Malumalu Fou e Lima
Na fofogaina mai e Peresitene Thomas S. Monson fuafuaga mo le fausiaina o ni malumalu faaopoopo e lima, i aai nei:
Brasília, Pasila. O le Malumalu o Brasilia Pasila o le a avea ma malumalu lona 10 i Pasila, e aofia ai malumalu e ono o loo faaaogaina ma le isi tolu ua fofogaina atu po o o loo fausiaina. E ese ai mai le Iunaite Setete ma Mekisiko, ua toatele atu le Au Paia o Aso e Gata Ai (silia ma le 1.3 miliona) o loo nonofo i Pasila nai lo soo se isi atunuu. O Pasila e i ai se faitau aofai e tusa ma le 211 miliona.
Manila Lautele, Filipaina. O lenei malumalu o le a avea ma [malumalu] lona lua i Manila ma le lona fa i le Atu Filipaina. Ua toeitiiti atoa le 750,000 o le Au Paia o Aso e Gata Ai i Filipaina, lea e i ai se faitau aofai e 104 miliona.
Nairobi, Kenya. O le a auauna atu le malumalu i le silia ma le 30,000 tagata o le Ekalesia i Aferika i sasae, e aofia ai le au paia e 13,000 i Kenya, lea e i ai se faitau aofai e 48 miliona. O le a avatua le fuainumera i le valu o malumalu o loo faaaogaina, o loo fausiaina, po o ua faasilasila atu i Aferika.
Pocatello, Idaho, ISA. O le Malumalu o Pocatello Idaho Temple o le a avea ma malumalu lona ono i Idaho, o se setete e i ai le tusa ma le 450,000 o le Au Paia o Aso e Gata Ai ma se faitau aofai e 1.7 miliona.
Saratoga Springs, Iuta, ISA. O lenei malumalu o le a i ai i se tasi o eria aupito televave le faatupulaia i Iuta ma o le a avea ma malumalu lona 18 i le setete. O Iuta, lea e i ai le laumua o le Ekalesia, e 2.1 miliona tagata o le Ekalesia, faatasi ai ma se faitau aofai o tagata o le setete pe tusa ma le 3.1 miliona.
O malumalu e lima na fofogaina atu ua aumaia ai le faitau aofai o malumalu o loo faaaogaina (155) ma malumalu ua fofogaina atu po o o loo fausiaina/faafouina (27) i le 182 malumalu i le lalolagi atoa.
Talu mai le konafesi aoao ia Oketopa 2016, ua uma ona faapaiaina le Malumalu o Fort Collins Colorado, le Malumalu o Star Valley Wyoming, ma le Malumalu o Hartford Connecticut i le ISA, ma ua toe faapaiaina le Malumalu o Suva Fiti.
Ua fuafuaina faapaiaga o i le lumanai e pei ona taua i lalo:
|
Malumalu |
Aso o le faapaiaga |
|---|---|
|
Pale Farani |
21 Me, 2017 |
|
Idaho Falls Idaho (ISA) |
4 Iuni, 2017 (toe faapaiaina) |
|
Tucson Arisona (ISA) |
13 Aokuso, 2017 |
|
Meridian Idaho (ISA) |
19 Novema, 2017 |
|
Cedar City Iuta (ISA) |
10 Tesema, 2017 |
Ua uma ona suatiaina le laueleele mo le Malumalu o Winnipeg Manitoba (Kanata), le Malumalu o Kinshasa Ripapelika Temokarasi o le Congo, le Malumalu o Barranquilla Kolomupia, le Malumalu o Arequipa Peru, ma le Malumalu o Rio de Janeiro Pasila.
Ia matauina foi, ao faaauau pea le fausiaina o le Malumalu o Roma Italia, ua uma ona tuuina i totonu o le nofoaga autu mo tagata asiasi mai ia faatagata o Iesu Keriso ma uluai Aposetolo e Toasefululua, ma ua tuuina foi i luga o le tumutumu le faatagata o le agelu o Moronae.