E Faapefea ona Fesoasoani le Agaga Paia ia te Oe?
Saunia e Elder Gary E. Stevenson
O Le Korama a Aposetolo e Toasefululua
E lapatai mai le Agaga Paia, e faamafanafana mai le Agaga Paia, ma e molimau mai le Agaga Paia.
I se afiafi o se aso Gafua e lei mamao atu, sa ma asiasi ai ma lou toalua, o Lesa i le fale o se aiga talavou i la matou pitonuu. A o ma i ai iina, sa valaaulia i maua e le aiga e nonofo mo le afiafi faaleaiga, ma ta’u mai ia i maua sa saunia e le la atalii e iva tausaga le matua le lesona. Ioe, na ma nonofo!
I le mavae ai o le pese amata, tatalo, ma pisinisi faaleaiga, na amata e le iva tausaga i le faitauina o se fesili mai lana lesona na tusiaina: “E faapefea ona fesoasoani le Agaga Paia ia te oe?” O le tuuina atu o lenei fesili na amata ai se talanoaga anoa faaleaiga a o faasoaina e tagata uma ni manatu ma ni malamalamaaga. Sa faagaeetia au i sauniuniga o le lesona a le matou faiaoga ma lana fesili lelei tele, lea na ou mafaufau ai pea ina ua maea lenei asiasiga.
Talu mai lena taimi, e faaauau pea ona ou fesili ifo ia te au lava, “E faapefea ona fesoasoani le Agaga Paia ia te oe?”—o se fesili e taua aemaise lava mo outou uma tamaiti o le Peraimeri o le a atoa le valu [tausaga] ma saunia mo le papatisoga ma mo outou fanau na papatisoina lata mai nei ma maua le meaalofa o le Agaga Paia. E fitoitonu foi mo le faitau afe o tagata fou liliu mai.
Ou te valaaulia i tatou taitoatasi, aemaise o tamaiti Peraimeri, ina ia mafaufau, “E faapefea ona fesoasoani le Agaga Paia ia te oe?” Pe a ou mafaufau i lenei fesili, na vave ona ou mafaufau i se aafiaga mai lou talavou. O le tala lenei sa ou faamatalaina ia Elder Robert D. Hales ae lei leva ona valaauina au i le Korama a Aposetolo e Toasefululua ma lea sa ia faaaofia i se tusiga o le mekasini a le Ekalesia sa ia tusia e uiga i lo’u olaga.1 Atonu ua faafofoga i ai nisi o outou i lenei tala, ae e toatele e lei faalogo i ai.
Pe tusa o le 11 o ou tausaga, sa ma savali sopo ai ma lou tama i se aso vevela o le tau mafanafana i atu mauga e latalata i lo matou fale. A o savali sopo agai i luga Tama i se magaala e tu, sa ou puna mai i lea maa lapoa i le isi maa, i autafa o le ala. Ma le faamoemoe e pe’a i se tasi o maa tele lava, sa amata ona ou pe’a ai i luga. A o ou pe’a atu i luga o le maa tele, sa ou te’i ina ua mau lou tama ia te au i lou fusipau ma toso vave mai au i lalo, ma fai mai, “Aua e te pe’a i le maa lena. Ta tumau pea i le ala.”
I minute mulimuli ane, sa ma tilotilo atu i lalo mai i luga a’e o le ala, ma sa faate’ia i maua a o ma vaaia se gata uogo o taatia i luga o le maa lava lea sa ou faamoemoe e pe’a ai.
I se taimi mulimuli ane, a o ma tietie atu agai i le fale, sa ou iloaina sa faatali Tama ia te au e fesili atu: “Na faapefea ona e iloa sa i ai le gata uogo iina?’ O lea na ou fesili ai, ma o lau fesili sa taitai atu i se talanoaga e uiga i le Agaga Paia ma le ala e mafai ai e le Agaga Paia ona fesoasoani ia i tatou. E lei galo lava ia te au le mea sa ou aoaoina i lena aso.
