O Lē Sili ia te Outou
Saunia e Peresitene Dieter F. Uchtdorf
Fesoasoani Lua i le Au Peresitene Sili
O le taui aupito silisili a le Atua e avatu ia i latou e auauna atu e aunoa ma le faamoemoe mo se taui.
Ou uso pele, uo pele, ou te faafetai tele e faatasi ma outou i lenei sauniga faaleperisitua musuia i le lalolagi atoa. Peresitene Monson, faafetai mo lau savali ma le faamanuiaga. O le a matou taliaina ma le faafetai au upu o le taitaiga, fautuaga, ma le malamalama. Matou te alolofa ma lagolagoina oe, ma e matou te tatalo e le aunoa mo oe. O oe moni lava o le perofeta a le Alii. O oe o lo matou Peresitene. Matou te lagolagoina oe, matou te alolofa ia te oe.
Ua toeitiiti atoa le luasefulu tausaga talu ai, sa faapaiaina ai le Malumalu o Madrid Sepania ma amatalia ana auaunaga o se maota paia o le Alii. Ma te manatuaina lelei lava ma Harriet ona sa ou auauna atu i le Au Peresitene o le Eria i Europa i lena taimi. Faatasi ai ma isi tagata e toatele, sa matou faaaluina ni itula le mafaitaulia e auai ai i le auiliiliina o fuafuaga ma le faatulagaina o polokalama e oo atu i le faapaiaga.
Ina ua latalata mai le aso o le faapaiaga, sa ou matauina ou te lei mauaina lava se valaaulia e auai ai. Sa le’i mafaufauina lenei mea. Ona i ou tiutetauave uma o le Peresitene o le Eria, sa matua ou aafia i le galuega faatino o lenei malumalu ma sa lagona ai sina vaega o le puleaina.
Sa ou fesili atu ia Harriet pe na vaai i se valaaulia. Sa lei vaai i ai o ia.
Ua mavae aso, ma ua faateleina lo’u popole. Sa ou tomanatu pe ua leiloa le ma valaaulia—masalo pe ua pa’u i le va o momi o le ma sofa. Atonu na fefiloi faatasi ma lapisi o meli ma tiai ese ai. Sa i ai i le ma tuaoi se pusi isuisu, ma amata ona ou tilotilo atu i ai ma le masalosalo.
Mulimuli ane, sa faamalosia au e taliaina le mea moni: ua le valaauliaina au.
Ae na faapefea ona tupu lena mea? Na ou faia ea se mea e faatiga ai [i se isi]? Pe na manatu ea se tasi ua mamao tele mo maua le faimalaga mai? Pe ua galo ea au?
Mulimuli ane, sa ou iloaina o lenei ituaiga o manatu na taitai atu i se ituaiga o uiga sa ou le manao e maua ai.
Sa ma faamanatuina ia i maua ma Harriet o le faapaiaga o le malumalu sa lei faatatauina ia i maua. Sa lei faatatau po o ai e tatau ae po o ai foi e le tatau ona valaauliaina. Sa lei faatatau lava i o ma lagona po o lo ma manatu o le umiaina o se mea.
Sa faatatau i le faapaiaina o se fale paia, o se malumalu o le Atua Silisiliese. O se aso o le olioli mo tagata o le Ekalesia i Sepania.
Pe ana valaauliaina au e auai, semanu ou te faia ma le fiafia tele. Ae ana faapea sa lei valaauliaina au, o le a le itiiti lava lo’u fiafia. O le a ma fiafia ma Harriet faatasi ma a ma uo, o alii ma tamaitai pele mai se mea mamao. O le a ma vivii atu i le Atua mo lenei faamanuiaga matagofie e pei lava ona ma faia ma le naunautai mai lo ma fale i Frankfurt e faapena foi ona ma faia mai Madrid.
O Atalii o Faititili
E aofia ai i le Toasefululua na valaauina ma faauuina e Iesu o se auso toalua, o Iakopo ma Ioane. E te manatua le igoa valaau na Ia faaigoa ai i laua?
O Atalii o Faititili (Poaneki).1
E te le maua se igoa valaau faapena e aunoa ma se mafuaaga taua. O le mea e faanoanoa ai, e le o maua i tusitusiga paia le tele o se faamalamalamaga e uiga i le tupuaga o le igoa valaau. Peitai, tatou te maua ni nai vaaiga pupuu i uiga o Iakopo ma Ioane. O le auso lava lenei o e na fautuaina ia to ifo le afi mai le lagi i luga o se nuu i Samaria i le le valaauliaina [o latou] i le aai.2
O Iakopo ma Ioane o ni faifaiva—masalo e itiiti sina poto masani—ae na la iloa lelei elemene o le natura. E mautinoa lava o i laua o ni tamalii o faatinoga.
