O Le Aiga Atua ma le Ata o le Faaolataga
Saunia e Elder Dallin H. Oaks
O Le Korama a Aposetolo e Toasefululua
Ona ua i ai ia i tatou le upumoni e uiga i le Aiga Atua ma lo tatou sootaga ia i Latou, ua tatou maua ai le faafanua sili mo la tatou malaga i le olaga faaletino.
I.
O la tatou uluai mataupu faavae o le faatuatua o loo tautino mai: “Matou te talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia.” Ua tatou aufaatasi ma isi Kerisiano i lenei talitonuga i se Tama ma se Alo ma se Agaga Paia, ae o le mea ua tatou talitonu i ai e uiga ia i Latou e ese mai talitonuga o isi. Tatou te le talitonu i le mea ua ta’ua e le lalolagi Kerisiano o le aoaoga faavae o le Tolutasi Paia.I lana Uluai Faaaliga, na vaai ai Iosefa Samita i ni peresona eseese se toalua, e toalua tagata, lea ua faamanino mai ai o talitonuga na taatele i lena taimi e faatatau i le Atua ma le Aiga Atua e le moni.
I se eseesega i le talitonuga e faapea o le Atua o se tagatalilo e le mafai ona malamalama i ai ma iloaina o le upumoni o le natura o le Atua ma lo tatou sootaga ma Ia ua iloaina ma o le ki lea i isi mea uma i la tatou aoaoga faavaae. O loo tusia i le Tusi Paia le Tatalo Faatoga maoae a Iesu, lea na Ia tautino atu ai e faapea “o le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3).
O le taumafaiga ina ia iloa le Atua ma Lana galuega na amataina a o lei i ai le olaga faaletino ma o le a le faamutaina iinei. Na aoao mai le Perofeta o Iosefa Samita, “O le a i ai sina taimi pe a uma ona e pasi atu i le veli faatoa e aoaoina [ai mataupu faavae uma o le faaeaga].”1 Tatou te atiae i luga o le malamalama na tatou mauaina i le muai lalolagi o agaga. O lea, i le taumafai ai e aoao Isaraelu i le natura o le Atua ma Lona sootaga ma Lana fanau, sa tautino mai ai le perofeta o Isaia, e pei ona faamaumauina i le Tusi Paia:
“Tou te faatusa le Atua ia te ai? Se a foi se faatusa tou te faatusaina ai o ia? …
“Tou te le iloa ea? Tou te lei faalogo ea? E lei ta’uina atu ea ia te outou mai le amataga? Tou te lei lagona ea mai le faavaeina o le lalolagi?” (Isaia 40:18, 21).
Ua tatou iloa o tagata e toatolu o le Aiga Atua o ni tagata mavaevae ma patino. Ua tatou iloaina lenei mea mai le faatonuga na tuuina mai e le Perofeta o Iosefa Samita: “Ua i le Tama se tino o aano ma ivi e mafai ona pa’i i ai e pei o le tagata; ua faapea foi le Alo, ae o le Agaga Paia e leai se tino o aano ma ivi, ae o se peresona Agaga. A na le faapea, e le mafai e le Agaga Paia ona mau i totonu o i tatou” (MF&F 130:22).
E tusa ai ma le tulaga silisili o le Atua le Tama i totonu o le Aiga Atua, e faapea foi ma matafaioi fitoitonu e faatinoina e peresona taitoatasi, na faamalamalama mai ai e le Perofeta o Iosefa:
“Soo se tagata lava na vaai ua tatala le lagi, e iloa e toatolu Tagata i le lagi o e umia ki o mana, ma e toatasi e pulefaamalumalu ia i latou uma. …
“… O nei tagata … ua ta’ua o le Atua le muamua, o le Foafoa; o le Atua le lua, o Le Faaola; ma le Atua le tolu, o le Molimau po o Le e Molimauina.
“[Ua i ai] le pule i le Tama e pulefaamalumalu ai o le Pule Sili po o le Peresitene, o Iesu o le Puluvaga, ma le Agaga Paia o le Molimau po o Le e Molimauina.”2
II. O Le Fuafuaga
Ua tatou malamalama i lo tatou sootaga i tagata o le Aiga Atua mai mea ua faaalia mai e uiga i le ata o le faaolataga.