E mafai ona outou iloa le ala na fesoasoani ai le Agaga Paia ia te au? Ou te faafetai pea e faavavau i le faalogo o lou tama i le leo filemu ma le itiiti, o le Agaga Paia, aua sa mafai ona faasaoina ai lou ola.
O Mea Tatou te Iloa e uiga i le Agaga Paia
Ae tatou te lei mafaufau atili i le fesili “E faapefea ona fesoasoani le Agaga Paia ia te oe?” sei o tatou iloilo nisi o mea sa tatou aoaoina i le asō e uiga i le Agaga Paia. E tele upumoni e faavavau o loo i ai e mafai ona tatou vaai i ai, ae o le asō e na o le tolu [upumoni] o le a ou taulai i ai.
Muamua, o le Agaga Paia o le sui lona tolu o le Aiga Atua. Tatou te aoaoina lenei upumoni i le uluai mataupu faavae o le faatuatua: “Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia.”2
Lua, o le Agaga Paia o se peresona o agaga, e pei ona faamatalaina i tusitusiga paia o nei ona po: “Ua i le Tama se tino o aano ma ivi e mafai ona pa’i i ai e pei o le tagata; ua faapea foi le Alo, ae o le Agaga Paia e leai se tino o aano ma ivi, ae o se peresona o Agaga. A na le faapea, e le mafai e le Agaga Paia ona mau i totonu o i tatou.”3 O lona uiga o loo i ai i le Agaga Paia se tino agaga, e le pei o le Atua le Tama ma Iesu Keriso, e i ai tino faaletino. E faamanino e lenei upumoni isi suafa ua tuuina atu i le Agaga Paia ma e tatou te masani i ai, e aofia ai le Agaga Paia, Agaga o le Atua, Agaga o le Alii, Agaga Paia o le Folafolaga, ma Le Faamafanafana.4
Tolu, e oo mai le meaalofa o le Agaga Paia e ala i le faaee atu o lima. O lenei sauniga, lea e sosoo ma le papatisoga, e agavaa ai i tatou mo le mafutaga faifai pea a le Agaga Paia.5 Ina ia faatino lenei sauniga, e tuu e ē umia le Perisitua Mekisateko o latou lima i luga o le ulu o le tagata,6 ta’u lona suafa, ta’u atu le pule o le perisitua o ia i latou, ma i le suafa o Iesu Keriso, e faamauina ai o ia o se tagata o Le Ekalesia a Iesu Keriso o le Au Paia o Aso e Gata Ai, ma faaleoina le fuaitau taua: “Talia le Agaga Paia.”
E Faapefea ona Fesoasoani le Agaga Paia ia te Oe?
Faatasi ai ma lena iloiloga faigofie o upumoni taua e tolu e uiga i le Agaga Paia, tatou te toe foi i la tatou fesili muamua: “E faapefea ona fesoasoani le Agaga Paia ia te oe?”
E Lapatai Mai le Agaga Paia
E pei ona ou faamatalaina lou aafiaga a o laitiiti, e mafai ona fesoasoani le Agaga Paia ia te oe e ala i le muai lapataiina o oe e uiga i tulaga lamatia faaletino ma faaleagaga. Sa ou toe aoaoina le matafaioi taua o le Agaga Paia e lapatai mai a o ou auauna atu i le Au Peresitene o le Eria i Iapani.
I lea taimi, sa ou galue vavalalata ai ma Peresitene Reid Tateoka, o le Misiona a Sendal Iapani. O se vaega o lana galuega masani o le misiona, e fuafuaina e Peresitene Tateoka se fonotaga mo taitai faifeautalai i le vaega i saute o lana misiona. I nai aso a o lei faia le fonotaga, sa maua e Peresitene Tateoka se uunaiga, o se lagona i lona loto, e valaaulia faifeautalai uma o lena sone i saute i le fonotaga faaleautaitai, i lo le numera atofaina laiti o taitai alii ma tamaitai faifeautalai.
