Te Tāraʼehara ʼa te Faʼaora : Te niu nō te faʼaroʼo KERESETIĀNO mau
Nō roto maʼi i te hōʼē aʼoraʼa, « Te Tāraʼehara », i hōroʼahia i te haʼapiʼipiʼiraʼa nā te mau peresideni misiōni ʼāpī i te Pū Haʼapiʼipiʼiraʼa Misiōnare nō Provo i te 24 nō tiunu 2008.
E tiʼafaʼahou pāʼātoʼa tātou ’e e riro tātou i te mea tāhuti ʼore maoti te tūsia tāraʼehara ʼa Iesu Mesia.
Getesemane,nā J. Kirk Richards
’Ua anihia i te peropheta Iosepha Semita (1805-44), « E aha ïa te mau parau tumu nō tā ʼoutou haʼapaʼoraʼa ? » ’Ua pāhono ʼoia, « te mau parau tumu nō tā mātou ha’apa’ora’a ʼo te ʼiteraʼa pāpū ïa ʼo te mau ʼāpōsetolo ʼe te mau peropheta, nō ni‘a ia Iesu Mesia, e ’ua pohe ʼOia, ’ua tanuhia, ʼe ’ua ti‘afaʼahou mai i te toru ʼo te mahana, ʼe ’ua haere atu i ni‘a i te ra‘i ; ʼe te tahi atu mau mea atoʼa nō ni‘a i tā mātou haʼapa‘oraa ʼe mau hu‘ahu‘a ana‘e ïa nō te reira ».1
Tē hinaʼaro nei au e hōroʼa i tōʼu reo i te faʼahitiraʼa ʼa te peropheta Iosepha. Te tumu nō te mau mea atoʼa tā tātou e tiʼaturi nei ʼo tō tātou ïa Faʼaora e Tāna tūsia tāraʼehara—« te aroha ʼo te Atua » (1 Nephi 11:16) nā roto i te reira i tono ai te Metua i Tāna Tamaiti i te fenua nei nō te faʼatupu i te Tāraʼehara. Te tumu mau nō te oraraʼa ʼo Iesu Mesia ʼo te faʼatupuraʼa ïa i te tūsia tāraʼehara. Te Tāraʼehara ʼo te niu ïa o te ao keretetiāno mau.
Nō te aha te Tāraʼehara ʼa te Faʼaora i riro ai ’ei parau tumu faufaʼa rahi nō te ʼēvanelia i roto i te ʼĒkalesia ʼe i roto i tō tātou oraraʼa ?
Hīro’a Fa’aro’o 1:3.
Tē parau nei te toru ʼo te Hīroʼa Faʼaroʼo, « te tiʼaturi nei mātou e, nā roto i te Tāraʼehara ʼa te Mesia e tiʼa ai i te taʼata atoʼa ’ia faʼaorahia, nā roto i te haʼapaʼoraʼa i te mau ture ʼe te mau ʼōroʼa ʼo te ʼEvanelia ».
I roto i teie hīroʼa, « faʼaorahia » ʼo te noaʼaraʼa ïa te fāito teitei roa aʼe nō te hanahana i roto i te bāsileia tiretiera. ’Ua hōroʼahia te tiʼafaʼahouraʼa i te mau taʼata atoʼa o te haere mai i niʼa i te fenua nei, nō te fāriʼiraʼa rā i te ora mure ʼore, te tāʼātoʼaraʼa ʼo te mau haʼamaitaʼiraʼa nō te haereraʼa mure ʼore i mua, e tiʼa ïa i te taʼata tātaʼitahi ’ia haʼapaʼo i te mau ture, ’ia fāriʼi i te mau ʼōroʼa, ’e ’ia rave i te mau fafauraʼa ʼo te ʼevanelia.
Nō te aha i nehenehe ai ia Iesu Mesia, ʼe ʼo ʼOia anaʼe, i te aufau i te mau hara ʼa tō te ao nei ? ’Ua noaʼa Iāna te mau tītauraʼa atoʼa.
’Ua here te Atua Iāna ’e ’ua tiʼaturi Iāna.