I se tasi taimi, a o sauniuni le Faaola e fai Lana malaga faaiu i Ierusalema, sa faalatalata atu Iakopo ma Ioane ia te Ia ma se talosaga faapitoa—masalo o se talosaga e agavaa mo lo la igoa valaau.
“Ua ma mananao ina ia e faia mo i maua le mea a ma ole atu ai,” sa la fai atu ai.
Ou te manatu na soisoi atu Iesu a o Ia tali atu, “Se a le mea lua te mananao i ai?”
“Ia e tuu mai ia te i maua, ma te nonofo o le tasi i lou itu taumatau, ma le tasi i lou itu tauagavale i lou mamalu.”
Sa lu’iina i laua e le Faaola ina ia toe mafaufau loloto teisi lava i le mea ua la talosaga atu ai ona fetalai atu lea, “O le nofo i lo’u itu taumatau ma lo’u itu tauagavale, e le o ia te au lea ona avatu, a e tau lava o e ua saunia mo i latou lea mea.”3
I se isi faaupuga, e le mafai ona e maua le mamalu i le malo o le lagi e ala i le fiatautavā i ai. E le mafai foi ona “fai faaālatua” lou auala i le mamalu e faavavau.
Ina ua faalogo atu isi Aposetolo e toasefulu i lenei talosaga mai Atalii o Faititili, sa latou le fiafia i lea mea. Na silafia e Iesu ua puupuu Ona aso, ma o le vaai atu i finauga a i latou o le a tauaveina Lana galuega masalo na popole ai o Ia.
Sa Ia talanoa atu i le Toasefululua e uiga i le natura o le mana ma le auala e aafia ai i latou o e saili atu ma taofimau i ai. “O tagata e faia faatosinaga i le lalolagi,” na Ia fetalai ai, “e faaaogaina o latou tofiga o le pule e pulea ai isi.”
E toetoe lava a mafai ona ou vaai atu i le Faaola, o silasila atu ma se alofa lemafuatia i fofoga o na soo faamaoni ma talitonu. E toetoe lava a mafai ona ou faalogo atu i Lona siufofoga o augani atu: “E le o le auala lea e tatau ona outou ola ai. Ae, o se fia sili ia te outou, ia fai o ia ma a outou auauna: O se fia muamua foi ia te outou, ia fai o ia ma tautua a outou uma.”4
I le malo o le Atua, o le sili ma taitai o lona uiga o le vaai atu i isi i o latou tulaga moni lava—e pei ona silasila mai i ai le Atua ia i latou—ona aapa atu lea ma auauna atu ia i latou. O lona uiga o le olioli faatasi ma i latou o e fiafia, fetagisi faatasi ma e faanoanoa, sii i luga i latou o atuatuvale, ma alolofa atu i o tatou tuaoi e pei ona alofa mai Keriso ia i tatou. E alofa le Faaola i fanau uma a le Atua e tusa lava po o a o latou tulaga faaletamaoaiga, ituaiga, tapuaiga, gagana, manatu faaupufai, tagatanuu, po o soo se isi lava vaega. Ma e tatau foi la ia i tatou!
O le taui aupito silisili a le Atua e avatu ia i latou e auauna atu e aunoa ma le faamoemoe mo se taui. E avatu ia i latou o ē auauna atu e aunoa ma viiga a tagata; o ē e o atu gūgū lava e saili auala e fesoasoani ai i isi; o i latou e auauna atu i isi ona latou te alolofa i le Atua ma fanau a le Atua.5
Aua Ne’i Manatu Mamafa I Ai
E lei leva ona valaauina au o se Pulega Aoao, ae ou maua le avanoa e faafeao atu ai Peresitene James E. Faust mo se faatulagaina o se siteki. A o ou ave atua le taavale i le ma tofiga i le matagofie o Iuta i Saute, sa agalelei tele Peresitene Faust e faaaoga le taimi e faatonu ai ma aoao au. O se tasi o lesona o le a le galo lava ia te au. Na ia saunoa mai, “E faafetai tagata o le Ekalesia i le Au Pulega Aoao. O le a latou taulimaina oe ma le agalelei ma fai atu ni tala mananaia e uiga ia te oe.” Ona ia taofi teisi lea ma fai mai, “Dieter, ia faafetai e le aunoa mo lea mea, ae aua ne’i manatu mamafa i ai.”