Ina ua ia faalauiloa atu lona faamoemoega, sa faamanatu atu ia te ia o lenei fonotaga faapitoa sa le i fuafuaina mo faifeautalai uma ae mo na o taitai i le misiona. E ui i lea, o le tuu ese o le fuafuaga masani ina ia mulimuli i le uunaiga sa ia maua, sa ia valaaulia ai faifeautalai uma o loo galulue i nai aai tu matafaga, e aofia ai le aai o Fukushima, i le fonotaga. I le aso na atofaina, 11 Mati, 2011, sa potopoto faatasi faifeautalai mo le fonotaga o le misiona ua faalauaitele i totonu o le aai o Koriyama.
A o faia lea fonotaga, sa taia le itulagi o Iapani lea sa i ai le Misiona a Sendal Iapani i se mafuie e 9.0 le malosi ma le galulolo. O le mea e faanoanoa ai, o le tele o aai tu matafaga—e aofia ai na [aai] na faapotopoto mai ai faifeautalai—sa faaleagaina ma pagatia i le tele o soifua na ma’umau. Ma sa mafatia le aai o Fukushima i se malosiaga faaauau pea faaniukilia.
E ui sa faaleagaina le falelotu sa feiloai ai faifeautalai i lena aso, ae e ala i le mulimuli i uunaiga a le Agaga Paia, sa potopoto saogalemu Peresitene ma Faletua Tateoka ma faifeautalai uma. Sa latou i ai i se nofoaga saogalemu mai le fia maila le mamao mai le faatamaiaga o le galulolo ma mea na faaleagaina e niukilia.
A o e faalogo i musumusuga mai le Agaga Paia—o lagona e tele ina filemu ma mālū—e ono aveesea mai oe, e aunoa ma le iloaina lava, mai i tulaga lamatia faaleagaga ma faaletino.
Uso e ma tuafafine, o le a fesoasoani le Agaga Paia ia te oe e ala i le lapataiina o oe, e pei ona ia faia i lo’u tama ma Peresitene Tateoka.
E Faamafanafana le Agaga Paia
Ina ia tali le fesili “E faapefea ona fesoasoani le Agaga Paia ia te oe?” sei o tatou suesue nei i Lana matafaioi o Le Faamafanafana. O mea e tutupu faafuasei i o tatou olaga atoa e mafua ai le faanoanoa, tiga, ma le le fiafia. Peitai, i le lotolotoi o nei faigata, e fesoasoani mai le Agaga Paia ia i tatou i se tasi o Ana matafaioi taua—e Faamafanafana, o se tasi lea o Ona suafa moni. O nei upu toafimalie, ma mautinoa mai ia Iesu Keriso e faamatala ai lenei matafaioi paia, “Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau.”7
Ina ia faamalamalama atili lenei mataupu faavae, ou te faasoaina atu se tala moni o se aiga e toalima atalii o e na masii mai Los Angeles, Kalefonia, ISA, i se nuu laitiiti i ni nai tausaga ua mavae. Sa amata ona taaalo atalii matutua e toalua i taaloga o le aoga maualuga ma fegalegaleai ma uo, taitai, ma faiaoga—o le toatele o i latou o ni tagata faamaoni o le Ekalesia. O nei fegalegaleaiga na fesoasoani e taitai atu i le papatisoina o Fernando, le ulumatua, ma lona uso laitiiti.