’Ua fānauhia ʼo Iesu e te mau Metua i te Ao ra i roto i te ao hou teie nei oraraʼa. ʼO ʼOia te Fanau Tahi ʼa tō tātou Metua i te Ao ra. ’Ua māʼitihia ʼOia mai te mātāmua mai ā. ’Ua haʼapaʼo ʼOia i te hinaʼaro ʼa Tōna ra Metua. ’Ua faʼahiti pinepine te mau pāpaʼiraʼa moʼa i te ʼoaʼoa ’o te Metua i te Ao ra nō Tāna Tamaiti.
Tē taiʼo nei tātou i roto i te Mataio, « e inaha, ’o te reo mai ra nō te ra’i mai, i te nā-’ō-ra’a mai ē, Tāʼu Tamaiti here teie, ’ua māuruuru roa vau Iāna » (Mataio 3:17).
’Ua pāpaʼi ʼo Luka, « e te hōʼē reo maira nō roto mai i taua ata ra, i te na-ō-raʼa mai, ʼO tāʼu Tamaiti here teie, ʼa faʼaroʼo iāna » (Luka 9:35).
I te hiero i te fenua nō Bounitifula i muri aʼe i te Tiʼafaʼahouraʼa ʼo te Faʼaora, ’ua faʼaroʼo te taʼata i te reo ʼo te Metua : « Inaha, ʼo tāʼu Tamaiti here, ’ua māuruuru roa vau iāna » (3 Nephi 11:7).
E putapū roa tōʼu ʼāʼau ’ia taiʼo vau ē, ʼa māuiui ai Iesu i roto i te ’ō nō Gesetemane, nō Tōna here rahi ʼe te aroha nō Tāna Tamaiti Fānau Tahi, ’ua tono atu te Metua i te hōʼē melahi nō te tāmāhanahana ’e nō te faʼaitoito Iāna (hiʼo Luka 22:43).
’Ua faʼaʼohipa Iesu i Tōna tiʼamāraʼa nō te haʼapaʼo.
Ecce Homo,nā J. Kirk Richards
’Ua hōroʼa hua Iesu i Tōna ora nō tātou.
I roto i te ’Āpoʼoraʼa rahi i te Raʼi, ’ua parau ʼo Lucifero, « te tamaiti nō te poʼipoʼi » Isaia 14:12 ; PH&PF 76:26-27), i te na-’ō-raʼa ē :
« Inaha, tei ’ō nei au, ʼa tono iā‘u, ʼei tamaiti ho‘i au nā ’oe, ʼe nāʼu e faʼaora i te taʼata atoʼa, ’ia ʼore e mo‘e te hōʼē, ʼe ʼoia mau nāʼu e rave i te reira ; nō reira, ʼa hōro‘a mai iā‘u tō ’oe na tura.
« Inaha rā, ’ua parau maira tāʼu Tamaiti Here, tāʼu i Here i Māʼiti mai te mātāmua mai ā, na ’ō maira—E te Metua, ’ia haʼapaʼohia tō oe hinaʼaro, ʼ nō ’oe te hanahana ʼe ʼa muri noa atu » (Mose 4:1-2 ; hiʼo atoʼa Aberahama 3:27).
Nō te here rahi ’o te tamaiti nō Tōna Metua ’e nō tātou tāta’itahi, ’ua parau ’Oia, « ’a tono iā’u ». I te taime i parau ai ’Oia, « ʼa tono iāʼu », ’ua fa’a’ohipa ’Oia i Tōna tiʼamāraʼa.
« Mai te Metua i ʼite iāʼu nei ra, ʼe ʼo vau hoʼi i ʼite i te Metua ra ; ʼe e hōroʼa hoʼi au i tōʼu ora nō te māmoe …
« I here mai ai tau Metua iā’u, ʼo vau e hōro‘a i tō’u ora, e ʼa rave faʼahou atu ai.
« ’Aore roa e taʼata e riro ai ’ia haru, nā’u ihora e hōro‘a noa atu. E ti’a iā’u ’ia hōro’a, ’e e ti’a hoʻi iā’u ’ia rave faʼahou. ʼO tā tā’u Metua ïa i faʼaue mai iā’u ». (Ioane 10:15, 17–18).
