Toefoi Atu ma Mauaina

Saunia e Elder M. Russell Ballard

O Le Korama a Aposetolo e Toasefululua

O le toefoi atu i le afioaga a le Atua ma le mauaina o faamanuiaga e faavavau lea e sau mai le osia ma le tausia o feagaiga, o sini aupito sili ia ona taua e mafai ona tatou setiina.

O’u uso e ma tuafafine, ua oo mai nei i lo’u tofiga e lauga atu ia te outou ae o la outou tofiga o le faalogo. O la’u sini o le faamaea o lo’u tofiga a o lei maea la outou tofiga. O le a ou faia le mea sili.

I le aluga o tausaga, ua ou matauina ai o i latou o e aupito tele mea latou te ausiaina i lenei lalolagi o i latou ia e i ai se vaaiga mamao mo o latou olaga, faatasi ma ni sini e faatumau ai lo latou taulaiga i la latou vaaiga mamao atoa ai ma fuafuaga faataatitia i auala e ausia ai. O le iloaina o le mea e te alu i ai ma le auala ua e faamoemoeina e taunuu ai iina e mafai ona aumaia ai le uiga, faamoemoega, ma le ausiaga i le olaga.

O nisi e faigata ona latou iloaina le eseesega i le va o se sini ma se fuafuaga seia oo ina latou iloaina o se sini o se taunuuga po o se mutaaga, ae o le fuafuaga o le auala lea e te atunuu ai iina. Mo se faataitaiga, e mafai ona i ai se tatou sini e tietie atu i se nofoaga patino e le masani ai, ma e pei ona silafia e nisi o outou tuafafine, e masani lava ona manatu matou o tamaloloa matou te iloaina le auala e oo ai iina—e tele ina faapea, “Ou te iloa e pei lava o le pi’oga lea e sosoo atu.” Atonu o loo ataata mai lo’u toalua. Sa manino le sini, ae sa leai se fuafuaga lelei na faataatia e taunuu ai i le taunuuga.

O le faatutuina o sini e taua le amata faatasi ma le taunuuga i le mafaufau. Ma o le fuafuaga o le fatuina lea o se auala e taunuu ai i lena taunuuga. O se ki i le fiafia o loo taoto lea i le malamalama po o a tonu lava taunuuga e taua—ona faaalu lea o lo tatou taimi, taumafaiga, ma le gauaiga i mea e fatua’i ai se auala mautinoa e taunuu ai iina.

Ua tuuina mai e le Atua, lo tatou Tama Faalelagi, ia i tatou le faataitaiga atoatoa o le faatuina o sini ma le fuafuaina. O Lana sini o le “aumaia [o] le tino ola pea ma le ola faavavau o le tagata,”¹ ma o Lana auala ia ausia ai, o le ata o le faaolataga.

O le fuafuaga a lo tatou Tama Faalelagi pele ua aofia ai le foaiina mai ia i tatou o se olaga faaletino e ola ai, ausia mea sili atu, ma aoao lea e mafai ai ona tatou avea atili e faapei o Ia. O le faaofuina o o tatou agaga e faavavau i tino faaletino; ola i aoaoga ma poloaiga a Lona Alo, le Alii o Iesu Keriso, ma le faia o ni aiga e faavavau ua faatagaina ai i tatou, e ala i le Togiola a le Faaola, e faataunuu le sini a le Atua o le tino ola pea ma le ola e faavavau mo Lana fanau faatasi ma Ia i Lona malo selesitila.

O le setiina o sini atamai e aofia ai le malamalama e faapea e na o le pau le taimi e aoga ai sini mo se taimi puupuu pe afai lea e taitai atu i le malamalamaaga manino i sini mo se taimi umi. Ou te talitonu o se tasi o ki taua i le fiafia o le aoao lea o le auala e seti ai a tatou lava sini ma faavae a tatou lava fuafuaga i totonu o le auivi o le fuafuaga e faavavau a lo tatou Tama Faalelagi. Afai tatou te taulai atu i lenei ala e faavavau, o le a mautinoa lava tatou te agavaa e toe foi atu i Lona afioaga.