O fesili e pei o le, “O fea na tatou o mai ai?” “Aisea ua tatou i ai iinei?” ma le “O fea tatou te o i ai?” ua taliina i mea ua ta’ua e tusitusiga paia o le “ata o le faaolataga,” le “fuafuaga sili o le fiafia,” po o le “fuafuaga o le togiola” (Alema 42:5, 8, 11). O le talalelei a Iesu Keriso ua tutotonu i lenei fuafuaga.
I le avea ai ma fanau agaga a le Atua, i se olaga na muamua atu i le olaga faaletino nei, na tatou mananao i se taunuuga o le ola e faavavau ae na gata lo tatou alualu i luma ona sa aunoa ma se olaga faaletino i se tino faitino. Ina ia maua lena avanoa, sa pulefaamalumalu ai lo tatou Tama Faalelagi i le Foafoaga o lenei lalolagi, lea, na aveesea ai lo tatou manatuaina o mea na muamua atu i lo tatou fanau mai i la le tino, ina ia mafai ona tatou faamaonia atu lo tatou naunautaiga e tausia Ana poloaiga ma tofo i ai ma tuputupu ae e ala i isi luitau o le olaga faaletino. Ae i le ala o lena olaga faaletino, ma i se taunuuga o le Pa’u o o tatou uluai matua, o le a tatou mafatia i le oti faaleagaga e ala i le vavaeeseina mai le afioaga o le Atua, ia faaeleeleaina i le agasala, ma noatia ai i le oti faaletino. O le fuafuaga a le Tama ua faamoemoeina ma saunia ni auala e faatoilalo ai na papupuni uma.
III. O Le Aiga Atua
I le iloaina o le faamoemoega o le fuafuaga sili a le Atua, tatou iloiloina nei ia matafaioi fitoitonu a tagata e toatolu o le Aiga Atua i lena fuafuaga.
Tatou amata i se aoaoga mai le Tusi Paia. I le faaiuina ai o lana tusi lona lua i tagata Korinito, sa toetoe lava a faasamasamanoa le Aposetolo o Paulo i le faia o lenei maufaasino i le Aiga Atua o le Tama, le Alo, ma le Agaga Paia: “Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le mafutaga [“po o le faaaumea”3] a le Agaga Paia” (2 Korinito 13:14).
O lenei mau o le tusi paia ua fai ma faatusa o le Aiga Atua ma faamaonia ai le alofa manino ma le faaosofia o le Atua le Tama, le misiona alofa mutimutivale ma le faaola a Iesu Keriso, ma le faaaumea a le Agaga Paia.
Le Atua le Tama
E amata uma lava i le Atua le Tama. E ui tatou te iloa sina mea e uiga ia te Ia, ae o le mea ua tatou iloa e matua taua lava i le malamalama ai i Lona tulaga silisili, lo tatou sootaga ma Ia, ma Lana matafaioi tupito i le ata o le faaolataga, le Foafoaga, ma isi mea uma na sosoo mai ai.
E pei ona tusia e Elder Bruce R. McConkie a o lumanai ai lona maliu: “I le lagona silisili ma le faaiu o le upu, e na o le tasi lava le Atua moni ma soifua. O Ia o le Tama, le Elohima Silisiliese, o le Tagata Silisili, le Foafoa ma Pule o le atulaulau.”4 O Ia o le Atua ma le Tama o Iesu Keriso, ma faapena foi ma i tatou uma. Sa aoao mai Peresitene Tavita O. MaKei e faapea “o le uluai upumoni autu lava na fetalai ai Iesu Keriso o lenei, o tua, o luga ma soo se mea lava o loo i ai le Atua le Tama, le Alii o le lagi ma le lalolagi.”5
O mea tatou te iloa e uiga i le natura o le Atua le Tama o le mea silisili lea e mafai ona tatou aoaoina mai le galuega ma aoaoga o Lona Alo e Toatasi na Fanaua, o Iesu Keriso. E pei ona aoao mai Elder Jeffrey R. Holland, o se tasi o faamoemoega silisili o le galuega a Iesu o le faaali mai lea i tagata “pe faape’i le Atua lo tatou Tama Faavavau, … ina ia faaalia ma faapatino ia i tatou le natura moni o Lona Tama, lo tatou Tama i le Lagi.”6 O loo i ai i le Tusi Paia se molimau faaaposetolo o Iesu sa “tusa lava” ma Lona Tama (Eperu 1:3), lea e faamanino atili ai le aoaoga a Iesu lava ia e faapea “o le ua vaai mai ia te a’u ua vaai o ia i le Tama” (Ioane 14:9).