’Āhani ’ua hinaʼaro te Faʼaora, e rave rahi ïa mau melahi tei nehenehe i te rave ʼē atu Iāna mai niʼa atu i te sātauro nō te haere tiʼa atu i Tōna ra Metua. ’Ua faʼaʼohipa rā ʼOia i Tōna tiʼamāraʼa nō te faʼatūsia Iāna iho nō tātou nei, nō te faʼahope i Tāna misiōni i te tāhuti nei, ’e ’ia tāpeʼa noa e tae noa atu i te hopeʼa, nō te faʼatupura’a i te tūsia tāraʼehara.
’Ua hinaʼaro Iesu e haere mai i te fenua nei, ’e ’ua tiʼa Iāna. ’E i Tōna taeraʼa mai ’ua na ’ō maira ʼOia ē, « i pou mai nei ho’i au mai te ra‘i mai e haʼapa‘o i tō tei tono mai iā‘u nei hinaʼaro, ʼeiaha tōʼu iho hinaʼaro » (Ioane 6:38).
’Ua faʼatōroʼa-ātea-hia Iesu.
’Ua haʼapiʼi mai Petero ē « ’Ua haʼapaʼo-ātea-hia ʼo Iesu hou te tumu ʼo teie nei ao » (hiʼo 1 Petero 1:19-21).
’Ua tohu te mau peropheta i roto i te mau tau tuʼuraʼa atoʼa i te taeraʼa mai ʼo Iesu Mesia ’e e aha Tāna misiōni. Ma te faʼaroʼo rahi, ’ua faʼaʼitehia ia Enoha te hōʼē ʼorama faʼahiahia nō te fānauraʼa, te poheraʼa, te ma’ueraʼa ’e te tae pitiraʼa mai ʼo te Faʼaora.
« E inaha, ’ua ʼite atura Enoha i te mahana ʼo te taeraʼa mai ʼo te Tamaiti ʼa te Taʼata, ʼoia ïa, i roto i te tino, e ʼoaʼoa aʼera tōna ʼāʼau, na ’ō ihora : ’Ua faʼateiteihia te Parau-tiʼa i niʼa, ʼe ’ua taparahihia te ʼĀrenio mai te faʼatumuraʼahia mai ā ʼo te ao nei. …
« ’E ’ua parau maira te Fatu ia Enoha : ʼA hiʼo na. ’Ua hiʼo atura ʼoia, ʼe ʼite atura ʼoia i te Tamaiti ʼa te Taʼata i te faʼateiteiraʼahia i niʼa i te sātauro, mai te huru hoʼi ʼo te taʼata ra ;
« ’E ’ua faʼaroʼo aʼera ʼoia i te hōʼē reo pūai ; ’e vehihia aʼera te mau raʼi ; ’e ʼoto ihora te mau mea atoʼa tā te Atua i hāmani ra ; ’e ʼuʼuru ihora te fenua ; ’e ’amaha ihora te mau mato ; ’e ’ua tiʼa maira te feiā moʼa, ’e ’ua faʼakoronohia rātou i te pae ’atau ʼo te Tamaiti ʼa te Taʼata, i te mau korona hanahana …
« ’E ’ua ʼite atura Enoha i te Tamaiti ʼa te Taʼata i te haereraʼa atu i niʼa, i te Metua ra …
« E i muri aʼera ’ua ʼite atura Enoha i te mahana ʼo te taeraʼa mai ʼo te Tamaiti ʼa te Taʼata i te mau mahana hopeʼa ra, ’ia pārahi i niʼa iho i te fenua i roto i te parau-tiʼa nō te tau e hōʼē tauatini matahiti » (Mose 7:47, 55-56, 59, 65).
Fātata e 75 matahiti hou te fānaura’a ’o te Mesia, ’ua fa’a’ite Amuleka i tōna ʼiteraʼa pāpū : « Inaha, tē parau atu nei au ia ʼoutou ē, ’ua ʼite au e, e tae mai te Mesia i rotopū i te tamariʼi a te taʼata, ’ia rave i ni‘a iāna iho i te mau hara a tōna ra taʼata, ʼe ’ia riro ʼoia ’ei tāraʼehara nō tō te ao nei ; ’ua parau mai hoʻi te Fatu te Atua i te reira » (Alama 34:8).
