Elder Joni L. Koch

Fitugafulu o le Pulega Aoao

O Elder Joni Luiz Koch o se tagata o le augatupulaga lona lua o le Ekalesia mai Pasila. Na asiasi atu ona matua, o Luiz and Etelca Gascho Koch, i ni ekalesia eseese i le lotoifale i le popofou o le la faaipoipoga ina ia maua le upumoni faaleagaga.

O ni itula talu ona mavae le ofoina atu e lona tina o se tatalo mai le loto ma folafola atu e mulimuli i le Atua, na taunuu atu ai faifeautalai i le faitotoa a ona matua. I le itiiti ifo ma le ono masina, sa papatisoina i laua.

Sa soifua mai i le 1962, na ola ae Elder Koch i Joinville, Santa Catarina, Pasila. O le uunaiga a taitai o le Ekalesia, e pei o se faiaoga tuuto o le Peraimeri, se epikopo faaletama, ma se peresitene o le siteki lototoa, na fesoasoani ia te ia e tautino atu ia ola i le talalelei.

Ina ua maea se misiona talai i le Misiona a Pasila Sao Paulo i Matu, na aoga Elder Koch i mataupu tau fuainumera i le Iunivesite o Polika Iaga i Provo, Iuta, ISA. “I se malaga e toe foi atu i Pasila, sa ou asiasi atu ai i le uarota a se uo, lea sa ou feiloai ai i lou toalua o le lumanai,” o le tala lea a Elder Koch. “Sa ia savali mai ia te au ma fesili mai pe ua ou faaipoipo.” Ina ua mavae se faamasaniga valu masina le mamao—ma na o le 15 moni lava aso sa faatasi ai—na ia faaipoipo atu ai ia Liliane Michele Ludwig i le aso 26 o Aperila, 1988, i le Malumalu o Sao Paulo Pasila. E toalua le la fanau.

Ina ua uma ona faauu mai le BYU ma mauaina se faailoga faapitoa o le matuaofaiva o le pulega faapisinisi, sa faigaluega Elder Koch i mea tau fuainumera faavaomalo. I le periota o le 25 tausaga, sa ia faigaluega ai mo ni kamupani eseese seia oo ina valaauina e auauna atu tumau mo le Ekalesia.

Sa auauna atu Elder Koch o se epikopo, peresitene o le siteki, ma Fitugafulu Eria. Sa ia auauna atu o se peresitene o le Misiona a Mozambique Maputo i le taimi o lona valaauga o se Fitugafulu o le Pulega Aoao.

“Na fausia malie lava lau molimau i le aluga o taimi e ala i aafiaga faaleagaga na mauaina i le ola ai i le talalelei,” o le tala lea a Elder Koch. “O le Tusi a Mamona o se tasi o elemene autu i le malosi o la’u molimau i le Alii o Iesu Keriso, Lana Ekalesia, ma le Perofeta o Iosefa Samita.”