O le Atua le Tama o le Tama o o tatou agaga. O i tatou o Ana fanau. E alofa o Ia ia i tatou, ma o mea uma Na te faia, e faia mo lo tatou manuia e faavavau. O Ia o le Mataisau o le ata o le faaolataga, ma e ala i Lona mana ua ausia ai e Lana fuafuaga ona faamoemoega mo le mamalu silisili o Lana fanau.
O Le Alo
I tagata i la le tino, o le tagata aupito sili ona vaaia o le Aiga Atua o Iesu Keriso. O se faamatalaga sili faaleaoaoga faavae a le Au Peresitene Sili i le 1909 ua tautino mai ai o Ia “o le ulumatua o atalii uma o le Atua—o le alo muamua na fanaua i la le agaga, ma o le alo e toatasi na fanaua i la le tino.”7 O le Alo, le silisiliese o tagata uma, na filifilia e le Tama e faataunuu le fuafuaga a le Tama—ia faaaoga le mana o le Tama e foafoa ai lalolagi lemafaitaulia (tagai Mose 1:33) ma ia faaola le fanau a le Atua mai le oti e ala i Lona Toetu ma mai le agasala e ala i Lana Togiola. O lenei taulaga paia ua ta’ua moni lava “o le faatinoga autu lea o le talafaasolopito atoa o le tagata.”8
I na taimi tulagaese ma paia na faailoa patino mai ai e le Atua le Tama ia le Alo, Na te fetalai mai lava, “O lo’u atalii pele lena: faalogo ia te ia” (Mareko 9:7; Luka 9:35; tagai foi 3 Nifae 11:7; Iosefa Samita—Talafaasolopito 1:17). O lea, o Iesu Keriso, le Ieova, le Alii le Atua o Isaraelu, o loo fetalai atu ma auala mai i perofeta.9 O le mea la lena ina ua faaali atu Iesu ia sa Nifae i le mavae ai o Lona Toetu, na Ia faailoa atu o Ia lava “o le Atua o le lalolagi uma” (3 Nifae 11:14). Ma o le tulaga lena e masani ona fetalai atu ai Iesu i perofeta o le Tusi a Mamona ma le Au Paia o Aso e Gata Ai i le tulaga “o le Tama ma le Alo,” o se ulutala na faamalamalamaina i le tautinoga faaleaoaoga faavae musuia a le Au Peresitene Sili ma le Korama e Toasefululua i le 100 tausaga talu ai.10
O Le Agaga Paia
O le tagata lona tolu o le Aiga Atua o le Agaga Paia, ua faasino atu foi i ai o le Agaga Paia, le Agaga o le Alii, ma Le Faamafanafana. O Ia o le tagata o le Aiga Atua o le puna o faaaliga patino. I le avea ai ma se peresona o agaga (tagai MF&F 130:22), e mafai ona afio o Ia i totonu o i tatou ma faatino le matafaioi taua o fesootaiga i le va o le Tama ma le Alo ma le fanau a le Atua i luga o le fogaeleele. E tele mau ua aoao mai ai o Lana misiona o le molimau mai e uiga i le Tama ma le Alo (tagai Ioane 15:26; 3 Nifae 28:11; MF&F 42:17). Sa folafola mai e le Faaola o le Fesoasoani o le a aoao maia ia i tatou mea uma, faamanatu mai ia i tatou mea uma, ma taitai atu i tatou i upumoni uma (tagai Ioane 14:26; 16:13). O lea, ua fesoasoani ai le Agaga Paia ia i tatou ia iloatino le va o le upumoni ma le measese, taiala i tatou i a tatou faaiuga tetele, ma fesoasoani ia i tatou i o tatou luitau o le olaga faaletino.11 O Ia foi le ala e faapaiaina ai i tatou, o lona uiga, o le faamamaina ma le faapaiaina mai le agasala (tagai 2 Nifae 31:17; 3 Nifae 27:20; Moronae 6:4).