E lelei le i ai o sini ma fuafuaga mo a tatou matata, mo a tatou a’oga, e oo lava i a tatou taaloga tapolo. E taua foi le i ai o ni sini mo a tatou faaipoipoga, o tatou aiga, ma a tatou aufono ma valaauga i le Ekalesia; e faapitoa le moni o lenei mea mo faifeautalai. Ae o a tatou sini aupito sili ona faamuamua e tatau ona ogatusa ma le fuafuaga e faavavau a le Tama Faalelagi. Na fetalai Iesu, “Ia outou muai saili le malo o le Atua ma lana amiotonu, ma o le a faaopoopo atu ia te outou nei mea uma.”²

O tagata atamamai i le setiina o sini na tau maia ia i tatou e faapea o le faigofie atu ma le sili ona tuusao o se sini, o le faateleina foi lena o le mana o le a i ai. A mafai ona tatou faaitiitia se sini i se ata manino se tasi pe tasi foi pe lua ni upu mamana ma faafaatusa, e mafai ona avea lena sini ma se vaega o i tatou ma taiala ai toetoe lava o mea uma tatou te mafaufau i ai ma fai. Ou te talitonu e lua ni upu o i ai i lenei anotusi o loo fai ma faatusa o sini a le Atua mo i tatou ma a tatou sini sili ona taua mo i tatou lava. O le upu toefoi atu ma le mauaina.

O le toefoi atu i Lona afioaga ma le mauaina o faamanuiaga e faavavau lea e sau mai le osia ma le tausia o feagaiga, o sini aupito sili ia ona taua e mafai ona tatou setiina.

Tatou te toefoi atu ma mauaina e ala i le i ai o le “faatuatua le mafaagaeetia [i le Alii o Iesu Keriso], faalagolago atoa” i Ana galuega, fetaomi atu i “luma ma le tumau ia Keriso, ma se susulu atoatoa o le faamoemoe ma le alofa i le Atua ma tagata uma … , taumamafa fiafia i le afioga a Keriso, ma tumau e oo i le iuga.”³

Sa lei taliaina e Lusifelo le fuafuaga a lo tatou Tama lea e faatagaina ai i tatou ia toefoi atu i Lona afioaga ma mauaina Ana faamanuiaga. O le mea moni, sa fouvale Lusifelo ma taumafai e suia atoa le fuafuaga a lo tatou Tama, ma manao ia ave ia te ia lava le viiga, mamalu ma le mana o le Atua. I se taunuuga, na tuliesea o ia faatasi ma e na mulimuli ia te ia mai le afioaga o le Atua ma “avea o ia ma Satani, ioe, o le tiapolo lava lea, o le tamā o pepelo uma, e faasese ma faatauaso tagata, ma taitai faatagataotaua i latou i lona loto, le toatele lava lea o i latou o e e lē faalogo [i le siufofoga o le Alii]”⁴ (Mose 4:4).

Ona o ana filifiliga i le muai olaga, e le toe mafai ai e Satani ona toefoi atu pe mauaina. Ua na o le pau le mea ua totoe mo ia o le tetee lea i le fuafuaga a le Tama e ala i le faaaogaina o faatosinaga ma faaosoosoga uma e mafai ai ina ia faatoilaloina i tatou ma faia i tatou ia pagatia e pei o ia.⁵ O le fuafuaga a Satani ia ausia ai lana sini faatiapolo e faatatau lea i tagata uma, tupulaga, aganuu, ma malo. Na te faaaoga leo leotetele—o leo ia e saili e taotaomia i lalo le leo itiiti ma le filemu o le Agaga Paia lea e mafai ona faaali mai ia i tatou “mea uma” e tatau ona tatou faia e toefoi atu ai ma mauaina.⁶

O nei leo e sau mai ia i latou e le taliaina ia upumoni o le talalelei ma ē o faaaogaina le initoneti, ala o faasalalauga faaleagafesootai ma atalolomi, leitio, televise, ma atatifaga e aumai ai i se ala faatosina ia le ola le mama, vesiga, gagana masoa, uiga eleelea ma mea pi’opi’o i se auala e faalavelave ai ia i tatou mai a tatou sini ma fuafuaga ua ia i tatou mo le faavavau.

