Jean B. Bingham

Peresitene Aoao o le Aualofa

O le nofo ai i ni nofoaga eseese i le Iunaite Setete, ua talisapaia ai e Sister Jean B. Bingham le ala o aumaia ai e le talalelei se uunaiga malosi i taimi o suiga i le siosiomaga.

Sa soifua mai i le 1952 i Provo, Iuta, ISA, ia Robert ma Edith Joy Barrus, sa ia tuputupu ae ma ni uso e toaono ma tuagane e toalua. Sa ia auai i le aoga tulagalua i Texas ma Minesota, ISA, ma faamaea le aoga maualuga i New Jersey. Sa na o ia ma nai ona tei ni tamaiti aoga a le AAG i a latou aoga seia oo ina latou siitia atu i New Jersey, lea sa ia fiafia ai i le iloaina o loo i ai se teine mai lana uarota fou i lana vasega.

Ina ua uma ona la faaipoipo ma Bruce Bingham i le Malumalu o Provo Iuta i le aso 22 o Tesema, 1972, sa la siitia atu i Ilinoi e faaauau le aoga a [Bruce].

E toalua ni fanau sa fananau mai ia Brother ma Sister Bingham, ma sa la ta’ua o ni a laua lava fanau nisi sa la tausia. Sa ia mauaina se tikeri i le olaga faaleaiga, ma a o i ai le la uii i le aoga maualuga, sa ia toe foi i le aoga ma sa maua se faailoga o le matuaofaiva i le aoao atu.

O le uluai valaauga o Sister Bingham i le Aualofa na oo mai ina ua faatoa mavae le fanauina o lana tamaitiiti muamua. “Na valaauina a’u e aoao atu ia lesona o aoaoga faatina. Sa avea ma se avanoa sili e aoao ai mai faataitaiga a isi uso faapea foi ma le tusi lesona.”

Sa malaga soo Sister Bingham i le taimi o lana auaunaga o se sui o le au faatonu aoao o le Peraimeri ma i le avea ai ma se fesoasoani i le Au Peresitene Aoao o le Peraimeri. Na ia vaaia ni luitau ma faamanuiaga o le avea ai ma se tagata o le Ekalesia i eria i le salafa o le lalolagi.

Ua faamoemoe o ia o le a iloaina e uso o le Aualofa le lelei i le tasi ma le isi. “O se faaosoosoga le faatusatusa o i tatou lava i isi, o ni faafitauli ma e faafeagai ma le finagalo o le Tama Faalelagi mo i tatou.” Sa ia fai mai o le Aualofa e fesoasoani i uso taitasi ia atiae se malamalama o le tagata o i ai o ia i le malo e faavavau. “A tatou faatotonugalemuina o tatou olaga ia Iesu Keriso, ua tatou iloa moni lava le tagata tatou te i ai,” o lana tala lea.