʼapi mātāmua i te hōʼē ʼāʼamu e te hōʼē ā fifi e tōʼu : ’Ua moʼe te pute moni ʼa te tamaiti a Elder Cook, nō reira ’ua haʼaputuputu te ʼutuāfare ’e ’ua pure i te Fatu ’ia itehia ia rātou te pute moni.
I muri aʼe i tōʼu taiʼoraʼa i taua ʼāʼamu ra, ’ua faʼaʼohipa vau i te mea tāʼu i haʼapiʼi mai ’e ’ua haʼaputuputu vau i tāʼu vahine faʼaipoipo ’e te mau tamariʼi. ’Ua tūturi mātou i roto i te hōʼē haʼamenemeneraʼa, ’e ’ua pūpū tātaʼitahi mātou i te hōʼē pure, tāparuraʼa i te Fatu ’ia tauturu ia mātou ’ia ʼitehia mai te pute moni mai te au i Tōna ra hinaʼaro.
’Ua ʼite au na mua atu i te mana ʼo te pure, i muri aʼe ra, ’a pure ai au ʼo vau anaʼe, ua ani au i te Metua i te Ao ra ’ia pāhono i tā mātou pure nō te haʼapūai i te faʼaroʼo ’o tā’u vahine fa’aipoipo ’e te mau tamariʼi.
I te mahana i muri mai ’ua niuniu mai te hōʼē taʼata iāʼu. ’Ua parau ʼoia ē ’ua ʼitehia e ana tāʼu pute moni, ’e te moni atoʼa. Ua taʼi au mai te hōʼē tamariʼiriʼi nō te mea ’ua pāhonohia tā’u pure ’e ’ua haʼapūaihia te faʼaroʼo ’o tō’u ’utuāfare.
’Ua ʼite au e pāhono te Metua i te Ao ra, noa atu te rahiraʼa tamariʼi e tiʼa Iāna ’ia haʼapaʼohia, ia tātou tātaʼitahi mai te au i Tāna tālena ’e Tāna huru raveraʼa.