Elder Taniela B. Wakolo

Fitugafulu o le Pulega Aoao

O Elder Taniela Biu Wakolo sa tuuto atu uma aso o lona soifuaga talu mai lona papatisoga ia Mati 1994 e auauna atu ai i le Alii.

Na soifua mai i le 1967 i se tamai motu o Lomaloma, Lau, Fiti, ia Taniela Vosa ma Temalesi Buadromo Wakolo, o Elder Wakolo o le uii o le fanau e toaono. “Sa ou ola ae i se aiga e ese le faatauvaa, ae sa matou mauoa i le tulaga o le alofa sa matou mauaina mo le tasi ma le isi,” sa ia fai mai ai.

I le 12 o ona tausaga, na tuua ai e Elder Wakolo le fale a ona matua e auai i le aoga nofotumau e silia ma le 500 alii talavou, e i le vaitausaga o le 12 i le 19. “Sa avea lena ma se nofoaga lelei mo le aoaoga mo a’u,” o lana tala lea. “O iina sa ou aoaoina ai le amio-pulea.”

Sa ia tafao faamasani ma Anita Herberta Moimoi, o se tagata faatoa liliu mai, mo le silia ma se tausaga. Sa la faaipoipo i le aso 22 o Aokuso, 1987, i Suva, Fiti.

E lei vave ona liliu mai Elder Wakolo, ma i le aluga o uluai tausaga e valu o le faaipoipoga a le ulugalii, sa ia feiloai ai i le tele o faifeautalai. “E faafaa ona ou faamaeaina lesona a [faifeautalai] i tausaga e valu,” o lana tala lea. “E toa 24 a’u faifeautalai.”

O se fesili faigofie mai se tasi o na faifeautalai e uiga i le igoa o le Ekalesia na suia ai lona mafaufau e uiga i le papatisoga. “E tatau ona faaigoaina le Ekalesia i lē e anaina,” o lana tala lea. “Na lava lea mo a’u.”

Sa faamauina Elder Wakolo ma lona faletua i le Malumalu o Nukualofa Toga i le 1995. O i la’ua o ni matua o se fanau e toalua.

Mai lona papatisoga sa vave ona sosoo ai ma avanoa e auauna atu. E lua vaiaso talu ona uma lona papatisoga, ae valaauina o ia i le au peresitene o Alii Talavou a le uarota ma faiaoga faatasi ma lona faletua i le seminare. Ina ua maea le itiiti ifo ma se tausaga, sa ia taliaina le valaauga e auauna atu o se peresitene o le paranesi. Na auauna atu mulimuli ane o se fesoasoani i se au peresitene o le siteki, peresitene o le siteki, ma Fitugafulu Eria. I le taimi o lona valaauga o se Fitugafulu a le Pulega Aoao, sa ia pulefaamalumalu i le Misiona a Arkansas Little Rock.

Sa a’otauina Elder Wakolo i mataupu faalepulega mo taitai ma tagata lautele ma mauaina se faailoga o le matuaofaiva i le pulega. Talu ai nei lava, sa avea o ia ma se pule i le Ofisa Autu o Auaunaga a le Ekalesia i Fiti.