E mau maitaʼi taʼa ʼē tō Iesu
I HEA TŌ RĀTOU ’ĀFA’IRA’A IĀNA ? nā J. Kirk Richards
ʼO Iesu Mesia anaʼe o te nehenehe e rave i te tūsia tāraʼehara—fānauhia ʼoia ʼe te hōʼē metua vahine tāhuti, ʼo Maria, ʼe ’ua fāriʼi ʼOia i te mana nō te ora nō ’ō mai i Tōna Metua (hiʼo Ioane 5:26). Nō teie mana nō te ora, ’ua upoʼotiʼa ʼOia i niʼa i te pohe, ’ua faʼaʼorehia te mana o te mēnema, ʼe ’ua riro mai ʼOia tō tātou Faʼaora ’e te Ārai ʼe te Fatu nō te Tiʼafaʼahouraʼa—te rāveʼa i hōroʼahia mai ai ia tātou pāʼātoʼa te ora ʼe te tāhuti ’ore. E tiʼafaʼahou tātou pāʼātoʼa ʼe e riro tātou i te mea tāhuti ʼore maoti te tūsia tāraʼehara ʼa Iesu Mesia.
’Ua ʼaufau Iesu Mesia nō te hara tumu mā te ʼāʼau tae.
Tē parau nei te piti ʼo te hīroʼa faʼaroʼo ē, « tē tiʼaturi nei mātou ē, e faʼautuʻahia te taʼata nō tāna iho mau hara, ʼeiaha rā nō tā Adamu ʼofatiraʼa i te ture ».
Nā roto i te faʼaʼohiparaʼa i tō tātou tiʼamāraʼa, e māʼiti tātou i te faʼaʼohipa i tō tātou faʼaroʼo. Ma te itoito, e nehenehe tā tātou e tātarahapa ; ’ia ʼore te Tāraʼehara, e’ita ïa e nehenehe ia tātou ia nā reira.
’Ua haʼapiʼihia tātou i roto ia Mose ē, « nō reira hoʼi i tae mai ai te parau i rotopū i te taʼata ē : ’Ua riro te Tamaiti ʼa te Atua ʼei tāraʼehara nō te hara tumu, e ʼore ai te mau hara ʼa te mau metua e tae ai i niʼa iho i te upoʼo ʼo te mau tamariʼi » (Mose 6:54).
’Ua hōroʼahia mai ia tātou i roto i te 2 Nephi te hōʼē haʼapiʼiraʼa faʼahiahia :
« E nō te mea ’ua tae mai te pohe i niʼa iho i te taʼata atoʼa ra, ’ia faʼatiʼa i te rāveʼa aroha ʼa Tei Hāmani i te mau mea atoʼa ra, ’ia tae mai te mana ʼo te tiʼafaʼahouraʼa e ti’a ai ; ’e ’ia tae mai hoʼi te tiʼafaʼahouraʼa ʼo te taʼata nei e ti’a ai, nō te hiʼaraʼa ʼo te taʼata ra ; ’e nō te hara hoʼi i tae mai ai te hiʼaraʼa ʼo te taʼata ra ; ’e nō te hiʼaraʼa hoʼi ʼo te taʼata i tāpū-’ē-hia ai rātou i te mata ʼo te Fatu ra.
« E teie nei, ’ia riro te reira ʼei tāraʼehara mure ʼore e ti’a ai—e ʼahiri ʼaita te reira e tāraʼehara fāito ʼore, e ʼore teie nei tino tāhuti e riro ’ei tino tāhuti ʼore. E ’ua vai ā te ʼutuʼa mātāmua i tae mai i niʼa i te taʼata ra, e ʼa muri noa atu. ’E ʼahiri te reira, e pē noa atu ʼe e marua noa atu teie nei tino i roto i te repo ra, ʼe e ʼore ïa e tiʼa faʼahou mai » (2 Nephi 9:6-7).
ʼO Iesu anaʼe te taʼata maitaʼi roa aʼe
I roto i te Parau Haʼapiʼiraʼa ʼe te mau Parau Fafau, ’ua parau te Faʼaora, « e te Metua ē, ʼa hi‘o na i te mau ʼati ’e te pohe hoʼi nōna o tei ʼore roa i rave i te hara ra, o tā ’oe i māuruuru roa ra ; ʼa hi‘o nā i te toto nō tō ’oe Tamaiti nei o tei haʼamani’ihia ra, te toto hoʼi nōna nō tā oe iho i hōroa atu ’ia faʼahanahana ’oe » (PH&PF 45:4).