O lenei lesona taua e uiga i auaunaga faale-Ekalesia e faatatau i tagata uma e umia le perisitua i korama uma o le Ekalesia. E faatatau ia i tatou uma i lenei Ekalesia.
A o fautuaina e Peresitene J. Reuben Clark Jr. i latou e valaauina i tofiga o pulega i le Ekalesia, na te ta’u atu ia i latou e aua ne’i galo le tulafono lona ono.
E mautinoa lava, o le a fesili se tagata, “O le a le tulafono lona ono?”
“Aua e te mafafau tele po o a manatu o tagata e uiga ia te oe,” na te fai atu ai.
Ioe, e sosoo ai ma se fesili tulitatao: “O a la isi tulafono e lima?”
Ma se foliga ataata i ona fofoga, e faapea mai Peresitene Clark, “E leai se mea.”6
Ina ia avea ma taitai mataalia o le Ekalesia, e tatau ona tatou aoaoina lenei lesona taua: o le taitaiga i le Ekalesia e le o faatatau tele i le faatonuina o isi e pei o lo tatou naunautaiga ina ia faatonuina i tatou e le Atua.
O Valaauga o Avanoa mo Auaunaga
I le avea ai ma Au Paia a le Atua Silisiliese, e ao ona tatou “manatua foi i mea uma, e matitiva ma e le tagolima, o e mama’i ma e puapuagatia, aua o le na te le faia ia mea, e le o sou soo o ia.”7 O avanoa e o atu ai ma fai mea lelei ma auauna atu i isi e le faatapulaaina. E mafai ona tatou maua i latou i totonu o o tatou nuu, i totonu o a tatou uarota ma paranesi, ma mautinoa lava i totonu o o tatou aiga.
Ma le isi, ua tuu atu i tagata uma o le Ekalesia ni avanoa aloaia patino e auauna atu ai. Tatou te faasino atu i nei avanoa o “valaauga”—o se upu e tatau ona faamanatu mai ai ia i tatou po o ai lea na valaauina i tatou e auauna atu. Afai tatou te taulimaina o tatou valaauga o ni avanoa e auauna ai i le Atua ma auauna atu ai i isi i le faatuatua ma le lotomaualalo, o faatinoga uma la o auaunaga o le a avea ma se laasaga i luga o le ala o le avea ma soo. I lea ala, e le gata e atiae ai e le Atua Lana Ekalesia ae atiae ai foi Ana auauna. Ua mamanuina le Ekalesia ina ia fesoasoani ia i tatou ia avea ma ni soo moni ma faamaoni o Keriso, ni atalii ma ni afafine lelei ma malualii o le Atua. E le na o le taimi tatou te o ai i sauniga ma faalogo i lauga e tupu ai lenei mea, ae pe a tatou mafaufau foi i isi tagata ma auauna atu i ai. O le auala lea tatou te avea ai ma e “sili” i le malo o le Atua.
Tatou te taliaina valaauga ma le alofa tunoa, lotomaualalo, ma le lotofaafetai. A faamaloloina i tatou mai nei valaauga, tatou te taliana foi le suiga i le alofa tunoa lava e tasi, lotomaualalo, ma le lotofaafetai.
I fofoga o le Atua, e leai se valaauga i le malo e sili atu sona taua i lo le isi valaauga. O la tatou auaunaga—pe tele pe itiiti—e faafailele ai agaga, tatala ai pupuni o le lagi, ma faamatuu mai ai faamanuiaga a le Atua e le gata mo i latou tatou te auauna i ai ae faapena foi i o tatou lava luga. Ma a tatou aapa atu i isi, e mafai ona tatou iloaina ma le talitonuga faamaulalo ua faamamaluina e le Atua la tatou auaunaga i le faamaoniga ma le fiafia. E soisoi mai ia i tatou a o ofo atu o tatou galuega agaalofa loloto, aemaise o galuega e le ma vaaia e isi.8
O taimi uma tatou te ofo atu ai i tatou lava i isi, tatou te faia ai lava se laasaga e latalata atili atu ai i le avea ma ni soo moni ma lelei o Lē na foai mai Ana mea uma mo i tatou: o lo tatou Faaola.
Mai le Pulefaamalumalu i le Solo o Savali
I le taimi o le faamanatuina o le 150 tausaga o le taunuu o paionia i le Vanu o Sate Leki, sa auauna atu ai Uso Myron Richins o se peresitene o se siteki i Henefer, Iuta. O le fiafia na aofia ai se toefaatinoga o le auala a paionia na oso atu i le taulaga.