O nei leo e mafai foi ona aofia ai ni tagata ua lelei ni faanaunautaiga ae ua faatauasoina e filosofia o le poto salalau o alii ma tamaitai ma o e ua saili e faaumatia le faatuatua ma faaseloa le taulaiga e faavavau a i latou o loo taumafai ia toefoi atu i le afioaga o le Atua ma mauaina “mea uma ua i ai i [lo tatou] Tama.”⁷

Ua ou iloaina o le faatumauina o le taulaiga i le toefoi atu ma le mauaina o faamanuiaga folafolaina, e manaomia ai ona ou faaalu soo se taimi e fesili ai ia te au lava ia, “O a a’u mea o fai?”

E tai pei o la e fai sau oe lava ia faatalanoaga patino ma oe lava ia. Ae afai e faalefetaui lena mea, mafaufau i ai: o ai a se isi tagata i lenei lalolagi e sili atu ona ia iloaina oe nai lo oe lava ia? E te iloaina ou mafaufauga, o au amioga lililo, ou manaoga ma au miti, sini ma fuafuaga.Ma e sili atu lou iloa i lo se isi lava tagata o lou lava alualu i luma i i luga o le auala i le toefoi atu ma le mauaina.

I le avea ai ma se taiala mo au i le taimi o lenei iloiloga patino faaletagata lava ia, ou te fiafia ai e faitau ma mafaufau loloto i upu vailiili o loo maua i le mataupu lona lima o le Alema, lea o loo fesili ai Alema: “Ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto?”⁸ O fesili a Alema o se faamanatu lea i mea e tatau ona aofia i a tatou sini ma fuafuaga ina ia mafai ai ona toefoi atu ma mauaina.

Manatua le valaaulia a le Faaola ia “outou o mai ia te a’u, outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaa’oa’o ia te a’u, aua o a’u lē agamalu ma le loto maulalo, ona maua lea e outou o le malologa mo outou agaga.”⁹

A tatou faateleina lo tatou faatuatua i le mana o le Alii o Iesu Keriso tatou te maua ai le malologa mo o tatou agaga e ala i le faamagaloga o agasala, togiolaina o sootaga le atoatoa, faamaloloina o manu’aga faaleagaga lea e feto’u ai le tuputupu ae, ma faamalosia ai i tatou ma mafai ai ona tatou atiae ia uiga paia o Keriso, o le a tatou talisapaiaina loloto atili le maoae tele o le Togiola a le Alii o Iesu Keriso.¹⁰

I le gasologa o vaiaso a sau, ia saili se taimi e iloilo ai sini o lou olaga ma au fuafuaga ma faamautinoa ua ogatusa ma le fuafuaga sili a lo tatou Tama Faalelagi mo lo tatou fiafia. Afai e te manaomia ona salamo ma sui, ia mafaufau loa e fai nei lava. Faaalu se taimi e mafaufau ai ma le agaga tatalo po o a ni fetuunaiga e manaomia e fesoasoani ai ia te oe ia faatumauina lou “manatu tasi i le mamalu o le Atua.”¹¹

E tatau ona tatou faatumauina le aoaoga faavae ma le talalelei a Iesu Keriso i le totonugalemu o a tatou sini ma fuafuaga. A aunoa ma Ia, e leai ma se sini e faavavau e mafai ona ausia, ma o a tatou fuafuaga ia ausia a tatou sini e faavavau o le a mautinoa lava le le taulau.

O le tasi fesoasoaniga faaopoopo, “O Le Keriso Soifua: O Le Molimau a Aposetolo,”¹² lea na faailoa atu i le Ekalesia i le aso 1 o Ianuari, 2000. Tuu se kopi i se mea e mafai ona e iloa atu ai, ma faaalu se taimi e iloilo ai faamatalaga taitasi o loo maua i lenei molimau musuia e uiga ia Keriso e ala i Ana molimau faapitoa na saini ai.