Na mulimuli ane siitia ese mai Fernando mai le aiga, lea na ia faaauau ai ana a’oa’oga ma taalo ai i le lakapi amerika i le kolisi. Sa ia faaipoipo atu i lana manamea mai le a’oga i le malumalu, o Bayley. A o faamaeaina e Fernando ma Bayley le la aoga, sa la faatali ma le naunautai i le fanau mai o le la tamaitiiti muamua—o se pepe teine. Ae i le taimi o le faagasologa o le fesoasoani a o la aiga i le toe foi atu o Fernando ma Bayley i le aiga, sa matautia le lavea ai o le taavale a Bayley ma lona uso i luga o le aualatanu ma sa tele ni taavale na lavevea ai. Sa maliliu uma ai Bayley ma lana tama teine e lei fanau mai.
Ae e pei o le matuitui o tiga o Fernando, e oo lava foi i matua o Bayley ma ona tei, e faapena foi le loloto o le filemu feteenai ma le mafanafana na latou lagonaina toetoe lava i le taimi lava lena. Na lagolagoina moni e le Agaga Paia Fernando i Lana matafaioi o Le Faamafanafana i lenei faigata lēmafaamatalaina. Na auina mai e le Agaga se filemu tumau lea na taitai atu ai Fernando i se uiga o le faamagalo atu ma le alofa i tagata uma na aafia i le faalavelave matautia.
Sa valaau atu matua o Bayley i le tuagane o Bayley sa auauna atu o se faifeautalai i le taimi o le faalavelave. Sa ia faamatalaina ona lagona mulimuli ane i se tusi i lona aiga i le faalogo ai i le tala faigata e uiga i lona tuafafine pele: “Sa ofoofogia le faalogo atu i ō outou leo sa matua’i toafilemu i le lotolotoi o se taimi faigata. Ou te lei iloa le tala e fai atu. … Na pau le mea na ou mafaufau i ai atonu o le a lē i ai iina lo’u tuafafine pe a ou alu atu i le fale. … Sa faamafanafanaina au e ā outou molimau mausali o le Faaola ma Lana fuafuaga. O lea agaga filemu e tasi na te aumaia au e latalata i le tagi masūsū a o faatumulia lou loto i le suesue ma le aoao atu. Sa faamafanafanaina au ma faamanatu mai mea ua ou iloaina.”8
O le a fesoasoani le Agaga Paia ia te outou e ala i le faamafanafanaina o outou, e pei ona ia faia mo le aiga o Fernando ma Bayley.
E Molimau Mai le Agaga Paia
E molimau mai foi le Agaga Paia ma tuuina atu le molimau e uiga i le Tama ma le Alo ma upumoni uma.9 Na fetalai atu le Alii i Ona soo, e faapea: “A maliu mai le Fesoasoani, o le ou te auina mai ia te outou mai le Tamā, … o ia lava e molimau ia te au.”10
Ina ia faamatalaina le matafaioi taua o le Agaga Paia o se molimau ma Le e molimauina, o le a ou faaauau atu le tala ia Fernando ma Bayley. Afai tou te manatua, sa ou faasoa atu sa papatisoina Fernando ma lona uso, ae e le’i papatisoina ona matua ma ona uso laiti e toatolu. Ma, e ui i le mauaina o valaaulia e anoanoai e feiloai ma faifeautalai i le tele o tausaga, sa teena e le aiga ia taimi taitasi.
I le tiga ai i le maliu o Bayley ma lana pepe teine, sa le mafaamafanafanaina le aiga o Fernando. Sa lei pei [i latou] o Fernando ma sa lei pei o le aiga o Bayley, sa latou le’i mauaina le mafanafana ma le filemu. Sa lei malamalama i laua pe na faapefea e le la atalii, faatasi ai ma le aiga a Bayley, ona tauave o latou avega mamafa.
Mulimuli ane, na latou malamalama ai o le mea sa mauaina e lo la atalii ma e le’i mauaina e i latou, o le talalelei toefuataiina a Iesu Keriso, ma masalo o lona puna lea o le filemu ma le mafanafana. Ina ua latou silafia lenei mea, sa latou valaaulia faifeautalai e aoao le talalelei i lo latou aiga. O se taunuuga, sa latou mauaina la latou lava faamautinoaga ma le molimau o le fuafuaga sili o le fiafia, lea na aumaia ia i latou le suamalie o le filemu ma le mafanafana toafimalie lea sa latou faananau e saili.
