Faʼaineineraʼa nō te hōʼē tere ʼāpī
Tē ora nei te taʼata pāpa’i i Paraná, Peretīria.
Mai ia Nephi i fano atu i te vāhi ʼite-ʼore-hia, ’ua tiʼa iāʼu ’ia faʼaʼohipa i te faʼaroʼo i te Fatu nō niʼa i te haʼamataraʼa i te hōʼē ʼutuāfare.
Hōhoʼa © Getty Images
I roto i te mau hepetoma e tae atu ai i tōʼu faʼaipoiporaʼa ’e te taʼatiraʼa hiero, ’ua haʼamata vau i te taiāriʼi nō niʼa i te mau mea e tiʼa iāʼu ’ia rave hou ʼa haʼamata ai au i tōʼu ʼutuāfare ʼāpī. Noa atu te tāʼātoʼaraʼa ʼo te ʼoaʼoa i taua taime ra, ’ua tapitapi au nō niʼa i te faʼanahoraʼa i tō māua oraraʼa ʼāpī, te faʼa’āfaroraʼa i tā māua faufaʼa moni, te ʼimiraʼa i te vāhi vairaʼa nō tā māua mau tauhaʼa, e tāʼu mau hōpoiʼa atoʼa ’ei vahine faʼaipoipo. ’Ua hinaʼaro vau e ’ia haʼapāpū maitaʼi e ’ua haʼamata-tiʼa-maitaʼi māua i tō māua faʼaipoiporaʼa ma te faʼataʼa-maita’i-raʼa i te tahi vāhi i roto i tā māua mau ʼohipa nō te mau mea faufaʼa rahi mai te haʼapaʼoraʼa i te mau faʼaueraʼa ’e te rave-ʼāpiti-raʼa i te taime ’ei tāne ’e ’ei vahine faʼaipoipo noa atu te rahi ʼo te ʼohipa i roto i tō māua oraraʼa.
ʼA fātata ai te mahana faʼaipoiporaʼa, ’ua māere au nō te mau moemoeā riʼariʼa e rave rahi nō niʼa i te mau huru fifi atoʼa ʼo te nehenehe e tūʼinō i te hōʼē ʼutuāfare. Nō te mea hoʼi e nō roto mai au i te hōʼē ʼutuāfare here tei roʼohia rā i te ʼati, tei faʼaruru i te mau mārōraʼa tāmau ’e te uʼana ’e te ʼāʼau ʼoto, ’ua huru ’ē roa vau i teie mau moemoeā ’ino. Nō reira i te hōʼē pō, i muri aʼe e rave rahi mau pō mai teie te huru, ’ua ara mai au ma te rari i te hou ’e ’ua faʼaoti aʼera vau e peʼe i te aʼo tā te tuahine Neill F. Marriott, tauturu piti i roto i te Peresideniraʼa Rahi ʼa te Feiā ʼĀpī Tamāhine, i hōroʼa i roto i tāna aʼoraʼa « Auraro tō tātou ʼāʼau i te Atua » (Liahona, Novema 2015, 30–32). ’Ua tāpiri au i tōʼu mata ’e ’ua pure, « e te Metua Here i te Ao ra, e aha tāʼu e nehenehe e rave nō te faʼaātea ’ē atu i teie mau mea ’inō i tōʼu ʼutuāfare ? »
’Ua puta ʼoiʼoi mai te pāhonoraʼa iāʼu ma te pūai mai te mea ra ē ’ua tātara te tahi taʼata i te ’ōpani i roto i tōʼu upoʼo ’e ’ua tuʼu atu i te manaʼo i roto. ’Ua parau mai te reo iti haʼihaʼi, « ’a rave noa mai tei tiʼa ia ’oe ’ia rave. ʼA haʼapaʼo i te mau taʼahiraʼa atoʼa ». ’Ua parauriʼiriʼi mai te Vārua i te tahi aʼo taʼa ʼē, ’e ’ua ʼite au ē ’ia rave au i taua mau mea ra, e maitaʼi ïa te mau mea atoʼa ».
’Ua ʼataʼata vau ’e ’ua ’ite au i tōʼu ʼōuma i te ’īraʼa i te māhanahana. ’Ua moʼe tāʼue noa te mau manaʼo peʼapeʼa atoʼa, i te mea ē ’ua ʼite au e parau mau te reira. ’Ua ʼite au i te Vārua Maitaʼi na mua atu, e ’ere rā i te mea pūai mai tāʼu i ʼite i taua pō ra. ’Ua ʼite au i te here ʼo tō tātou Metua i te Ao ra ’e ’o tō tātou Faʼaora i te haʼatiraʼa iāʼu, ’e ’ua ʼite au ē mea faufaʼa rahi atoʼa te maitaʼi ’e te ora ʼo tōʼu ʼutuāfare nō Rāua mai nōʼu nei.
’Ei haʼapāpūraʼa ā, ’ua puta maira i roto i tōʼu feruriraʼa te hōʼē ʼāʼamu nō roto mai i te mau pāpaʼiraʼa moʼa—te taime ʼa faʼaue ai te Fatu ’ia Nephi ’ia hāmani i te hōʼē pahī : « ’E ’ua parau maira te Fatu iāʼu, nā ’ō maira, e tarai ʼoutou i te hōʼē pahī, i tei au i te hōhoʼa tāʼu e faʼaʼite atu ia ’oe nā, ’ia faʼauta atu vau i tā ’oe ra mau taʼata i tera pae mai ʼo teie nei miti » (1 Nephi 17:8 ; ’āpitihia atu te haʼapāpūraʼa).