ʼO Iesu anaʼe te taʼata tei maitaʼi roa, ma te hara ʼore. Te tūsia i roto i te Faufaʼa Tahito ʼo te tūsia toto ïa—e toro atu i te tūsia ʼa tō tātou Fatu ’e Fa’aora i niʼa i te sātauro nō te faʼatupu i te tūsia tāraʼehara. ’A ravehia ai te mau tūsia toto i roto i te mau hiero tahito, ’ua faʼatūsia te mau tahuʼa i te hōʼē ’ārenio ’ino ʼore, maitaʼi i te mau huru hiʼoraʼa atoʼa. ’Ua faʼahiti-pinepine-hia te Faʼaora i roto i te mau pāpaʼiraʼa moʼa mai « te ’Ārenio ʼa te Atua » nō Tōna mā (hiʼo ’ei hiʼoraʼa, Ioane 1:29, 36; 1 Nephi 12:6; 14:10; PH&PF 88:106).
’Ua haʼapiʼi Petero ē ’ua faʼaorahia tātou e « te toto taoʼa rā ʼo te Mesia ra, ʼo te ’ārenio ʼino ʼore ’e te maʼi ʼore » (1 Petero 1:19).
’Ua hōpoi ’ē atu Iesu i te mau hara a tō te ao nei
Tē haʼapāpū mai nei teie mau ʼirava ē ’ua ’aufau te Faʼaora nā roto i Tāna Tāraʼehara i te hoʼo nō tā tātou mau hara:
« ’Ua haere ’ē anaʼe tātou, mai te māmoe ra ; ’ua fāriu ’ē tātou, o te taʼata ʼo tōna eʼa, ’e ’ua fāriʼi te Fatu i niʼa iāna i te ʼutuʼa o tā tātou atoʼa nei hara » (Mosia 14:6).
« ’Ua fa’arahi rā te Atua i tōna aroha ia tātou nei, i te mea te vai taʼata hara noa nei ā tātou, i pohe ai te Mesia nō tātou…
« I fa’afa’itehia hoʼi tātou i te Atua i tō tātou vai ʼenemiraʼa ra i te pohe ʼo tāna Tamaiti ; e rahi atu ïa tō tātou ora i te faiteraʼa nei, i tōna ra oraraʼa.
« E ʼere hoʼi te reira anaʼe ra, te ʼoaʼoa nei rā tātou i te Atua, i tō tātou Fatu ia Iesu Mesia, nōna i noaʼa ai ia tātou taua faiteraʼa nei…
« Mai te taʼata hoʼi e rave rahi i faʼarirohia ’ei taʼata hara i te haʼapaʼo ʼore ʼo te taʼata hō’ē ra, e rave rahi hoʼi tei faʼarirohia ʼei taʼata parau tiʼa, i te haʼapaʼo ʼo te taʼata hōʼē ra » (Roma 5:8, 10-11, 19).
« I te fa’afa’itehia i te parau ʼa te peropheta ra a Isaia i te na-’ō-ra’a ē, ’Oia iho tei rave i tō tātou paruparu, e ’ua hopoi ’ē i tō tātou mau pohe » (Mataio 8:17)
« Tē vai noa ra rā te Atua, ʼe e mana tō te aroha i niʼa i te feiā tātarahapa, ʼe nō te tāraʼehara i tae mai ai te aroha, ’e nō te tāraʼehara i tupu ai te tiʼafaʼahouraʼa ʼo tei pohe ra ; e nō te tiʼafaʼahouraʼa ʼo tei pohe ra, e tae faʼahou ai te taʼata i mua i te aro ʼo te Atua ra ; ’e nā reira rātou i te faʼatiʼahia i mua i tōna ra aro, ’ia haʼavāhia mai te au i tā rātou ʼohipa ; e mai te au hoʼi i te ture ʼe te parau-tiʼa…
« ’E nā reira te Atua i te faʼatupu i tāna ʼopuaraʼa rahi, ʼe te mure ʼore ra, i tei haʼapaʼohia mai te hāmaniraʼa mai ā ʼo teie nei ao. ’E nō reira e tupu ai te ora ʼe te faʼaoraraʼa i te taʼata nei, ʼe tō rātou māuiui ʼe te pohe atoʼa hoʼi » (Alama 42:23, 26).
