Sharon Eubank

Fesoasoani Muamua, i le Au Peresitene Aoao o le Aualofa

I le avea ai ma se tagata faigaluega fou i le Auaunaga o Fesoasoani Alofa a le AAG, sa molimauina ai e Sharon Eubank le pagatia, faanoanoa, ma le faavauvau lea na faigata ai ia te ia ona galue. E ala i le tatalo, sa oo ai ina ia malamalama e ui e mafai ona ia fesoasoani i le Alii e tausia Lana fanau, na te le pule i lena faanoanoaga. “O Iesu Keriso o loo pule. O le a Ia tauaveina lena avega. O i latou o Lona nuu, ma e Na te faafofoga ma taliina a latou tatalo.” O lena tali na suia ai lona gafatia e aapa atu ma auauna atu.

O tausaga mulimuli ane, i le avea ai o, Sister Eubank, ma faatonu o Auaunaga Limafoai a le AAG—o le faalapotopotoga limafoai a le Ekalesia—na auina atu ni fesoasoani ma faalauiloa atu le ola tutoatasi ia i latou o e le tagolima i le salafa o le lalolagi.

Na lagolagoina i le aso 1 o Aperila, 2017, i le Au Peresitene Aoao o le Aualofa, o le a ia faaauau ai pea i lana matafaioi i le avea ai ma faatonu o le Auaunaga Limafoai a le AAG. O loo i ai se “sootaga maoae” i le va o Auaunaga Limafoai a le AAG ma le Aualofa, lea e saofafai ai sui o le Au Peresitene Aoao o le Aualofa i le au faatonu aoao mo le Auaunaga Limafoai a le AAG, sa ia faamalamalama mai. O ona tiutetauave mo faalapotopotoga uma e lua o le a faamalosia ai lena sootaga.

Na soifua mai i le 1963 i Redding, Kalefonia, ISA, o Sharon o le ulumatua o le fanau e toafitu a Mark ma Jean Eubank. Na ola ae Sister Eubank i Bountiful, Iuta, ISA, i se fasi laueleele e 10 eka (4 ha) lea na pikiina ai e le fanau a Eubank ia apricots, lipea ia paipa faapasī, ma nonofo latalata i atumauga o Iuta.

Sa maua e Sister Eubank lona faailoga o le tagata malaga i le Igilisi ma talafaasolopito mai le Iunivesite o Polika Iaga, i Iuta, ma sa auauna atu i le Misiona a Finelani Helsinki.

E le gata i lana galuega i le Matagaluega o le Uelefea a le Ekalesia, sa galue Sister Eubank i Capitol Hill i Uosigitone, D.C., ISA, sa pulea faatasi ma se isi tagata se pisinisi laitiiti, ma sa alala i fafo i Iapani ma Farani.

O avanoa taitasi o se “puna oso o le faatuatua” lea na fesoasoani ia te ia e aoao ai tomai o loo ia faaaogaina i lenei vaitaimi, ua faatagaina ai o ia e feiloai ma ni tagata lelei i totonu ma fafo atu o le Ekalesia, ma ua avatua ia te ia se fiafiaga ma se agaga talisapaia mo le tele o aganuu, gagana, ma meataumafa o le lalolagi.