I vai nā Nephi ’e tōna ʼutuāfare i roto i te medebara e rave rahi matahiti, ma te faʼaʼoromaʼi i te mau huru ʼati atoʼa. ’Ua nehenehe iāna ’ia mataʼu nō te haʼamata i te hōʼē tere nā niʼa i te moana ’e ’ia vaiiho i tōna mau riʼariʼa ’ia pūai atu ā i tōna iho faʼaroʼo. ’Aita rā ʼoia i nā reira. ’Ua fāriʼi ’e ’ua haʼapaʼo ʼoia i te mau faʼaueraʼa ʼa te Atua. E faʼaroʼo tōna ē e faʼatupuhia Tāna mau fafauraʼa. ’Aita roa atu te Fatu i parau ia Nephi ē e’ita te mau vero e tupu ’aore rā e e’ita te mau ’are e tāʼiri i te pahī. ’Ua parau rā ʼOia ia Nephi ē ’ia peʼe ʼoia i Tāna mau arataʼiraʼa, e nehenehe iāna ’ia arataʼi i tōna ʼutuāfare ma te pāruruhia nā niʼa i te moana e tae atu i te fenua i parauhia.
’Ua ʼite aʼera vau ē ’ua tere atoʼa vau nā roto i te hōʼē medebara e rave rahi matahiti, i teie nei rā tei mua vau i te miti, i te faʼaineineraʼa nō te hōʼē tere ʼāpī : Te faʼaipoiporaʼa. ’Ua piʼihia vau—’e tē manaʼo nei au ē teie te huru nō te mau ʼutuāfare Feiā Moʼa atoʼa i te mau mahana hopeʼa nei—’ia hāmani i te hōʼē pahī ma te peʼeraʼa i te mau arataʼiraʼa ʼa te Atua.
’Ia oti māua tāʼu tāne i te faʼaipoipohia, ’ua tae mai te mau fifi. ’Ua maʼihia vau, ’e ’ua fifi māua i te faʼa’āfaroraʼa i tā māua tereraʼa faufaʼa ’e te faʼaʼohiparaʼa i te mau peu maitaʼi tā māua i faʼaoti i te peʼe.
’Ua vai noa rā te aʼo tāʼu i fāriʼi i roto i tōʼu ʼāʼau. ’Ua tāmata māua i te mau mahana atoʼa ’ia haʼapiʼi mai ’e ’ia here i te parau ʼa te Atua i roto i tō māua ʼāʼau, ’ia peʼe i te mau hiʼoraʼa maitaʼi o tō māua feiā faʼatere—’oia ato’a te Mesia—’e ’ia haʼamaitaʼi i tō māua huru. ’Ua noaʼa iāʼu te hōʼē ʼiteraʼa pāpū pūai aʼe nō te pure ’e ’ua tāmata mau vau i te here ʼo te Metua nō māua. ’Ua haʼamata vau i te tiʼaturi rahi ’e i te faʼaiti mai i te mataʼu. ’Ua ʼite māua ē te mau fifi tā māua i faʼaruru ’ua riro ïa ’ei mau taʼahiraʼa ’ia maitaʼi atu. I teie mahana e au ra ’ua riro tō māua ʼutuāfare ’ei vāhi iti nō te raʼi.
Tei te haʼamataraʼa noa ā māua nō tō māua tere, ’ua riro rā te faʼaipoiporaʼa ’e te haʼamataraʼa i te hōʼē ʼutuāfare ’ei māʼitiraʼa maita’i roa aʼe o tāʼu i rave. ’Ua ’ī roa tōʼu ʼāʼau i te ʼoaʼoa ’ia feruri anaʼe au nō niʼa i te ʼōroʼa nō te hiero tā māua i fāriʼi ’e ’ia ʼite ē ’ua taʼatihia te reira e te mana ʼo te Atua. Te rahi ʼo tōʼu ta’araʼa nō ni’a i te faufaʼa rahi o te ʼutuāfare i roto i te ʼopuaraʼa ʼa te Metua i te Ao ra ’e te moʼaraʼa o te fafauraʼa tā māua i rave, te rahi ’ua hinaʼaro vau ’ia tauturu i te tahi atu mau ʼutuāfare ’ia fāriʼi i te hōʼē ā ʼōroʼa.
’Ua haʼapiʼi mai au ē e’ita e tiʼa ia tātou ’ia haʼapeʼapeʼa nō niʼa i te mea o te tupu mai, nō te mea « e ’ere hoʼi i te ʼāʼau taiā tā te Atua i hōroʼa mai nō tātou ; i te ʼāʼau itoito rā, ’e te aroha, ’e te haʼapaʼo maitaʼi » (2 Timoteo 1:7). E tiʼa noa ia tātou ’ia haʼapaʼo, ’ia peʼe i te mau arataʼiraʼa tei hōroʼahia mai nā roto i te mau pāpaʼiraʼa moʼa ’e te mau parau a te mau peropheta nō teie nei tau, ’e ’ia ani nā roto i te pure nō te tahi atu ā mau arataʼiraʼa nō tātou iho. ’Ia rave tātou i teie mau mea, e nehenehe tātou e tere atu nā niʼa i te miti nō teie mau mahana hopeʼa nei ma te tiʼaturi e noa atu e aha te huru ʼo te peʼapeʼa o te tāʼiri ia tātou, e pāruruhia te mau taʼata tei herehia e tātou.