“O Le Keriso Soifua” ma le folafolaga i le aiga

Ou te uunaia oe ia suesue i ai faatasi ma le “O Le Aiga: O Se Folafolaga i le Lalolagi.” Ua tele ina tatou talanoa soo e uiga i le folafolaga i le aiga, ae faamolemole manatua e faitau i ai i le anotusi o le mana faaola o le Keriso soifua. A aunoa ma le Keriso soifua, o le a le faataunuuina o tatou faamoemoega sili ona faamemelo. E pei ona taua i le folafolaga i le aiga: “O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”¹³

E na o le pau le mea e mafai ai ona tupu lenei mea ona o le Keriso soifua o le Faaola ma le Togiola lea o le Lalolagi.

I lenei tulaga, e mafai foi ona e mafaufau e sailiili ia tusitusiga paia e faalautele ai lou malamalama e uiga i upumoni patino o loo maua i totonu “O Le Keriso Soifua.”

O le faitauina ma le agaga tatalo “O Le Keriso Soifua” e pei lava o le faitauina o molimau a Mataio, Mareko, Luka, Ioane, ma perofeta o le Tusi a Mamona. O le a faateleina ai lou faatuatua i le Faaola ma fesoasoani ai ia te oe e faatumau lou taulaiga ia te Ia a o e mulimuli i au fuafuaga ia ausia au sini e faavavau.

E ui lava i a tatou mea sese, lē atoatoa, ō ese mai le talalelei, ma agasala, ae ua faatagaina pea e le Togiola a Iesu Keriso i tatou e salamo, saunia e toefoi atu ma mauaina ia faamanuiaga lemafaatusalia ua folafola mai e le Atua—ia nonofo e faavavau faatasi ma le Tama ma le Alo i le tikeri sili ona maualuga o le malo selesitila.¹⁴

E pei lava ona outou silafia, e leai lava ma se tasi o le a sola ese mai le oti; o le mea lea, o la tatou sini mo se taimi umi ma fuafuaga e tatau ona taulai atu i le taimi tatou te toefoi atu ai i lo tatou Tama Faalelagi, o le a tatou mauaina mea uma ua Ia fuafuaina mo i tatou taitoatasi.¹⁵

Ou te molimau atu e leai lava se isi sini e sili atu i le olaga faaletino nai lo le ola e faavavau faatasi ai ma o tatou Matua Faalelagi faapea ma lo tatou Faaola pele, le Alii o Iesu Keriso. Ae e sili atu nai lo le na o la tatou lava sini—o la Latou sini foi. E i ai so Latou alofa atoatoa mo i tatou, sili atu ona mamana nai lo mea e mafai ona tatou amata malamalama i ai. Latou te ogatusa atoatoa, maeaea ma faavavau ma i tatou. O i tatou o la Latou galuega. O lo tatou mamalu o lo Latou mamalu foi lea. E sili atu i lo se isi lava mea, Latou te finagalo ia tatou foi atu i le aiga—ia toefoi atu ma maua le fiafia e faavavau i lo Latou afioaga.

Ou uso e ma tuafafine, toe tasi le vaiaso ona tatou faamanatuina lea o le Aso Sa o le Laupama—e faamanatu ai le ulufale manumalo atu o Keriso i Ierusalema. Toe lua vaiaso ona tatou faamanatuina lea o le Aso Sa o le Eseta—e faamanatu ai le manumalo o le Faaola i le oti.

A tatou faataulai atu o tatou mafaufauga i le Faaola i nei Aso Sa faapitoa e lua, ia tatou manatua o Ia ma faafou a tatou tautinoga o le olaga atoa i le tausiga o Ana poloaiga. Ia tatou vaai toto’a i o tatou lava olaga, ia seti a tatou lava sini ma taulai atu a tatou fuafuaga ia ogatusa ma le fuafuaga a le Atua i se auala o le a taitai mulimuli atu ai i tatou e agai atu i lo tatou avanoa taua e toefoi atu ma mauaina—o la’u tatalo faamaualalo lea i le suafa o Iesu Keriso, amene.