Agalelei, Alofa Mama, ma le Alofa
Saunia e Peresitene Thomas S. Monson
Sei o tatou suesueina o tatou olaga ma naunau e mulimuli i le faataitaiga a le Faaola e ala i le agalelei, agaalofa, ma le alofa mama.
Ou uso pele, ua faamamaluina a’u i le avanoa e lauga atu ai ia te outou i lenei faatasiga i le lalolagi atoa o e umiaina ma le faamaoni le perisitua a le Atua. O lenei afiafi ou te toe faasino atu i se autu sa ou lauga atu ai muamua.
Sa otootoina e le perofeta o Mamona se tasi o uiga autu o le Faaola lea e ao ona faataitai i ai Ona soo. Na ia saunoa:
“Afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mama; aua afai e le i ai ia te ia le alofa mama, o se mea noa o ia; o le mea lea e ao ai ina i ai ia te ia le alofa mama.
“Ma o le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava [mea], e le faaitagofie. …
“O le mea lea, ou uso pele e, afai e le ia te outou le alofa mama o ni mea noa outou, ona e le uma le alofa mama. O le mea lea, ia outou fusi ai i le alofa mama, le mea ua silisili lea i mea uma, ona e iu mea uma—
Ae o le alofa mama o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.”1
Uso e, tatou te le faamamaluina le perisitua a le Atua pe afai tatou te le agalelei i isi.
O la’u uo pele ma paaga ia Elder Joseph B. Wirthlin o se tamalii agalelei moni lava. Na ia saunoa:
“O le agalelei o le ute lea o se olaga faaselesitila. O le agalelei o le auala lea e taulimaina ai e se tagata FaaKeriso isi. O le agalelei e tatau ona faatumulia ai a tatou upu ma amioga i galuega, i le a’oga, i le lotu, aemaise lava i o tatou aiga.
“O Iesu, o lo tatou Faaola, o le faataitaiga silisili lea o le agalelei ma le agaalofa.”2
Ua aoaoina i tatou e tusitusiga paia e faapea o le faaaogaina ma le amiotonu o le perisitua e faalagolago lea i lo tatou ola ai i mataupu faavae o le agalelei, alofa mama, ma le alofa. I le Mataupu Faavae ma Feagaiga tatou te faitau ai:
“E leai se mana po o se aafiaga e mafai pe tatau ona faatumauina ona o le perisitua, nao i le faatauanau, … i le agamaualalo ma le agamalu, ma le alofa faamaoni;
“I le agalelei, ma le malamalama manino, lea o le a faalautele tele ai le agaga e aunoa ma le pepelo, ma aunoa ma le faaʼoleʼole.”3
Uso e, ia tatou suesueina o tatou olaga ma naunau e mulimuli i le faataitaiga a le Faaola e ala i le agalelei, agaalofa, ma le alofa mama. Ma a tatou faia faapea, o le a tatou i ai i se tulaga lelei atu e valaau atu ai i mana o le lagi mo i tatou lava, mo o tatou aiga, ma mo o tatou uso o malaga i lenei malaga e faigata i nisi taimi, e toe foi atu ai i lo tatou aiga faalelagi. Ou te molimau atu ai i le suafa o Iesu Keriso le Alii, amene.