’Ua tāpeʼa Iesu e tae noa atu i te hopeʼa
Gray Day Golgotha,nā J. Kirk Richards
’Ua faʼaʼoromaʼi Iesu Mesia i te mau tāmataraʼa, te māuiui, te tūsia, ’e te mau ʼati nō Getesemane, mai te hepohepo atoʼa nō Torotota i niʼa i te sātauro. I reira, i te pae hopeʼa, ’ua nehenehe Iāna ’ia parau ē, « ’ua oti » (Ioane 19: 30). ’Ua fa’aoti ’Oia i Tāna ’ohipa i te tāhuti nei ’e ’ua tāpe’a e tae noa atu i te hope’a, ma te rave fa’aoti i te tūsia tāra’ehara.
I roto i te ’ō nō Getesemane ’ua pure ’Oia i te nā-’ō-raʼa ē, « e tā’u Metua ē, ’ia ti‘a rā, e hōpoi ’ē atu i teie nei au‘a, ’ia tupu rā tō ’oe hina’aro, ’eiaha tō’u » (Mataio 26:39).
I roto i te Parau Ha’api’ira’a ’e te mau Parau Fafau tē a‘ohia nei tātou ē :
« Nā te reira mamae rahi i faʼatupu i roto iā‘u, ʼoia ʼo te Atua, o tei hau a‘e i te mau mea atoʼa ra, i te rūrūtaina nō te māuiui, ʼe ’ua tahe mai ra te toto na te mau poa ato’a, ʼe ’ua māuiui i te tino ʼe te vārua atoʼa hoʼi—’e ’ua hinaʼaro hoʼi ’ia ʼore au ’ia inu i te au‘a maramara ʼe ’ōriorio atu—
« ’Ārea rā, ʼei hanahana tō te Metua, ʼe ’ua inu vau ʼe ’ua faʼaoti hoʼi i tā’u mau faʼaineineraʼa i te tamariʼi ʼa te taʼata nei » (PH&PF 19:18–19).
’Ua parau Iesu i tōna ra Metua, « ’ua haʼamaitaʼi au ia ’’oe i te ao nei ; ’ua oti iāʼu te ʼohipa tā ’oe i hō mai nāʼu e rave ra » (Ioane17:4).
I muri iho, i niʼa i te sātauro, « e ’ia inu aʼera Iesu i taua vinega ra, ’ua parau maira, ’ua oti ; ’ua tāupe ihora tāna upoʼo i raro, tuʼu atura i tāna vārua » (Ioane 19:30).
’Ua haere mai Iesu i te fenua nei, ’ua tāpeʼa i Tōna hanahana ’ia nehenehe iāna ’ia rave i te tūsia tāraʼehara, ʼe ’ua tāpeʼa e tae noa atu i te hopeʼa.
ʼA haʼamanaʼo Iāna nā roto i te ’ōro’a
I teie mahana te haʼamanaʼo nei tātou i te tūsia tāraʼehara ʼa te Faʼaora nā roto i te mau tāpaʼo nō te pane ʼe te pape—mau tāpaʼo nō Tōna tino ’e te toto—mai tei haʼamauhia i te tāmāʼaraʼa hopeʼa ʼa te Fatu ʼe Tāna mau ʼĀpōsetolo.
« ’Ua rave ihora ʼoia i te pane, haʼamaitaʼi atura i te Atua, vāvāhi ihora, tuʼu atura ia rātou ra, nā ’ō atura, ʼo tāʼu tino teie e hōroʼahia nā ʼoutou nei, e nā reira ʼoutou ʼei manaʼoraʼa iāʼu.
« ’E ’ua nā reira atoʼa hoʼi i te auʼa ’ia oti aʼe te tāmāʼaraʼa pō, nā ’ō atura, teie nei auʼa, ʼo te faufaa ʼāpī ïa i tōʼu nei toto, e haʼamaniʼihia nō ʼoutou nei » (Luka 22:19–20).
I roto i te Ioane 11:25-26 te tai‘o nei tātou :
« Tei iā’u te ti’afa’ahoura’a ’e te ora, ’o te fa’aro’o mai iā’u ra, pohe noa ā ’oia e ora ā ïa :
« E te taʼata ora atoʼa nei e faʼaroo iā’u ra, e ʼore roa atu ïa e pohe ».