Sa matua aafia ai lava Peresitene Richins i fuafuaga mo le fiafia, ma sa ia auai ai i le tele o fonotaga faatasi ma le Au Pulega Aoao ma isi i le talanoaina o polokalama. Sa ia gauai atoa atu.
A o lumanai ai le faafiafiaga, sa toefaatulaga ai le siteki a Peresitene Richins, ma sa faamalolo ai o se peresitene. I se Aso Sa na sosoo ai, sa auai ai o ia i le sauniga perisitua a lana uarota ina ua talosagaina e taitai ni volenitia e fesoasoani i faafiafiaga. Sa sii i luga le lima o Peresitene Richins faatasi ma isi ma tuu atu i ai faatonuga ia laei i ni laei faigaluega ma aumai lana loli ma se suo.
Mulimuli ane, na oo mai le taeao o le gaoioiga tele, ma sa alu atu ai Peresitene Richins i tiute a volenitia.
E na o ni nai vaiaso na muamua atu ai, sa avea ai o ia ma se tagata faisaofaga tele i le fuafuaina ma le vaavaaiga o lenei polokalama tele. Peitai, i lena aso, o lana galuega o le mulimuli lea i tua o solofanua o le solo ma faamama.
Sa faia e Peresitene Richins ma le fiafia ma le olioli tele.
Sa ia malamalama e le sili atu le tasi ituaiga o auaunaga i le isi.
Sa ia iloa ma faatinoina le fetalaiga a le Faaola: “A o le sili ia te outou ia fai o ia ma a outou auauna.”9
Ia Sa’o le Avea ma Soo
O nisi taimi, e pei o Atalii o Faititili, tatou te mananao ai i ni tofiga lauiloa. Tatou te tauivi i le fia iloa. Tatou te saili ia taitai ma faia se saofaga e manatua pea.
E leai ma se mea sese i le manao e auauna atu i le Alii, ae a tatou saili loa ia maua ai ni faatosinaga i le Ekalesia mo lo tatou lava ia lelei—ina ia maua ai viiga ma faamamaluga a tagata—ua tatou maua lo tatou lava taui. A tatou “manatu mamafa” i viiga a isi, o lena viiga o le a avea ma o tatou taui.
O le a le valaauga e sili ona taua i le Ekalesia? O le valaauga lena o loo e umiaina i le taimi nei. E le afaina po o le a le faatauvaa po o le lauiloa e foliga mai ai, ae o le valaauga ua ia te oe i le taimi nei o le valaauga lena o le a faatagaina oe e le gata e siitia ai isi ae faapena foi ona avea ai oe ma tagata o le Atua na foafoaina oe e avea ai.
Au uo ma uso pele i le perisitua, sii i luga i le mea o e tu ai!
Sa aoao atu e Paulo ia Filipi, “Aua nei faia se mea e tasi ma le finau vale ma le mitamita fua, a ia taitasi outou ma manatu ma le loto maualalo, ua sili nisi uma ia te [oe lava].”10
Auauna Atu ma le Mamalu
O le saili atu i le mamalu ma viiga i le Ekalesia nai lo auaunaga moni ma lotomaualalo i isi o le tu ma aga ia a Esau.11 Atonu tatou te maua se taui faalelalolagi, ae e sau ma se tau tele lava—o le le mauaina o le faamaoniga a le lagi.
Ia tatou mulimuli i le faataitaiga a lo tatou Faaola, o le na agamalu ma lotomaualalo, o le sa lei saili atu i viiga a tagata ae ia faia le finagalo o Lona Tama.12
Ia tatou auauna atu i isi ma le lotomaualalo—i le malosi, lotofaafetai, ma le mamalu. E ui e foliga mai o a tatou faatinoga o auaunaga e maualalo ma faatauvaa, pe itiiti le taua, ae o i latou e aapa atu i le agalelei ma le agaalofa i isi o le a i ai se aso e iloa ai le taua o la latou auaunaga e ala i le alofatunoa e faavavau ma le manuia o le Atua Silisiliese.13
Ou uso pele, uo pele, tau ina ia tatou mafaufau loloto i ai, malamalama, ma ola i lenei lesona silisili o le puleaga faaletaitai ma faaleperisitua a le Ekalesia: “A o le sili ia te outou e fai lea ma a outou auauna.” O la’u tatalo ma faamanuiaga lea i le suafa paia o lo tatou Matai, lo tatou Togiola, i le suafa o Iesu Keriso, amene.