Parau poro’i ʼa te Peresidenira’a Mātāmua
Te feiā parau ti’a i te fa’aro’o ra e ora ïa
Te rabi ’e te taʼata hāmani puʼa
Tē vai ra te hōʼē ʼāʼai Ati Iuda tahito nō niʼa i te hōʼē taʼata hāmani puʼa tei ʼore i tiʼaturi i te Atua. I te hōʼē mahana ’a haere ai ʼoia e te hōʼē rabi, ’ua nā ’ō atu ʼoia, « tē vai nei te tahi mea e’ita e nehenehe iāʼu ’ia māramarama. E haʼapaʼoraʼa faʼaroʼo tā tātou e rave rahi tauasini matahiti i teie nei. ’Ia hi’o rā ’oe i te mau vāhi atoʼa te vai nei te ʼino, te petaraʼa, te ʼohipa piʼo, te parau-tiʼa ʼore, te māuiui, te poʼia, ʼe te ʼiriā. E au ra ē ʼaita te haʼapaʼoraʼa faʼaroʼo i haʼamaitaʼi noa aʼe i te ao nei. Nō reira tē ani nei au ia ’oe, e aha ïa te maitaʼi nō te reira ?
ʼAita te rabi i pāhono ʼoiʼoi ’ua tāmau noa rā i te haere ’e te taʼata hāmani puʼa. I muri iho ’ua fātata atu rāua i te hōʼē ’aua haʼutiraʼa i reira te mau tamariʼi, tei ’ī i te repo, i te haʼutira’a i roto i te repo.
« Tē vai nei te tahi mea ʼaita vau e māramarama nei », ’ua parau maira te rabi. « ʼA hiʼo na i teie mau tamariʼi. E puʼa tā tātou e rave rahi tauasini matahiti i teie nei, ’e e repo noa ā teie mau tamariʼi. E aha ïa te maitaʼi nō te puʼa ?
’Ua pāhono atura te taʼata hāmani puʼa, « E rabi, e ʼere i te mea tiʼa ’ia faʼahapa i te puʼa nō teie mau tamariʼi repo. E tiʼa i te puʼa ’ia faʼaʼohipahia hou ʼa nehenehe ai i te reira ’ia rave i tāna ʼohipa ».
’Ua ʼataʼata aʼera te rabi ’e ’ua na ’ō atura, « ’Ua tiʼa roa ».
Nāhea ïa tātou e ora ai ?
’Ua faʼahiti te ʼāpōsetolo Paul te hōʼē peropheta nō te Faufaʼa Tahito ē ’ua haʼapoto ʼoia i te auraʼa nō te hōʼē taʼata tiʼaturi ʼa pāpaʼi ai ʼoia, « te feiā parau-tiʼa i te faʼaroʼo ra, e ora ïa » (Roma 1:17).
Peneiaʼe i roto i teie faʼahitiraʼa parau ʼohie e taʼa ai ia tātou te huru-’ē-raʼa i rotopū i te hōʼē haʼapaʼoraʼa faʼaroʼo paruparu ʼe te manuia ʼore ʼe te hōʼē haʼapaʼoraʼa faʼaroʼo tei roto te mana nō te faʼataui i te mau oraraʼa.
E tiʼa rā ia tātou ’ia taʼa i te auraʼa nō te ora ma te faʼaroʼo, ʼe e tiʼa ia tātou ’ia taʼa e aha te faʼaroʼo.
Mea hau atu ïa te faʼaroʼo i te ti‘aturiraʼa. ʼO te tiʼaturiraʼa mau ïa i te Atua ma te apeʼehia ’e te ʼohipa.
Mea hau atu ïa i te tia‘i.
Mea hau atu ïa i te pārahi-noa-ra’a, te taʼiriʼiri-noa-raʼa i tō tātou mau upoʼo, ma te parauraʼa ē te fariʼi nei tātou. ’Ia parau anaʼe tātou ē « te feiā parau-tiʼa i te faʼaroʼo e ora ïa, » tē parau nei ïa tātou ’e tē arataʼihia nei ’e tē faʼaterehia nei tātou e tō tātou faʼaroʼo. E rave tātou i te ʼohipa nā roto i te hōʼē rāveʼa e ʼāfaro i tō tātou faʼaroʼo—e ʼere noa nā roto i te haʼapaʼo ma te feruri ʼore nā roto rā i te hōʼē here pāpū nō roto mai i te ʼāʼau mau ’e nō te paʼari faufaʼa rahi Tāna i heheu mai i Tāna ra mau tamariʼi.
