Te reo ʼo te Feia Mo’a i te mau mahana hopeʼa nei
’Ua oti !
Fa’ahōho’ara’a nā Allen Garns
I roto i tāʼu mau uiuiraʼa ’ei ʼepisekōpo i te hōʼē avatea sābati, ’ua ʼoaʼoa vau i te pārahiraʼa i piha’i iho i te hōʼē hoa maitaʼi nō te paraparau nō nʼia i te tahi mau tāmataraʼa tāna e faʼaruru nei. I muri aʼe i tōʼu faʼaroʼoraʼa i te tahi nā minuti i tōna mau peʼapeʼa, ’ua ʼite au ē e tiʼa iāna ’ia taiʼo tāmau i te mau pāpaʼiraʼa moʼa. ’Ua faʼahaʼamanaʼo-atoʼa-hia vau ē, ’ei ʼepisekōpo nōna, e tiʼa atoʼa iāʼu ’ia tāmau atu ā i tāʼu taiʼoraʼa i te mau pāpaʼiraʼa moʼa, ʼo te tahi ïa fifi tōʼu. Nō reira ’ua parau vau ē ’ia riro māua ʼei mau « hoa tiʼaʼau » i te tūtavaraʼa ’ia taiʼo tāmau atu ā.
I te mau mahana atoʼa ’ia oti tā māua taiʼoraʼa i tā māua pāpaʼiraʼa moʼa, e hāpono ïa māua i te tahi e te tahi i te poroʼi niuniu ’ua oti ! ’Ua riro ïa te ʼiteraʼa ē te tiaʼi mai ra te tahi taʼata i te faʼaroʼo mai te mea ’ua oti ānei tā te tahi taiʼoraʼa nō te mahana ’ei tūraʼiraʼa rahi nō māua toʼopiti. Mai te mea ’ua moʼehia i te hōʼē ʼo māua, ’ua riro ïa te fāriʼiraʼa i te hōʼē poroʼi niuniu ʼei hōʼē faʼahaʼamanaʼoraʼa. Mai te mea ʼaita te tahi i hāpono mai i te poroʼi niuniu, e’ita ïa ’oia e piʼihia nō te faʼahaʼamanaʼo i te reira. ’Ua vaiiho māua i te tahi ʼe te tahi ’ia rave i teie tītauraʼa ma te ʼore e faʼahaʼamā i te tahi taʼata.
’Ua haʼamata māua i te tītauraʼa ʼa ono ʼāvaʼe i teie nei, ʼe ʼaita vau e haʼamanaʼo nei i te hōʼē mahana ’aita māua i taiʼo i tā māua mau pāpaʼiraʼa moʼa. ’Ua tiʼa mai teie taeaʼe i roto i te pureraʼa haʼapaeraʼa maʼa ʼe te ’īritiraʼa manaʼo e piti ʼāvaʼe i teie ʼe ’ua faʼaʼite mai i tōna ʼiteraʼa pāpū nō te maitaʼi tā te taiʼoraʼa i te pāpaʼiraʼa moʼa i faʼatupu i niʼa iho iāna ʼe tōna ʼutuāfare.
’Ua māuruuru vau nō teie taeaʼe ’e nō tōna auhoaraʼa, e tāna atoʼa mau poroʼi niuniu i te mau mahana atoʼa. ’Ua ʼite au e nāhea te mau rāveʼa māramarama e haʼamaita’i ai i tō tātou oraraʼa mai te mea e faʼaʼohipa-maitaʼi-hia te reira. Tē māuruuru atoʼa nei au nō te mau pāpaʼiraʼa moʼa ’e nō te huru ʼo tā rātou faʼaʼiteraʼa nō niʼa i te Mesia. ’Ua ʼite au ē na te tusia tāraʼehara ʼa te Faʼaora i nehenehe ai ia tātou tātaʼitahi ’ia hoʼi atu e ora i piha’i iho Iāna ’ia tae i te hōʼē mahana.