’A faʼaau ’ia ’outou iho i tā ʼoutou tuatāpaparaʼa ʼevanelia
ʼA hiʼo i teie mau tautururaʼa nō te tuatāpararaʼa i te ʼevanelia ’e te ʼimiraʼa i te mau pāhonoraʼa i tā ʼoutou mau uiraʼa i te pae vārua.
Nāhea ʼoutou e tuatāpapa ai ’ia ’imi anaʼe ʼoutou i te mau pāhonoraʼa i te hōʼē uiraʼa pae vārua ’aore rā ʼa tāmata noa ai i te taʼa maitaʼi a’e i te mau pāpaʼiraʼa moʼa ? Tē parau nei au—nō ʼoutou iho. E mea taʼa ʼē te huru tuatāpararaʼa a te mau taʼata atoʼa nō te fare haʼapiʼiraʼa, i te tahi rā mau taime e moʼehia ia tātou ē e nehenehe tā tātou e faʼaau ia tātou iho tā tātou tuatāpaparaʼa ʼevanelia. Te taime i muri nei e uiraʼa tā ʼoutou i te pae vārua aore rā haʼapiʼiraʼa tumu, ʼa tāmata i te tahi o teie mau tautururaʼa nō te feruri e aha te mea maitaʼi aʼe nō ʼoutou.
1. ʼA hāmani
ʼA hāmani i te hōʼē tāpura, te hōʼē faʼahōhoʼaraʼa, aore rā te hōʼē hōhoʼa fenua. (ʼA hiʼo i raro nei nō te hōʼē hi’ora’a.)
’A hāmani i te hōʼē tuatāpaparaʼa i niʼa i te itenati. ʼA pāpaʼi i te mau taʼo ’e te mau manaʼo ’e ’a faʼatūʼati atu i te reira i te mau reni ’e te mau haʼamenemeneraʼa nō te faʼaʼite e nāhea rātou e tūʼati ai te tahi i te tahi.
2. ʼA pāpaʼi
ʼA pāpaʼi i te mau manaʼo ’e te mau faʼaururaʼa tā ʼoutou i fāriʼi i roto i tā ʼoutou tuatāpaparaʼa i te pāpaʼiraʼa moʼa i roto i te hōʼē buka ʼāʼamu ’e ʼa taiʼo pinepine i taua mau manaʼo ra.
ʼA pāpaʼi i tō ʼoutou iho mau manaʼo ’e te mau faʼaururaʼa i muri aʼe i tā ʼoutou mau pure, noa atu e ʼaita te mau faʼaururaʼa i tūʼati roa i te tumu parau tā ʼoutou e tuatāpapa nei. ʼA hiʼo e aha tā te Vārua e haʼapiʼi ra ia ʼoutou i tera roaraʼa taime.
’A pāpaʼi i tā ʼoutou mau uiraʼa i roto i te hōʼē buka iti, i roto i tā ʼoutou niuniu ’āfaʼifaʼi, ’aore rā i niʼa i te hōʼē buka iti i piha’i iho i tō ʼoutou roʼi nō te faʼahaʼamanaʼo ia ʼoutou ’e nō te tauturu ia ʼoutou ’ia tāmau noa i te feruri i te mea tā ʼoutou e haʼapiʼi nei i te mau mahana atoʼa.
3. ʼA faʼaroʼo ’e ʼa tāu’aparau
ʼA paraparau atu i te hōʼē metua ’aore rā i te taʼata faʼatere tei tiʼaturihia. ʼA haʼa ’āmui. E maoro riʼi paha, e tupu rahi rā ʼorua i roto i teie raveraʼa.
ʼA haʼapiʼi atu i te tahi atu taʼata. ʼA faʼaʼite atu i te tahi ’e te tahi i te mea tā ʼoutou i ʼite. ’A tuatāpapa i te mea tā ʼoutou i ha’api’i mai i te tahi ’e te tahi.
ʼA faʼaroʼo tariʼa i te mau pāpaʼiraʼa moʼa ’aore rā te tahi atu mau ʼāʼamu ’e te mau buka momoni.
4. ʼA mā’imi
ʼA mā’imi i te mau tauturu haʼapiʼiraʼa i roto i te mau pāpaʼiraʼa moʼa ’e i niʼa i te itenati (hiʼo i raro mai i te tāpura nō te mau rāveʼa momoni e nehenehe e tauturu).
ʼA mā’imi i niʼa i te LDS.org nō te mau video ’e te mau hīmene nō niʼa i te mea tā ʼoutou e tuatāpapa ra.
ʼA tuatāpapa i te mea tā ʼoutou e taiʼo ra. ʼA mā’imi i te ʼāʼamu aore rā te mau pene nō niʼa i te tumu parau aore rā te pāpaʼiraʼa moʼa tā ʼoutou e taiʼo ra.
5. ’A rave
ʼA ha’uti i te mau ʼāʼamu nō roto mai i te mau pāpaʼiraʼa moʼa ’;aore rā te tahi atu mau buka. Nāhea te tuʼuraʼa atu ia ʼoutou iho i roto i te tiʼaraʼa ʼo taua taʼata ra e tauturu ai ia ʼoutou ’ia māramarama maita’i atu i te mea tā ʼoutou e taiʼo ra ? E aha ra ïa te huru ʼo taua mau huru ʼohipa i roto i tō ʼoutou iho oraraʼa ?
ʼA hāmani i te hōʼē tāpura nō te mau pāpaʼiraʼa moʼa ʼo te tūʼati i te mau pāhonoraʼa tā ʼoutou i ʼite i roto i te mau pāpaʼiraʼa moʼa. (Hiʼo i raro nei nō te hōʼē hi’ora’a.)