’Ua ʼite mata rātou Iāna
Ua ʼite mau teie mau taʼata i te Faʼaora tei tiʼafaʼahou, e nehenehe atoʼa rā ia ʼoutou ’ia riro ’ei ʼite nō te Mesia nā roto i tā ʼoutou iho raveraʼa.
’Ua tiʼa mai ʼOia, nā Greg K. Olsen, e’ita e nehenehe e nene’i
I tō ʼoutou feruriraʼa e aha ïa te huru ’ia riro ’ei ʼite nō te Faʼaora tei tiʼafaʼahou ? Nō te mau rahiraʼa hanere taʼata i te tau o Iesu, ’aita rātou i feruri noa i te reira—’ua ora rātou i te reira. Tē faʼahiti nei te mau pāpaʼiraʼa moʼa e hōʼē aʼe tātini taime tei pāpaʼihia i roto i te Faufaʼa ʼĀpī ’e e rave rahi atu ā i roto i te Buka ʼa Moromona i te fāra’a atu te Fatu tei tiʼafaʼahou i te nunaʼa. ’Ua ʼite teie mau taʼata i te hōʼē ʼo te mau temeio faʼahiahia roa aʼe i roto i te ʼāʼai : ’Ua haʼavī Iesu Mesia i te pohe i nehenehe ai ia tātou tātaʼitahi ’ia ora faʼahou mai. E mea huru māere, e ʼere ānei ?
Nō reira e aha ïa te auraʼa mau ’ia riro ’ei hōʼē ʼite nō te Mesia ? E hiʼo na tātou i te tahi o teie mau taime i roto i te mau pāpaʼiraʼa moʼa ’e ʼa feruri na e nāhea tātou e nehenehe ai e riro ’ei mau ʼite nō te Mesia, noa atu e ʼaita tātou i ʼite mata atu Iāna.
Maria Magadala
O Maria Magadala te ʼite mātāmua. I te poʼipoʼi sābati i muri aʼe i te Faʼasātauroraʼa, ’ua haere atu ʼoia i te mēnema e te tahi atu mau vahine nō te faʼatāhinu i te tino ʼo te Fatu. I tōna ʼiteraʼa i te hōʼē mēnema ’aita e taʼata, ’ua ʼoto aʼera Maria. ’Ua haʼafātata mai te hōʼē taʼata nā muri mai iāna e ’ua parau mai ra, « e tera ra vahine, e aha ’oe i ʼoto ai ? » ’A feruri na i tōna hitimahuta i tōna ʼiteraʼa ē ʼo Iesu, tei tiʼafaʼahou mai mai te pohe mai. (Hi‘o Ioane 20:1–3.)
Nā pipi e piti i niʼa i te porōmu nō Emausa
Te porōmu nō Emausa, nā Jon McNaughton
Tē haere ra o Keleopa e te tahi atu pipi nā niʼa i te porōmu nō Emausa ’a ’ati atoʼa maira te hōʼē taʼata ʼeʼē ia rāua. ’Aita rāua i ʼite ʼo vai tō rāua hoa ʼāpī, i roto rā i tā rātou tamāʼaraʼa i te ʼāruʼi, ’ua vāhi te taʼata ʼeʼē i te pane. I reira ua ʼaraʼara aʼera tō rāua nā mata, ’e ’ua ʼite aʼera rāua ē ’ua ’āpeʼe noa nā te Faʼaora ia rāua nā niʼa i te aratiʼa. « E ʼere i ʼanaʼanatae tō tāua ʼāʼau iāna… ? » ’ua ui aʼera rāua te tahi i te tahi, ma te feruri i te haʼapāpūraʼa tā rāua i ʼite ē ’ua pārahi mau ʼOia ia rāua ra. (Hiʼo Luka 24:13–34.)
Nā ʼāpōsetolo hōʼē ’ahuru
’A hiʼo i Tōʼu mau rima ’e te ʼāvae, nā Harry Anderson
’Ua hoʼi nā pipi e piti tei haere i Emausa ’e te Mesia i Ierusalema ’e ’ua parau i nā hōʼē ’ahuru ʼāpōsetolo nō niʼa i te ʼohipa tei tupu ia rāua. ’A paraparau ai rāua, ’ua fā maira te Faʼaora Iho ia rātou, i te nā-’ō-raʼa ē, « A hi‘o mai nā i tāʼu rima ’e tāʼu avae ; ʼo vau mau ā ; ʼa fāfā mai na ’ia ʼite ; ’aita ʼo te vārua e i‘o ’e te ivi mai to’u nei, tā ʼoutou e hi‘o mai nei ». (Hi‘o Luka 24:36-41, 44-49).
Te ʼāpōsetolo Toma
hōhoʼa peni nō Toma nā Brian Call
’Aita te ʼāpōsetolo Toma i reira i te taime ’a fā mātāmua mai ai te Faʼaora i te tahi atu mau ʼāpōsetolo, nō reira aita ʼoia i tiʼaturi ē ’ua tiʼafaʼahou mai te Mesia. Hōʼē hepetoma i muri iho, ’ua fā faʼahou mai te Mesia i te mau ʼāpōsetolo. I teie taimetei reira oToma, ’e nō te mea hoʼi ē ’ua ʼite mata atu ʼoia i te Mesia, ’ua tiʼaturi ʼoia e ’ua tiʼafaʼahou mai ʼOia. ’Ua faʼaara te Faʼaora ia Toma nō niʼa i te tiʼaturiraʼa i muri noa aʼe i te ʼite-mata-raʼa : « Nō te mea te hi‘o mai nei ’oe iā‘u, e Toma, i faʼaroʼo ai ’oe : E ao tō te feiā ʼaore i ’ite iā‘u e faʼaroʼo mai ai ». (Hi‘o Ioane 20:24–29.)
