O Pese e Usuina ma Lē Usuina
Saunia e Elder Jeffrey R. Holland
O Le Korama a Aposetolo e Toasefululua
Ou te augani atu ia i tatou uma taitoatasi ia tumau ma le faamaoni pea i le aufaipese.
“Ua susulu mai nei o le la, i lo’u nei agaga,” sa tusia ai e Eliza Hewitt, “sili lona ia pupula mai, O Iesu lona pogai.”1 Faatasi ai ma le olioli i nota uma, o lena viiga Kerisiano ofoofogia anamua e toetoe lava a le mafai ona usuina e aunoa ma le ataata. Ae o le asō ou te fia faia ai se isi faaliliuga i se laina lava se tasi e fesoasoani ai i aso pe a faigata ai ona tatou usuina pe ataata ma le “filemu fiafia” ua foliga mai ua le “tupu.” Afai e i ai se taimi ua e le mafai ai ona faaleoina fati fiafia e te faalogo atu o sau mai isi, ou te talosagaina oe ia taofi mau i le laina i lenei viiga o loo faamautinoa mai ai, “[E] faafofoga mai Iesu i [au] pese fai lemu.”2
Faatasi ai ma isi mea moni o loo tatou fetaiai ai o ni fanau a le Atua o loo ola ma soifua i se lalolagi pagatia, o nisi aso e faigata, o aso e tofotofoina ai lo tatou faatuatua ma lo tatou lototoa. O nei luitau e ono sau mai se mea o misi ia i tatou, o se mea o misi i isi, pe o se mea ua misi lava i le olaga, ae po o le a lava le mafuaaga, ua tatou iloaina e mafai ona latou faoaina mai ia i tatou pese ia tatou te fia usu ai lava, ma faapogisa ai le folafolaga o le “fotu a’e [o le] loto”3 lea e faamanatu mai e Eliza Hewitt i se tasi o ana fuaiupu.
O le a la le tatou mea e fai i taimi faapena? Mo le tasi mea, tatou te opomauina le fautuaga a le Aposetolo o Paulo ma “faamoemoe i le mea ua [tatou] le vaaia … [ma le] faatalitali atu i ai ma le onosai.”4 I na taimi pe a oo ina faaitiitia lo tatou faatuatua i se tulaga ua tatou le toe iloaina ai, atonu e ao ona tatou tutulai ma le filemu mo se taimi ma tau na ona faalogo atu i isi, ma utu le malosi mai le ofoofogia o musika o siomia ai i tatou. O le toatele o i tatou e “faalelelei i mea tau musika” e faamalosia lava lo tatou toafimalie ma le faaleleia o lo tatou usu pese e ala i lo tatou tutu i talaane o se tasi e malosi ma mautinoa le leo e pese ai. E mautinoa lava e faapena foi i le usuina o viiga o le faavavau, e tatau ona tatou matua tutu latalata atu i le mea e mafai ai i le Faaola ma le Togiola o le lalolagi—o le e matua atoatoa Lona siufofoga. Ona tatou maua lea o le lototele mai Lona gafatia e faafofoga ai i a tatou [pese fai lemu] ma maua le faamoemoe mai Lana tatalo faatoga faalemesia matagofie mo i tatou. E moni lava “Pe a lata mai o Ia” e “filemu lo’u loto nei, [ma] le alofa e faaalia.”5
I na aso pe a tatou lagonaina ua fai si pa’ulua o o tatou leo, ua itiiti ifo ma mea tatou te mafaufau ua tatou vaaia pe faalogo atu i ai i isi, ou te talosagaina i tatou, aemaise le autalavou o le Ekalesia, ia manatua o le mamanu faalelagi e le o leo uma i le aufaipese a le Atua e tutusa. E i ai eseesega—leo usu, oloto, tena ma le malū—ina ia faaoaina ai musika. Ina ia nono mai se laina na sii mai i le tusi fiafia a ni tamaitai ofoofogia o le Au Paia o Aso e Gata Ai, “O tagata uma o le Atua e tofu lava ma se nofoaga i le aufaipese.”6 A tatou manatu faatauvaa i lo tatou tulagaese pe taumafai e faaogatusa ma isi ituaiga manatu le moni—ituaiga manatu ia e uunaia e se aganuu faaloloto ma lē faamalieina ma manatu e sili atu le lelei i lo se isi lava mea ua iloa e ala o faasalalauga faaleagafesootai—o le a tatou ma’umauina le oa o le eseesega i le va o tagata lea na finagalo i ai le Atua ina ua Ia foafoaina se lalolagi o eseesega.