IV.
E faapefea la ona fesoasoani le malamalamaaga i lenei aoaoga faavae faalelagi ua faaali mai e uiga i le Aiga Atua ma le ata o le faaolataga ia i tatou i o tatou luitau o aso nei?
Ona ua i ai ia i tatou le upumoni e uiga i le Aiga Atua ma lo tatou sootaga ia i Latou, o le faamoemoega o le olaga, ma le natura o lo tatou taunuuga e faavavau, ua tatou maua ai le faafanua sili ma le faamautinoaga mo la tatou malaga i le olaga faaletino. Ua tatou iloa po o ai o loo tatou tapuai atu i ai ma pe aisea foi ua tatou tapuai atu ai. Ua tatou iloa po o ai i tatou ma tagata e mafai ona tatou avea ai (tagai MF&F 93:19). Ua tatou iloa le ua mafai ai mea uma lava, ma ua tatou iloa le mea e tatau ona tatou faia ia olioli ai i faamanuiaga silisili e oo mai e ala mai i le ata o le faaolataga a le Atua. E faapefea ona tatou iloa nei mea uma? Ua tatou iloa e ala i faaaliga a le Atua i Ana perofeta ma ia i tatou taitoatasi patino.”
I le ausiaina o le mea ua faamatalaina e le Aposetolo o Paulo o le “oo i le fua o le ua matua e tatau ma le tumu o Keriso” (Efeso 4:13) e manaomia ai se mea e matua sili atu lava nai lo le mauaina o le malamalama. E matua le lava lava mo i tatou le faatalitonuina i le talalelei; ae tatau ona tatou amio ai ma mafaufau ai ina ia mafai ona tatou liua ai i le [talalelei]. I se faatusatusaga i faatulagaga o le lalolagi, lea e aoao ai i tatou ina ia iloa se mea, ua lu’iina ai i tatou e le ata o le faaolataga ma le talalelei a Iesu Keriso ia avea ma se [tagata e tatau ai].
E pei ona aoaoina i tatou e Peresitene Thomas S. Monson i la tatou konafesi aoao talu ai:
“E taua i le fuafuaga [o le faaolataga] o lo tatou Faaola, o Iesu Keriso. Ana le aunoa ma Lana taulaga togiola, semanu e leiloloa tagata uma. Peitai, e le lava le tau na ona talitonu ia te Ia ma Lana misiona. E manaomia ona tatou galulue ma aoao, saili ma tatalo, salamo, ma faaleleia. E manaomia ona tatou iloa tulafono a le Atua ma ola ai. E manaomia ona tatou mauaina Ana sauniga faaola. E na o le faia lava o lena mea o le a tatou maua ai le fiafia moni e faavavau. …
“Mai le taele o lo‘u agaga ma i le lotomaualalo atoa,” na folafola mai e Peresitene Monson, “ou te molimau atu i le meaalofa sili, o le fuafuaga lea a lo tatou Tama mo i tatou. O le ala atoatoa lea e tasi i le filemu ma le fiafia iinei ma i le lalolagi a sau.”12
E faaopoopo atu la’u molimau i le molimau a lo tatou perofeta-peresitene pele. Ou te molimau atu ua i ai so tatou Tama Faalelagi, e alofa ia i tatou. Ou te molimau atu ua i ai so tatou Agaga Paia, o le e taiala i tatou. Ma ou te molimau ai ia Iesu Keriso, lo tatou Faaola, ua mafaia ai mea uma, i le suafa o Iesu Keriso, amene.