2017
Faaauau Pea le Auaunaga a Aposetolo i le Lalolagi Atoa
May 2017

Faaauau Pea le Auaunaga a Aposetolo i le Lalolagi Atoa

O loo faaauau pea ona auauna atu perofeta ma aposetolo i le lalolagi atoa (tagai i le MF&F 107:23). I le ono masina mulimuli:

I se faasalalauga o le Faafesagai o loo tuusao atu i Palamaira, Niu Ioka, ISA, na uunaia ai e Peresitene Henry B. Eyring ma Elder Jeffrey R. Holland le autalavou o le Ekalesia ina ia maua se molimau faaletagata lava ia. “Ia iloa mo oe lava ia ua moni nei mea,” na saunoa mai ai Peresitene Eyring.

I Mekisiko, na faalauiloa atu ai Peresitene Russell M. Nelson i le Chamber of Deputies a le atunuu (o le vaega pito i lalo o le Konekaresi), ma sa viia le Ekalesia mo le lelei o le puipuiga o le saolotoga o tapuaiga ma i le faamalosia o aiga. Na feiloai atu foi Peresitene Nelson i faifeautalai ma saunoa atu faapea o tagata o le Ekalesia “o se uunaiga malosi mo le lelei o o latou nuu ma atanuu.”

I Arisona, ISA, na uunaia ai e Elder Dallin H. Oaks tagata uma o le Ekalesia ia puipuia le saolotoga o tapuaiga. (E maua nisi faamatalaga i le religiousfreedom.lds.org.)

Sa saunoa atu Peresitene Dieter F. Uchtdorf i tagata o le Paranesi o Parleys Creek (Suaili) i le Aai o Sate Leki, Iuta, ISA. O le toatele o tagata o le paranesi o ni tagata sulufai mai i itumalo o Aferika, ma o Peresitene Uchtdorf e faalua ona avea foi o ia ma se tagata sulufai. “Ia manatua i taimi uma po o fea lava o tatou i ai, o le talalelei o le aiga lea,” na ia saunoa ai.

Na auai atu Elder M. Russell Ballard ma Elder D. Todd Christofferson i le sauniga o le faatulaia o le epikōpō fou o le Matagaluega a le Katoliko Roma o le Aai o Sate Leki ma faafeiloai o ia i totonu o le nuu.

I le Aai Paia, sa auai atu faatasi Elder Holland ma Elder Quentin L. Cook ma se vaega o taitai o le Au Paia o Aso e Gata Ai ma malo faaaloalogia o Tagata Iutaia mai le ISA o e sa faapotopoto i se nofoaga lauiloa i Ierusalema e faailoga le 175 tausaga o Elder Orson Hyde (1805–78) o le Korama a Aposetolo e Toasefululua o loo faapaiaina le laueleele o se nofoaga o le faapotopotoga mo tagata Iutaia.

Sa asia foi e Elder Holland tagata o le ekalesia ma faifeautalai i Iapani, Korea, ma Guam, lea “sa mafai ona matou faamautinoa atu ia i latou se lumanai [manuia],” na ia saunoa ai. Sa ia ta’ua o faasalalauga tuusao o faigalotu i le lalolagi atoa e “ofoina mai ia i tatou le tele o le mafai ona oo atu o a tatou savali,” e fesootai ai ma le fia sefulu afe o tagata o le Ekalesia.

I Niu Ioka, ISA, sa auai Elder David A. Bednar i se felafolafoaiga e uiga i le faaipoipoga, ua fai mai o se tasi o galuega sili o o tatou taimi—o se tasi lea e tatau ai ona tuufaatasia nuu e eseese faatuatuaga— ina ia fesoasoani i tagata ia malamalama i le uiga moni ma faamoemoega o le faaipoipoga.

A o asiasi atu i le Au Paia o Aso e Gata Ai i Iapani ma Korea, na saunoa atu Elder Bednar o loo aafia le Ekalesia i le tuai o le tuputupu ae e mautinoa o Asia. “E leai sau mea e te mafaia ae ia faagaeetia i le filiga, agaalofa, ma le faamaoni o nei Au Paia o Aso e Gata Ai,” sa ia saunoa mai ai. Sa saunoa atu foi Elder Bednar i le faitau afe o tagata o le Ekalesia ma aoao atu ni faifeautalai i ni misiona se 7 mai misiona e 21 a le Ekalesia i Filipaina.

I Mekisiko, na fautuaina e Elder Neil L. Andersen tagata o le Ekalesia e faatoilalo ni faafitauli o loo taofia i latou mai le auai atu i le malumalu, tausia o le Sapati, ma ia faamalosia sootaga faaleaiga. Sa ia valaaulia i latou ina ia tuuina atu atoa le Faaola i o latou olaga.

Na asiasi atu Elder Quentin L. Cook i le Atu Filipaina, i le 20 tausaga ina ua uma ona ia auauna atu i ai iina o se Pulega Aoao. Sa ia saunoa mai ua faaluaina le toatele o le Ekalesia i le Atu Filipaina talu mai lena taimi. “I le mea sa i ai paranesi,” sa ia saunoa mai ai, “ua i ai nei ni siteki. O tamaiti sa tatou iloa i na taimi ua avea nei ma faifeautalai ua maea misiona. O faifeautalai ua maea misiona ua avea nei ma peresitene o siteki. E ese le maoae o le vaai atu i le tuputupu ae o le Ekalesia.”

I Polivia ma Peru, ua fautuaina e Elder Cook ia tagata o le Ekalesia ia taulai atu i le faatuatua i le Alii o Iesu Keriso. Sa ia saunoa mai o le autalavou ma talavou matutua nofofua o i ai iina e tulaga ese lava ma e faaalia le alofa mo le Faaola ma Lana Togiola ma le Toetu.

I le Eria o Aferika i Sisifo, na saunoa mai Elder Gary E. Stevenson o lana asiasiga na saunia ai se avanoa e mafaufau ai i le alofa ma le olioli o loo maua e le Au Paia o Aso e Gata Ai i le talalelei, e ui i “luitau ma mafatiaga” o feagai ma i latou.

Mulimuli ane, i Iurukuei, Chile, ma Atenitina, na saunoa ai Elder Stevenson i se konafesi Mo le Malosi o le Autalavou. Sa ia tau mai, o le toatele o le autalavou “ua faia ni faaiuga e o i ni misiona ma ia tumau mausali i a latou sini ina ia faaipoipo i le malumalu, ma … [maua] ni aoaoga maualuluga atu.”

Na fautuaina e Elder Ronald A. Rasband tagata o le Ekalesia ma faifeautalai i le Eria o Amerika Tutotonu ia tumau faamaoni i a latou feagaiga ma vaavaai atu i le Alii i taimi faigata. Sa ia asiasi atu i le falemai o le kanesa a tamaiti i Kuatemala, tuuina atu se saunoaga autu i se semina o le saolotoga o tapuaiga e lagolagoina e le Ekalesia i El Salvador, ma feiloai ma le peresitene o Nicaragua.

I Toga, sa feiloai Elder Dale G. Renlund ma le tupu tamaitai ma isi tagata o le aiga tautupu. Sa ia asia foi Ausetalia ma Niu Sila, lea na talosagaina ai o ia e tagata ina ia faailoa atu lo latou alolofa ia Peresitene Thomas S. Monson.