Ia, e le o faapea atu la e mafai e tagata uma i lenei aufaipese faalelagi ona amata alaga e ia lana ia vaega patino o le pese! O eseesega, e le o le pule a o le tagata i lana mea e fai, ma o aufaipese e manaomia ai le lotopulea—ae mo lo tatou faamoemoega i le asō, Elder Hales, e mafai ona ou faapea atu, o le avea ma soo—ae o le taimi lava tatou te taliaina ai upu paia ua faaalia ma faatonuga e tasi na fatuina ae lei i ai le lalolagi, ona fiafia lea o lo tatou Tama Faalelagi i lo tatou usuina o pese i lo tatou lava leo, ae le o le faataitai fua o le leo o se isi tagata. Talitonu ia te oe lava ia, ma talitonu ia te Ia. Aua ne’i e manatu mama i lou taua pe ta’ufaatauvaaina lou sao. E sili i lo mea uma, aua ne’i e lafoaia lau matafaioi i le aufaipese. Aisea? Ona o oe e tulagaese; e le mafai ona suitulagaina oe. O le misi ai o se leo se tasi e faavaivaia ai isi uma tagata pepese i la tatou nei aufaipese faaletino tele, e aofia ai le leiloloa atu o i latou ua lagonaina e le o taliaina i latou e faalapotopotoga po o le Ekalesia.
Ae e tusa foi lava pe ou te uunaia oe ia maua le faatuatua e tusa ma pese atonu e faigata ona usuina, ou te faailoa atu ma le naunautai e faapea mo mafuaaga eseese ou te tauivi foi ma isi ituaiga o pese e tatau ona usuina—ae le o—usuina lava.
A ou vaaia le lofituina o le le tutusa faaletamaoaiga i le lalolagi, ou te lagonaina sina ta’usalaina ma usu faatasi ma Mrs. Hewitt o “manuia mai le [Atua], ma fiafia o i ‘luga.”7 E le mafai ona usuina atoatoa ma le faamaoni le pese vagana ua tatou tausia ma le faamaoni e matitiva. O le faaletonu o le tamaoaiga o se fetuu lea e faaauau pea ona fetuuina, i lea tausaga ma lea tausaga ma lea tupulaga i lea tupulaga. Na te faatamaiaina tino, faamanualiaina agaga, faaleagaina aiga, ma faaumatiaina miti. Afai e mafai ona tatou faia nisi mea se tele atu e aveesea ai le mativa, e pei ona poloai mai pea Iesu ia i tatou e fai, atonu o le a mafai e nisi tagata vaivai i le lalolagi ona usuusuina ni nai nota o le “Ua Susulu Mai Nei o le La,” masalo mo le taimi muamua lava i o latou olaga.
E faigata tele foi ia te au ona usu ni upu fiafia ma olioli ae o loo toatele tagata o siomiaina i tatou o loo mafatia mai faamai o le mafaufau ma lagona, po o isi tapulaa faalesoifuamaloloina lofituina. Ae paga lea, o nisi taimi e tumau ai lava nei avega e ui i taumafaiga lototoa a le tele o ituaiga o fomai, e aofia ai ma tagata o le aiga. Ou te tatalo ina ia tatou le tuu atu nei fanau a le Atua ia mafatia leleoa ma o le a faaee mai ia i tatou Lona gafatia tatou te faalogo atu ai i pese e le mafai ona latou usuina.
Ma ou te faamoemoe i se aso o le a laugatasia uma ai le lalolagi atoa e tusa lava po o le a le ituaiga ma gagana, ma tautino atu o fana ma upu faatiga, taua ma upu malolosi e le o le auala lea e taulimaina ai feteenaiga faaletagata. O tautinoga o le tagisa mai o le lagi ia i tatou e faapea e na o le pau le auala e foia ai ma le faamalieina ia faafitauli faigata faalemalo o le alofa lea i le Atua ma tausi Ana poloaiga, o lea e tatala atu ai le faitotoa i le ala faaola tumau e tasi ia alofa le tasi i le isi o ni tuaoi. Na aoao mai le perofeta o Eteru e tatau ona tatou “faamoemoe mo se lalolagi sili atu ona lelei.” I le faitauina ai o lena manatu i le afe tausaga mulimuli ane, sa tautino mai ai Moronae o le sa vaivai i taua ma vesiga e faapea o le “ala e silisili ona lelei” i lena lalolagi o le talalelei lea a Iesu Keriso.8
Tatou te faafetai tele i le lotolotoi o nei ituaiga o luitau e oo mai ai, i lea taimi ma lea taimi, se ituaiga pese e matua ese lava lea tatou te iloaina e le mafai ona usuina, ae mo se mafuaaga e ese ai. O nei lagona e matua loloto lava ma patino, e taufaafefe foi, ia e le mafai pe le tatau foi ona faailoaina—e pei o le alofa o Cordelia mo lona tama, lea na ia fai mai ai: O lo’u alofa … e le mafaamatalaina. … E le mafai foi e upu ona faamatalaina o’u lagona.”9 E oo mai ia i tatou i se ala paia, se mea paia, o nei lagona e le mafaamatalaina—e mamana faaleagaga—e pei o le tatalo na faia e Iesu mo fanau a sa Nifae. O i latou o e na molimauina lena mea na tupu na faamaumauina:
“Elei vaaia lava e le mata, pe na faalogoina foi … e le taliga, le tetele ma le ofoofogia naua o mea e pei ona matou vaai ma faalogo o fetalaia e Iesu i le Tamā;
“… E le mafai e se laulaufaiva ona tautala ai, pe mafai foi e se tagata ona tusia, pe mafai foi e loto o tagata ona malamalama i mea e faapea ona tetele ma le ofoofogia naua e pei ona matou vaaia ma faalogoina o fetalaia e Iesu.”10
O nei ituaiga o taimi faapaiaina e tumau pea ona le mafaamatalaina aua a faailoa atu, e tusa lava pe mafai, e ono aveesea ai le tulaga paia.
