Te reo ʼo te Feia Mo’a i te mau mahana hopeʼa nei
Please Don’t Play That Song
Faʼahōhoʻaraʼa nā Bradley H. Clark
Te tahi taime aʼenei, ’ua ora vau e tōʼu ʼutuāfare i Veracruz, Mēhiko, i reira tāʼu mau tamariʼi i te haereraʼa i te fare haʼapiʼiraʼa tuatahi. I te mau poʼipoʼi atoʼa ʼa tauturu ai au i tāʼu nā tamariʼi e toru ’ia ineine nō te fare haʼapiʼiraʼa, e faʼaroʼo mātou i te rātio—te rātio au-roa-aʼe-hia i te oire—ma te hōʼē faʼanahoraʼa au maitaʼi e faʼaterehia e te hōʼē taureʼareʼa tāne ʼauvaha rātio.
’Ua haʼamata mātou i te faʼaroʼo i te hōʼē hīmene au maitaʼi i te tariʼa. ʼA haʼamata ai au i te haʼapaʼo maitaʼi atu i te mau paraparau, ’ua ʼite aʼera vau ē e ʼere te mau mea tei parauhia i te mea faufau, e mau parau rā ʼo te faʼatupu i te manaʼo ’ino ’e te parau ʼino.
’Ua parau pāpū atu vau i tāʼu mau tamariʼi, « e’ita e nehenehe ia tātou ’ia faʼaroʼo i teie huru paraparau ». Peneiaʼe ʼaita rātou i haʼapaʼo noa aʼe i te mau parau ʼo te hīmene, ’ua haʼapaʼo maitaʼi rā rātou i te hīmenemene noa i taua hīmene ra.
’Ua ʼite rātou iāʼu i te tūpoheraʼa i te rātio ’e ’ua ani mai iāʼu e aha tāʼu e rave ra. « E ani au i te taʼata auvaha rātio ’ia ’īriti ’ē atu i taua hīmene ra ». Nā tō rātou hitimahuta i faʼaitoito iāʼu ’ia rave atu ā i te tahi ʼohipa.
ʼAita rātou i tiʼaturi i te reira ’e ʼaita atoʼa i nehenehe iāʼu, ’ua rave au i te niuniu ’e ’ua niuniu atu i te fare rātio. ʼAita vau i tiaʼi i te hōʼē pāhonoraʼa, i tōʼu rā māere, ’ua pāhono mai taua iho taʼata auvaha rātio rā tā mātou i faʼaroʼo iho nei i tāʼu niuniu i te reira ihoa taime.
’Ua parau atu vau iāna ē ʼaita vau i fāriʼi i te faʼaroʼoraʼa i taua hīmene ra, nō te mea e rave rahi mau ʼutuāfare e faʼaroʼo nei i te rātio i taua taime i te poʼipoʼi. ’Ua ani mai ʼoia iāʼu e aha ïa tāʼu e manaʼo nō te monoraʼa i te reira, nō tōna huru maitaʼi ’ua ani noa vau ē ’ia ʼore ʼoia e fa’ata’i i taua hīmene ra i te taime tei te fare te mau tamariʼi.
ʼAita roa atu vau i ʼimi e ’ua faʼaroʼohia tāʼu niuniu nā roto i te rātio, ’ua māuruuru rā vau ē ’ua faʼaroʼo mai te taʼata auvaha rātio. ’E i te mau mahana i muri mai, ’ua nehenehe iāʼu ’ia parau ē ’ua faʼatiʼahia tāʼu nei aniraʼa.
Nā te reira ʼohipa i haʼapāpū mai iāʼu ē e tiʼa ia tātou ’ia itoito ’ia vai anaʼe i roto i tō tātou mau rima te mana nō te rave i te mau faʼaotiraʼa ’e ’ia rave i te mea e tītauhia nō tē pāruru i tā tātou mau tamariʼi i te mau mea ’ino. ’Ia nā reira tātou, e nehenehe ïa i te Vārua Maitaʼi ’ia tāmau noa i te riro ’ei hoa tāmau nō tātou.