Nā ʼāpōsetolo e hōʼē ’ahuru ma hōʼē i te miti nō Tiberia
Te Mesia tei Tiʼafaʼahou i te miti nō Tiberia, nā David Lindsley
I te hōʼē mahana ’aita i maoro roa i muri aʼe i te Tiʼafaʼahouraʼa, ’ua haere e rave rahi mau ʼapōsetolo e ravaʼai i te miti nō Tiberia e ’aita rā i manuia rahi. I te poʼipoʼi aʼe, ’ua fā maira te Faʼaora e parau atura ia rātou ’ia tuʼu i te ʼūpeʼa i te pae ’atau ʼo te pahī. I tō rātou tuʼuraʼa atu, e ’aita i maraʼa ia rātou ’ia ’ume mai te ʼūpeʼa nō te rahi ʼo te iʼa ! I muri aʼe i tō rātou ’amu-’āmui-raʼa i te māʼa, ’ua haʼapiʼi te Fatu nō niʼa i te utuuturaʼa ia vetahi ’ē, i te nā-’ō-raʼa ē, « ’a faʼaamu i tāʼu mau mamoe ». E hōroʼa te mau ʼāpōsetolo i te toeʼa ʼo tō rātou oraraʼa i te raveraʼa i te reira—te haʼapiʼiraʼa i te taʼata nō niʼa i te Mesia—’e i te tahi taime, ’ua hōroʼa atoʼa rātou i tō rātou iho ora nō teie tumu. (Hi‘o Ioane 21:1-22).
Te ’āti Nephi i Amerika
Hō’ē tia‘i māmoe,nā Howard Lyon
I te taime nō te Faʼasātauroraʼa, ’ua vāvāhihia te fenua Amerika e te mau ’āueueraʼa fenua, te mau ’ati auahi, ’e te tahi atu mau ’ati fenua, ’e e toru mahana pōuri nō te tāpaʼo i te poheraʼa o te Faʼaora. I muri mai, ’ua pou mai te Mesia nā te raʼi mai ’e ’ua fārerei i te nahoʼa rahi taʼata e 2 500 tei haʼaputuputu i piha’i iho i te hiero i Bounetifula. ’Ua anʼi ʼOia i te taʼata ’ia fāfā i te mau tāpaʼo māmae i niʼa i Tōna nā rima ’e te ʼāvae ’e te ʼaoʼao, ’ua aʼo, ’e ’ua haʼamaitaʼi tātaʼitahi i te mau tamariʼi a te ’āti Nephi. ’Ua rahi atu ā te mau taʼata i te mahana i muri mai, ’e ’ua fārerei ’e ’ua haʼapiʼi atu te Faʼaora ia rātou. ’Ua haʼamau ihora te mau pipi i te ʼĒkālesia ʼa te Mesia, ’e nō tō rātou fāriʼiraʼa i te hōʼē ʼiteraʼa pāpū pūai ’ua faʼafāriu-atoʼa-hia mai te ’āti Nephi ’e te ’āti i te Fatu. (Hiʼo 3 Nephi 11–18; hiʼo atoʼa 3 Nephi 8–10 ; 4 Nephi 1.)
Mau ʼite i taua tau ra e i teienei
’Ua fā atoʼa atu te Mesia i te mau taʼata e rave rahi, tae noa atu e rave rahi mau vahine tei haere atu i te mēnema nō te tauturu ia Maria Magadala i te faʼatāhinu i te tino ʼo te Mesia, te hōʼē pupu hau atu i te 500 taʼata, Iakobo ’e Paulo. (Hiʼo Mataio 28:9; Te ʼOhipa 9:4–19; 1 Korinetia 15:6–7 ; hiʼo atoʼa 3 Nephi 19 ; 26:13.)
E’ita paha tātou e fāriʼi i te haʼamaitaʼiraʼa i te ʼite mata i te Faʼaora mai teie nei mau ʼite, e nehenehe rā ʼoutou e riro ’ei hōʼē ʼite nō te Mesia. E nehenehe tā ʼoutou tātaʼitahi e mā’imi i te Faʼaora, mai ia Maria ʼa haere ai ʼoia i te mēnema ra, nā roto i te faʼarahiraʼa i te ʼite nō niʼa Iāna. ’Aore rā e nehenehe tā ʼoutou e faʼaʼohipa i tō ʼoutou faʼaroʼo nā roto i te haʼapaʼoraʼa i te mau faʼaueraʼa e te peʼeraʼa i te aʼo ʼa te mau peropheta. ’Aore rā e nehenehe tā ʼoutou e ʼite i te mau haʼamaitaʼiraʼa a te Faʼaora i roto i tō ʼoutou oraraʼa, mai nā pipi e piti i te haereraʼa i Emausa. I teie tau Pāsa, ’a feruri nō niʼa i te auraʼa ’ei ʼite nō te Mesia. ’Ua riro mau teie mau taʼata ’ei ʼite tei ʼite mau i te Mesia tei tiʼafaʼahou—e ʼere rā te reira ana’e te rāveʼa e nehenehe ai ia ʼoutou ’ia riro ’ei ʼite Nōna i roto i tō ʼoutou oraraʼa.