O Le Malumalu e Matagofie
Saunia e Carol F. McConkie
Fesoasoani Muamua i le Au Peresitene o Tamaitai Talavou
Ua saunia e lo tatou Tama oi le Lagi mea uma e manaomia mo i tatou ina ia tatou paia e pei o Ia.
Ao o’u sauni mo lenei sauniga, na liliu atu lo’u loto i le toatele o uso faamaoni o e na ou feiloai i ai, latalata ma mamao. Mo a’u, ua sili ona faamatalaina i latou i se salamo o le faafetai a le Tupu o Tavita: “Ia outou avatua ia Ieova le viiga o lona suafa; ia outou avatu taulaga, ma outou o atu i ona luma, ia outou ifo atu ia Ieova i le malumalu e matagofie.”1
Ua ou vaai i le malumalu e matagofie i uso o e taulai atu o latou loto i mea lelei uma, o e fia avea faapei o le Faaola. Latou te ofo atu lo latou agaga, loto, mafaufau, manatu, ma le malosi atoa i le Alii i le auala o latou ola ai i aso uma.2 O le paia o loo i ai i le taumafai ma le tauivi ina ia tausia poloaiga ma faamamalu i feagaiga sa tatou osia ma le Atua. O le paia o le faia o filifiliga o le a avea ai pea le Agaga Paia ma o tatou taiala.3 O le paia o le tuuese lea o tatou faanaunauga natura ma ia avea ma se tagata paia e ala i le togiola a Keriso le Alii.4 O taimi uma lava o [tatou] olaga e tatau ona paia i le Alii.”5
Na poloaiina e le Atua o le lagi le fanauga a Isaraelu, “Aua o A’u o Ieova lo outou Atua; ia faapaiaina outou e outou, ma ia paia outou; aua e paia lava a’u; aua lava nei leaga outou.”6
Na aoao mai e Elder D. Todd Christofferson: “O lo tatou Tama Faalelagi o se Atua o ni faamoemoega maualuluga. … Ua Ia apoapoai mai ina ia faapaiaina i tatou ia mafai ai ona tatou ‘nonofo i se mamalu selesitila’ (MF&F 88:22) ma ‘nonofo ai i lona afioaga’ (Mose 6:57).”7 Ua faamalamalama mai e le Lectures on Faith, “E leai se tagata e mafai ona fiafia i lona mamalu e aunoa ma le mauaina o lona atoatoaga ma le paia.”8 E silafia i tatou e lo tatou Tama o i le Lagi. E alofa o Ia ia i tatou, ma ua Ia saunia mea e manaomia mo i tatou uma ina ia tatou paia e pei o Ia.
O i tatou o afafine o le Tama Faalelagi, ma ua tofu i tatou ma se talatuu faalelagi o le paia. Ua folafola mai e lo tatou Tama o i le Lagi, “Faauta, o A’u o le Atua; o le Tagata Paia o lo’u Igoa lea.”9 I le muai olaga, sa tatou alolofa i lo tatou Tama ma ifo ia te Ia. Tatou te mananao ia pei o Ia. Ona o le alofa atoatoa faatamā, na Ia auina mai ai Lona Alo Pele, o Iesu Keriso, e avea ma o tatou Faaola ma Togiola. O Ia o le Atalii o le Tagata e Paia.10 O Lona “suafa e Paia,”11 “o le Paia e Toatasi o Isaraelu.”12
O lo tatou faamoemoe mo le paia ua faatotonugalemu ia Keriso, i Lona alofa mutimutivale ma Lona alofa tunoa. O le faatuatua ia Iesu Keriso ma Lana Togiola, e mafai ai ona tatou mamā, aunoa ma se ila, pe a tatou faafiti i tatou lava mai mea e le faaleatua13 ma salamo faamaoni. E papatisoina i tatou i le vai mo le faamagaloga o agasala. E faapaiaina o tatou agaga pe a tatou maua le Agaga Paia ma loto matala. O vaiaso taitasi, tatou te aai ma feinu ai i le sauniga o le faamanatuga. I le agaga o le salamo, ma manaoga faamaoni mo le amiotonu, tatou te osifeagaiga ai ua tatou malilie e tauave i o tatou luga le suafa o Keriso, manatua pea o Ia, ma tausi Ana poloaiga ina ia tatou maua pea Lona Agaga e faatasi ma i tatou. Mulimuli ane, ao tatou taumafai e le aunoa ina ia tasi ma le Tama, le Alo, ma le Agaga Paia, o le a tofusia i tatou ma se vaega o lo latou natura paia.14
O Le Paia o le Tausia Lea o a Tatou Feagaiga
Ua tatou iloaina le anoanoai o tofotofoga, faaosoosoga, ma faigata lea e mafai ona tosoesea i tatou mai mea uma e mama ma tauleleia i luma o le Atua. Peitai ua ofo mai e o tatou aafiaga faaletino le avanoa e filifili ai le paia. E masani lava o osigataulaga tatou te faia e tausia ai a tatou feagaiga lea e faamamaina ai i tatou ma faapaiaina.