Tē taiʼo atoʼa nei tātou : « ʼO vau te pane ora ʼo tei pou mai mai te raʼi : ʼo te amu i teie nei pane, e tiʼa ïa i te oraraʼa ; ʼo tāʼu pane e hōroʼa atu, ʼo tōʼu ïa tino, ʼo tāʼu ïa e hōroʼa ’ei ora nō tō te ao » (Ioane 6:51).
« Te ora nō tō te ao » ʼo te ora mure ʼore ïa.
E tiʼa ia tātou ’ia faʼaineine ia tātou iho ʼe tō tātou mau ʼutuāfare i te mau hepedoma atoʼa ’ia tiʼamā nō te amu i te ʼōroʼa ʼe nō te faʼaʼāpī i tā tātou mau fafauraʼa ma te ʼāʼau tātarahapa.
Tē here nei te Metua ʼe te Tamaiti ia tātou
’Eiaha e fēʼaʼa, e Toma,nā J. Kirk Richards
’Ua tono mai te Metua i Tāna Tamaiti i niʼa i te fenua nei—te aroha—nō te faʼatiʼa Iāna ’ia faʼasātaurohia ʼe nō te haere nā roto i te mau mea atoʼa Tāna i haere. Te taiʼo nei tātou i roto i te Ioane :
« Nā ’ō atura Iesu… ʼo vau te e‘a, te parau mau, ʼe te ora : ʼAore roa ʼe ta’ata e tae i te Metua ra, maori rā ʼei iāʼu.
« ʼĀhiri ʼoutou i ʼite nā iā’u, ’ua ʼite atoʼa ʼoutou i tāʼu Metua, ʼe teie nei, ’ua ʼite ʼoutou iāna, ʼe ’ua hi‘o hoʼi ʼoutou iāna » (Ioane 14:6–7).
« ʼO te aroha mau teie, e ʼere rā e nā tātou i aroha atu i te Atua, oia rā tei aroha mai ia tātou nei, ’e ’ua tono mai i tāna Tamaiti ʼei tāraʼehara i tā tātou nei hara » (1 Ioane 4:10).
Tāraʼehara ʼo te faʼa’āfaroraʼa ’aore rā e faʼahauraʼa ïa.
’Ei fa’aotira’a
Te taʼata atoʼa ʼo te haere mai i te fenua nei ʼe tei fāriʼi i te hōʼē tino tāhuti e tiʼafaʼahou mai ïa, e tiʼa rā ia tātou ’ia haʼa nō te fāriʼi i te haʼamaitaʼiraʼa nō te faʼateiteiraʼa nā roto i tō tātou haʼapaʼo maitaʼi, tō tātou tiʼamāraʼa, ’e tō tātou tātarahaparaʼa. E fāitohia mai ïa te aroha ma te parau-tiʼa, ma te faʼatiʼaraʼa i te tātarahaparaʼa.
Nō te mea hoʼi ē ’ua māʼiti tātou ’ia peʼe ’e ’ia fāriʼi ia Iesu Mesia ’ei Tāraʼehara nō tātou, e rave ïa tātou i Tōna ra i’oa i niʼa iho ia tātou i te taime bāpetizoraʼa. ’Ua rave tātou i te ture nō te haʼapaʼoraʼa. ’Ua fafau tātou ē e haʼamanaʼo noa ā tātou Iāna ’e e haʼapaʼo i Tāna mau faʼaueraʼa. E faʼaʼāpī tātou i te fafauraʼa i te mau sābati atoʼa i te taime e rave ai tātou i te ʼōro‘a.
Nā roto i te faʼaʼāpīraʼa i tā tātou mau fafauraʼa, ’ua hōroʼahia ia tātou te fafauraʼa ē e vai noa ā Tōna ra Vārua ia tātou nei. Mai te mea e faʼatiʼa tātou i Tōna Vārua ’ia haere mai i roto i tō tātou oraraʼa, e nehenehe ïa ia tātou ’ia hoʼi atu i mua i te aro ʼo te Metua i te Ao ra e Tāna Tamaiti, ia Iesu Mesia, o teie hoʼi tā Rāua ʼopuaraʼa nō tātou—te ʼopuaraʼa nō te faʼaoraraʼa.