Te reo ʼo te Feia Mo’a i te mau mahana hopeʼa nei
Faʼaorahia i roto i te ʼutuāfare
Faʼahōho’araʼa nā Allen Garns
E mea pinepine tāʼu tāne faʼaipoipo i te rave i te ʼohipa i te mau sābati, nō reira ʼo vau anaʼe o te ’āfaʼi i tā maua nā tamāroa e maha i te fare pureraʼa. I te hōʼē ihoa rā sābati i roto i te pureraʼa ʼōroʼa, ’ua riri tāʼu nā tamari’iriʼi e piti te tahi i te tahi. Mai te mea ’ua noaʼa iāʼu i te faʼaʼanaʼanatae i te hōʼē o te mau tamāroa i roto i te hōʼē buka, ’ua hinaʼaro atoʼa ïa tōna taeaʼe i te reira. ’Ua tāmata vau i te mau māʼa ʼamuʼamu, te mau haʼuti, ’e te peni, ʼaita roa i manuia. ’Ua taʼahoa roa vau i tā’u mau tamāroa, e au ra e’ita e nehenehe ia rātou ’ia faʼaea hau noa nō te hōʼē noa hora.
’Ua huti mai au i te hōʼē haʼuti naʼinaʼi mai roto mai i tāʼu pute ’e ’ua hōroʼa atu i te reira i tāʼu nei tamāroa hōʼē matahiti. ’Aita i maoro roa ’ua tuo tāʼu tamāroa e toru matahiti o Tyson, ’a tupaʼi ai ʼoia i tōna teina, ma te tāmata i te haru i te haʼuti. ’Ua haʼamā vau ’a amo ai au i rāpae au i nā tamāroa e piti o tē ’aro ra.
’Ua rari ʼoiʼoi tōʼu hōhoʼa mata i te roimata māhanahana. Nō te aha e mea fifi roa ai mai teie te huru ? Tē rave ra hoʼi au i te mea tā te Metua i te Ao ra i hinaʼaro iāʼu ’ia rave ma te ’āfaʼi mai i tōʼu ʼutuāfare i te fare pureraʼa nei, e ’ere ānei ? E’ita rā e maraʼa faʼahou iāʼu. E mea rohirohi ’e te haʼamā ’ia ’aro atu i tāʼu mau tamāroa i roto i te pureraʼa ʼōroʼa ʼo vau anaʼe i te mau hepetoma atoʼa. ʼAita roa atu vau i hinaʼaro e hoʼi faʼahou mai.
’Ua pārahi au ’e teie mau manaʼo fātata e 15 tetoni noa, ’e ’ua haere mai ra te hōʼē tuahine tāʼu i mātauriʼi i rāpae i piha’i iho iāʼu. O te tuahine Beus tōna iʼoa. E pārahi ʼoia ’ōna anaʼe i te rahiraʼa ʼo te taime, nō te mea tē tāvini nei tāna tāne faʼaipoipo i roto i te ʼepisekōporaʼa ’e ’ua paʼari tāna mau tamariʼi. ’Ua parau ʼoia, « ʼo ’oe anaʼe i ’ō nei i te mau taime atoʼa ! E nehenehe tāʼu e hiʼo ē te tāmata pūai nei ’oe. E nehenehe ānei tā Tyson e pārahi i piha’i iho iāʼu ? ’Aita i noaʼa iāʼu ’ia feruri i te hōʼē pāhonoraʼa ! ’Ua tāʼiriʼiri noa vau i tōʼu upoʼo ’a rave ai ʼoia iāna nā te rima ’e ’ua arataʼi atu iāna, o te hau ’e te ʼoaʼoa i taua taime ra, i roto i te fare pureraʼa.
’Ua tāmarō vau i tōʼu roimata, ’ua rave i tāʼu ’aiū, ’e ’ua hoʼi atu ma te ha’ehaʼa i roto i te fare pureraʼa nō te fānaʼo ma te hau i te toeʼa ʼo te pureraʼa.
I te sābati i muri a’e ’a haere ai mātou i te pureraʼa ʼōroʼa, ’ua ʼimi Tyson i tōna hoa ʼāpī. E pure ʼoia i te pō, « māuruuru e te Metua i te Ao ra nō te tuahine Beus. Ua here roa vau iāna ! »
E toru matahiti hau i teie nei, ’e tē ’imi pinepine noa ra o Tyson i roto i te fare pureraʼa i te tuahine Beus. I te matahiti i ma’iri aʼenei, ’ua piʼihia ʼoia ’ei ʼorometua Paraimere nō Tyson. ’Ua riro ʼoia ’ei tamaiti iti oraora ʼoaoʼa roa aʼe.
Tē māuruuru rahi nei au nō te tuahine Beus ʼe nō tōna hinaʼaro ’ia here ʼe ’ia tāvini ia vetahi ’ē. ’Ua ʼite au e nehenehe tā tātou e haʼamaitaʼi i te mau oraraʼa ʼo vetahi ’ē ’ia tāvini anaʼe tātou mai te Faʼaora te huru.