Elder Adilson de Paula Parrella

Fitugafulu o le Pulega Aoao

Ina ua valu tausaga o Elder Adilson de Paula Parrella, sa amata ona aoao atu e faifeautalai lona aiga e uiga i le Perofeta o Iosefa Samita ma le Toefuataiga o le talalelei.

“E oo lava ao tamaitiiti, ou te lei fesiligia lava le moni o le vaaitino o Iosefa Samita i le Atua ma Iesu Keriso,” o le tala lea a Elder Parrella, o le na lagolagoina i le aso 1 o Aperila, 2017, o se Fitugafulu o le Pulega Aoao. “Ou te lei masalomia lava lena mea talu mai lena taimi.”

Sa soifua mai Elder Parrella i le 1962 i Guarujá, Pasila, i le talafatai o Atelenitika e latalata i São Paulo, ia Fioravante ma Vany de Paula Parrella.

Na faamisiona uma ona uso matutua e toalua. O a laua faataitaiga faapea ma se epikopo alofa, o Angelino Borges de Freitas, o le na aoaoina o ia i le ala e avea ai ma se tasi e umia le Perisitua Arona, na faamumuina i totonu ia te ia se manao e auauna atu i se misiona talai. O le auaunaga faafaifeautalai na toe faamalosia atu ia te ia “le moni o le Atua ma Lona Alo ma o i tatou uma o fanau a le Atua.”

Ina ua uma ona auauna atu i le Misiona a Pasila Porto Alegre, sa auai atu Elder Parrella i le Iunivesite o Polika Iaga i Provo, Iuta, ISA, lea sa ia maua ai se faailoga o le tagata malaga i fesootaiga ma se faailoga o le matuaofaiva o pulega faapisinisi. Sa ia galue o se pule faatonusili i le Polychrome Kodak Graphics ma o se faipaaga i le Korn Ferry Faavaomalo. Talu ai nei sa avea o ia o se paaga i le Caldwell Partners.

Sa ia faaipoipo atu ia Elaine Finholdt ia Tesema 1988 i le Malumalu o São Paulo Pasila. O i la’ua o ni matua o se fanau tama e toalima.

Sa auauna atu Elder Parrella o se peresitene o se paranesi, epikopo, fautua maualuga, fesoasoani i se au peresitene o le siteki, Fitugafulu Eria, ma peresitene o le Misiona a Pasila Belo Horizonte mai le 2009 i le 2012.

Talu mai le taimi sa ia feiloai ai i faifeautalai, sa avea lona olaga o se malaga ina ia malamalama i lagona sa ia oo i ai o se tagata e valu tausaga le matua. O le auai atu i le lotu, faaauau pea ona aoao mai i le afioga a le Atua, ma taumafai ia ola i poloaiga na fesoasoani ia faalauteleina lana vaaiga mai sina tepa i le upumoni lea na tuuina atu ia te ia o se tamaitiiti. “O le malo moni lava lenei a le Atua i luga o le fogaeleele,” na ia saunoa ai.