Uso e ma tuafafine, ua tatou ola i se lalolagi faaletino faatasi ma le tele o pese e le o mafai ona usuina, pe tatou te le o usuina foi. Ae ou te augani atu ia te i tatou uma taitoatasi ia nonofo tumau ai ma le faamaoni i le aufaipese, ma olioli e faavavau i lena viiga sili ona faapelepele o pese uma—le pese o le alofa togiola.”11 O le mea e lelei ai o nofoa mo lenei pese patino e le faatapulaaina. O loo i ai le avanoa mo i latou e tautatala i gagana eseese, o loo faamanatuina le eseesega o aganuu, ma potopoto mai le tele o nofoaga faavaomalo. O loo i ai le avanoa mo e nofofua, mo e ua faaipoipo, i latou e toatele aiga, ma e e leai ni fanau. O loo i ai le avanoa mo i latou na i ai ni fesili e faatatau i lo latou faatuatua ma le avanoa mo i latou o loo i ai pea ni fesili. O loo i ai se avanoa mo i latou e eseese tosinaga faalefeusuaiga. I se faapuupuuga, o loo i ai se nofoaga mo tagata uma e alolofa i le Atua ma faamamalu i Ana poloaiga ua fai ma tulaga faatonuina sili ona taua mo amioga faaletagata, aua afai o le alofa o le Atua o le fati lea o la tatou pese e tasi, e mautinoa lava o lo tatou sailiga e tasi ia usitai ia te Ia o le faigaleo taua e tasi lea o loo i ai. Faatasi ai ma poloaiga paia o le alofa ma le faatuatua, salamo ma le agaalofa, faamaoni ma le faamagaloga, o loo i ai se avanoa i lenei aufaipese mo i latou uma e fia auai.12 “Sau i le tagata o e i ai,” o loo fetalai mai ai se Tama alofa ia i tatou taitoatasi, ae ua Ia faaopoopo mai, “Aua ne’i e fuafua e te tumau ai lava i le tagata o e i ai.” Tatou te ataata ma manatua o loo naunau lava le Atua ia faia i tatou ia sili atu i lo tagata na tatou mafaufau e mafai ona avea ai i tatou.
I lenei pese tele o Lana fuafuaga lena mo le faaeaga, tau ina ia tatou mulimuli atu ma le lotomaualalo i Lana taitai pese ma galulue pea i pese e le mafai ona tatou usuina pe le o usuina foi, seia oo ina tatou ofo atua na “[viiga] i [lo tatou] Tupu.”13 Ona oo lea i se tasi aso, e pei ona ta’ua e la tatou viiga e sili ona fiafia i ai:
Ia tatou pepese ma autau a le lagi,
Osana, osana i le Atua ma Iesu! …
… Pe a toe afio mai Iesu i Lona mamalu!14
Ou te molimau atu o lena lava itula o le a oo mai, o le a toe auina mai ai e le Atua lo tatou Tama Faavavau i le lalolagi Lona Alo e Toatasi na Fanaua, i lenei taimi e pule ma nofotupu o le Tupu o tupu e faavavau. Ou te molimau atu o Lana Ekalesia toefuataiina lenei ma o le auala lea e oo mai ai aoaoga ma sauniga faaola o Lana talalelei i tagata uma. Pe a oo atu Lana savali ma “seia oo atu i konetineta uma [ma] asia nuu uma,”15 e moni lava o le a “[faaali mai e Iesu] ona fofoga fiafia.”16 O le a i ai le lasusulu e faavavau mo le agaga i lena aso. Ina ia oo mai lenei itula na folafolaina, ou te tatalo ai ma le naunautai i le suafa o Iesu Keriso, amene.