E lua masina talu ona maliu Bayley ma le tama teine a le la tama e lei fanau mai, sa papatisoina matua o Fernando faapena ma ona uso laiti e toalua ma faamauina ma maua le meaalofa o le Agaga Paia. Ua tulimatai atu nei le uso laitiiti o Fernando i lona papatisoga pe a atoa lona valu tausaga. Ua latou taitasi ma molimau o le Agaga, le Agaga Paia lea, sa molimau mai i le moni a’ia’i o le talalelei, ma taitai i latou i se manao ina ia papatisoina ma maua le meaalofa o le Agaga Paia.
Uso e ma tuafafine, o le a fesoasoani le Agaga Paia ia te outou e ala i le molimau atu ia te outou e pei ona Ia faia i le aiga o Fernando.
Aotelega
Se’i ou otooto atu nei mea sa ou talanoa i ai. Ua ou faailoa atu ni upumoni faaalia se tolu lea e aumaia ia i tatou se malamalama o le Agaga Paia. O upumoni nei, o le Agaga Paia o le sui lona tolu o le Aiga Atua, o le Agaga Paia o se peresona o agaga, ma o le meaalofa o le Agaga Paia e oo mai e ala i le faaee atu o lima. Sa ou faailoa atu foi ni tali se tolu i le fesili “E faapefea ona fesoasoani le Agaga Paia ia te oe?” E lapatai mai le Agaga Paia, e faamafanafana mai le Agaga Paia, ma e molimau mai le Agaga Paia.
Agavaa e Faatumauina ai le Meaalofa
Mo outou o loo sauni ina ia papatisoina ma faamauina, i latou e le’i leva, pe ua leva ona [papatisoina ma faamauina] i se taimi ua leva atu, e taua i lo tatou saogalemu faaletino ma le faaleagaga le tatou faatumauina o le meaalofa o le Agaga Paia. Tatou te amata ona faia e ala i le taumafai e tausi ia poloaiga, faia o tatalo faaletagata lava ia ma faaleaiga, faitauina o tusitusiga paia, ma saili sootaga agaalofa ma faamagaloga ma aiga ma e pele. E tatau ona tatou tausia le mamā o ō tatou mafaufauga, amioga, ma le gagana. E tatau ona tatou tapuai i lo tatou Tama Faalelagi i o tatou aiga, i le lotu, ma pe a mafai ai, i le malumalu paia. Faalatalata i le Agaga, ma o le a latalata atu foi le Agaga ia te oe.
Molimau
Ou te faaiu atu nei i se valaaulia ma lau molimau mausali. Ou te valaaulia outou ia ola atoatoa i upu e masani ona lagiina e le fanau Peraimeri, o upu ou te mautinoa ua latou iloaina: “Faalogo, faalogo. Faalogo i le Agaga Paia. Faalogo, i Lona leo.”11
Ou uso e ma tuafafine pele, matutua ma talavou, ou te tuu atu lau molimau i le mamalu o le i ai o le tagata paia lea e aofia i le Aiga Atua—le Atua le Tama, o Iesu Keriso, ma le Agaga Paia. Ou te molimau atu o se tasi o faamanuiaga lea tatou te olioli ai o ni Au Paia o Aso e Gata Ai o loo ola i le atoatoaga o taimi o le meaalofa lea o le Agaga Paia. Ou te iloa e mafai ma o le a fesoasoani atu le Agaga Paia ia te oe. Ou te faaopoopo atu foi lau molimau faapitoa ia Iesu Keriso ma Lana matafaioi o lo tatou Faaola ma le Togiola ma i le Atua lo tatou Tama Faalelagi. I le suafa, o Iesu Keriso, amene.