Sa ou vaaia le paia i foliga o Evangeline, o se teineitiiti e 13 tausaga i Kana. O se tasi o auala na te tausia ai ana feagaiga, o le faalautele lea o lona valaauga o se peresitene o le vasega Ofagapi. Sa ia faamatala mai ma le lotomaualalo lona alu i fale o ana uo, tamaitai talavou ua le o toe toaaga mai, e talosaga atu i o latou matua e faataga i latou e o mai i le lotu. Sa tau atu e matua ia te ia e faigata tele ona o Aso Sa e tatau ona faia e fanau feau o le aiga. O lea e alu ai Evangeline ma fesoasoani i feau, ma o ana taumafaiga e masani ona faataga ai ana uo e o mai i le lotu.
Afai o le a tatou tausia feagaiga fesootai, o le a suia, faapaia, ma saunia i tatou e sauniga paia o le perisitua e ulu atu i le afioaga o le Alii.15 O lea tatou te tauave ai avega a le tasi ma le isi; tatou te faamalosia le tasi ma le isi. Tatou te faatumauina le faamagaloga o agasala pe a tatou tuuina atu le toomaga faaleagaga ma faaletino i e matitiva, e fia ‘aai, e lē lavalava, ma e mama’i.16 Tatou te tausia i tatou mai le pisia mai le lalolagi pe a tatou tausia le aso Sapati ma talia ma le agavaa le faamanatuga i le aso paia o le Alii.17
Tatou te faamanuiaina o tatou aiga ma faia o tatou fale e avea ma nofoaga paia. Tatou te pulea o tatou tuinanau ina ia faatumuina i tatou i le alofa mama ma tumau.18 Tatou te aapa atu i isi i le agalelei, ma le agaalofa, ma tutu o ni molimau o le Atua. E avea i tatou ma nuu o Siona, e tasi le loto ma le mafaufau, o se nuu e mama o e na nonofo faatasi i le lotogatasi ma le amiotonu.19 Aua e ao ina faateleina Siona i le matagofie, ma i le paia.”20
Uso e, o mai i le malumalu. Afai o le a avea i tatou ma se nuu paia ua saunia e talia le Faaola i Lona afio mai, e tatau ona tatou tutulai ae ma oofu o tatou ofu matagofie.21 O le malosi ma le mamalu, tatou te lafoai auala o le lalolagi ma tausi a tatou feagaiga ina ia “faaoofuina i [tatou] i le mamā, ioe, i le ofu talaloa lava o le amiotonu.”22
O Le Paia o le Avea Lea o le Agaga Paia ma o Tatou Taiala
O le paia o se meaalofa a le Agaga. Tatou te taliaina lenei meaalofa pe a tatou filifili e faia na mea o le a faateleina ai le mana faapaiana o le Agaga Paia i o tatou olaga.
Ina ua taliaina e Mareta Iesu Keriso i lona fale, sa ia lagonaina se manaoga sili ia auauna atu i le Alii i le mea e gata ai lona malosi. O lona uso, o Maria, na filifili e saofai “i vae o Iesu” ma faalogo i Ana fetalaiga. Ina ua tiga Mareta i le auauna atu e aunoa ma se fesoasoani, sa muimui o ia, “Le Alii e, e te le manatu mai ea, ina ua tuu mai e lo’u uso ia te au e sauni toatasi?”