E tiʼa i te faʼaroʼo ’ia apeʼehia e te ʼohipa; ʼaore anaʼe e mea pohe ïa (hiʼo Iakobo 2:17). E ʼere roa atu ïa i te faʼaroʼo. E ʼaita ïa e mana nō te faʼataui i te hōʼē taʼata, e tō te ao atoʼa.
E tiʼa i te mau tāne ʼe te mau vahine faʼaroʼo ’ia tiʼaturi i tō rātou Metua aroha i te Ao ra—e tae noa atu i roto i te mau tau pāpū ʼore, e tae noa atu i roto i te mau tau nō te fēʼaʼaraʼa ’e te tamataraʼa ’ia ʼore anaʼe rātou e ʼite maitaʼi ’aore rā e māramarama maitaʼi.
E haere ʼitoito te mau tāne ʼe te mau vahine faʼaroʼo nā niʼa i te eʼa nō te pipiraʼa ʼe ma te tūtava i te peʼe i te hōhoʼa ’o tō rātou Faʼaora, ia Iesu Mesia. E turaʼi te faʼaroʼo ’e, oia mau, e faʼauru ia tātou ’ia faʼafāriu i tō tātou ʼāʼau i te raʼi e ma te itoito ’ia fārerei atu, ’ia faʼateitei ’e ’ia haʼamaitaʼi i tō tātou mau taʼata tupu.
Te haʼapaʼoraʼa e ’aore e ʼohipa e au ïa mai te puʼa o tē vai noa ra i roto i te ʼāfata. E pūai rahi tō te haʼapaʼoraʼa, e mea iti rā te pūai ’ia faʼatupu i te hōʼē huru-’ē-raʼa maori rā ’ia rave faʼaotihia te tumu i hāmanihia ai te reira. Te ʼevānelia tei faʼahoʼihia mai ʼa Iesu Mesia, e ʼevānelia ʼohipa ïa. Tē haʼapiʼi nei te ʼĒkālesia ʼa Iesu Mesia i te Feiā Moʼa i te mau Mahana Hopeʼa nei i te haʼapaʼoraʼa mau mai te hōʼē poroʼi nō te tiʼaturiraʼa, te faʼaroʼo, ʼe te aroha, e tae noa atu i te tautururaʼa i tō tātou ta’ata tupu nā roto i te mau rāveʼa pae vārua ʼe pae tino.
Te tahi mau avaʼe aʼenei, ’ua haere atu vau e tāʼu vahine faʼaipoipo, ʼo Harriet, i roto i te hōʼē tere ʼutuāfare ’e te tahi ʼo tā maua mau tamariʼi i te ārea nō Mediteranea. ’Ua haere atu mātou e hiʼo i te tahi mau puhaparaʼa nō te mau tītīhoria ’e ’ua fārerei i te mau ʼutuāfare nō te mau fenua tei ʼino roa i te tamaʼi. E ʼere teie mau taʼata nō ta tātou nei haʼapaʼoraʼa, e mau taeaʼe ʼe e mau tuahine rā rātou nō tātou ʼe ’ua hinaʼaro rū rātou i te tauturu. ’Ua putapū-hōhonu-roa tō mātou ʼāʼau i tō mātou ʼite-mata-raʼa atu e nāhea te faʼaroʼo itoito ʼo tō tātou mau melo ʼo te ʼĒkālesia ’āfaʼiraʼa mai i te tauturu, i te tāmāhanahana, ʼe te tiʼaturi i tō tātou mau taʼata tupu tei roto i te fifi, noa atu e aha tā rātou haʼapaʼoraʼa, ʼopū, ’aore rā haʼapiʼiraʼa.
E faʼa’ī te faʼaroʼo ’apitihia atu i te ʼohipa tāmau i te ʼāʼau i te hāmani maita’i, i te feruriraʼa i te paʼari ’e te māramarama, ’e i te vārua i te hau ʼe te here.
E nehenehe tā tō tātou faʼaroʼo e haʼamaitaʼi ʼe e fa’auru ma te parau-tiʼa i te taʼata na piha’i iho ia tātou ’e ia tātou iho.
E nehenehe tā tō tātou faʼaroʼo e faʼa’ī i te ao nei i te maitaʼi ʼe te hau.
E nehenehe tā tō tātou faʼaroʼo e faʼataui i te ’iriā ’ei aroha ’e te mau ʼenemi ’ei mau hoa.
I reira te feiā parau-tiʼa e ora ai i roto i te faʼaroʼo ; e ora rātou ma te tiʼaturi i te Atua ’e te haereraʼa nā niʼa i Tōna ’ēʼa.
’E o tera ïa te huru faʼaroʼo o te nehenehe e faʼataui i te mau taʼata, te mau ʼutuāfare, te mau nunaʼa, ’e te ao nei.