Ou te fiafia i upu aoai sili ona agamalu e mafai ona ou mafaufauina. Faatasi ai ma le alofa atoatoa ma le agaalofa e le uma, na apoapoai atu ai le Faaola:
“Mareta e, Mareta e, ua e popole ma ua pupu lou loto i mea e tele:
“A o le mea lava e tasi e ao ina ia maua: ua filifilia foi e Maria lea mea lelei, e le aveeseina ia te ia.”23
Uso e, ina ia mafai ona tatou paia, e ao ona tatou aoao ia saofafai i vae o le Paia e Toatasi o Isaraelu ma tuu atu le taimi ia faapaiaina ai. O tatou tuueseina le telefoni, lisi e le muta o mea e fai, ma popolega faalelalolagi? O le tatalo, suesue, ma le usiusitai i le afioga a le Atua e valaaulia ai Lona alofa faamamaina ma faamalolo e oo mai i totonu o o tatou agaga. Sei o tatou faaaluina se taimi e faapaia ai, ina ia faatumuina i tatou i Lona Agaga paia ma le faapaiaina. O le avea ai o le Agaga Paia ma o tatou taiala, o le a tatou saunia e talia le Faaola i le matagofie o le paia.24
O Le Paia o le Avea lea ma se Tagata Paia e ala i le Togiola a Iesu Keriso
E tusa ai ma upu musuia a le Tupu a Peniamina, o i latou o avea ma tagata paia e ala i le Togiola a Iesu Keriso o i latou ia e usiusitai, agamalu, lotomaualalo, onosai, ma tumu i le alofa.25 Na ia valoia o Iesu Keriso, “le Alii Mamana Aoao o lē nofotupu, o lē sa i ai, ma o loo i ai mai le faavavau atoa e oo i le faavavau atoa, ma o le a mau o ia i se fale apitaga omea.” Na Ia afio mai e faamanuia i e mama’i, pipili, tutuli, ma e tauaso ma faatutuina mai ē ua oti. Ma sa Ia mafatia “e sili atu i lo le mea e mafai e le tagata ona onosaia, vagana ai ua oti.”26 Ma e ui ua na o Ia e toatasi e ala mai ai le olataga, sa ulagia o Ia, sauaina, ma faasatauroina. Peitai na toetu mai le Alo o le Atua mai le tuugamau ina ia mafai e i tatou ona manumalo uma i le oti. O Ia lea o le a tulai e faamasino le lalolagi i le amiotonu. O Ia lea o le a faaolaina i tatou uma. O Ia lea o le Paia e Toatasi o Isaraelu. O Iesu Keriso o le matagofie o le paia.
Ina ua faalogo le nuu o le Tupu o Peniamina i ana upu, sa latou pauu i le eleele, sa matua faamaualalaloina i latou ma migao mo le alofa tunoa ma le mamalu o lo tatou Atua. Sa latou iloaina lo latou tulaga faaletino. O tatou vaai atu ea i lo tatou faalagolago atoa atu i le alofa tunoa ma le alofa mutimutivale o Keriso lo tatou Alii? O tatou iloaina ea o soo se meaalofa lelei lava, e faaletino ma faaleagaga, e oo mai ia i tatou e ala mai ia Keriso? O tatou manatuaina ea e tusa ai ma le fuafuaga e faavavau a le Tama, o le filemu i le lalolagi ma mamalu o le faavavau e a tatou ia ma ua na o Lona Alo paia e ala mai ai.
Ia tatou auai faatasi ma le nuu o le Tupu o Peniamina ma alalaga leotetele i le leo e tasi, “E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamāina o matou loto; ona ua matou talitonu ia Iesu Keriso, le Alo o le Atua, o lē na foafoaina le lagi ma le fogaeleele, ma mea uma lava.”27
Ou te molimau atu a o tatou o atu i le Paia e Toatasi o Isaraelu, o le a afio ifo i o tatou luga Lona Agaga, ina ia faatumuina i tatou i le olioli ma maua le faamagaloga o agasala ma le filemu o le mafaufau.
Ua tuuina mai e le Atua ia i tatou taitoatasi le gafatia ina ia paia ai. Tau ina ia tatou faia le mea sili e tausia ai a tatou feagaiga ma avea le Agaga Paia ma o tatou taiala. O le faatuatua ia Iesu Keriso, tatou te avea ai ma tagata paia e ala i Lana Togiola, ina ia tatou maua le tino ola pea ma le ola e faavavau ma avatu le viiga i le Atua lo tatou Tama i Lona suafa. Tau ina ia avea pea o tatou olaga o se taulaga paia, ina ia tatou tutu atu i luma o le Alii i le matagofie o le paia. I le suafa paia o Iesu Keriso, amene.