O Se Faiaoga o Lē e Fesoasoani e Laveai Agaga

Saunia e Brian Hansbrow

Atinae o Mataupu Aoaoina a le Ekalesia

O Mafuaaga na aoao atu ai le Faaola ua tuuina atu ai le uiga i le auala sa Ia aoao atu ai. E ese sa tatou faamoemoega?

Ou te tautino atu pe a ou mafaufau e uiga i le aoao atu i le ala a le Faaola, e matele ina ou taulai atu i le auala sa Ia aoao atu ai. O le a le mea sa Ia faia? Na faapefea ona Ia fesootai ma tagata? I le faaiuga lava, o Ia o le faiaoga sili! Ae afai tatou te mananao e aoao atu faapei o Ia, e taua le malamalama i le mafuaaga na Ia aoao atu ai. O le taunuuga lava, o le a faia e lena “mafuaaga” le eseesega tele mo i tatou ma mo i latou o tatou aoaoina.

Ina ua aoao mai le Faaola, e le o Lona faamoemoega le faatumu o le taimi po o le faafiafia po o le la’u i lalo o se vaega o faamatalaga. O mea uma lava na Ia faia—e aofia ai le aoao atu—ua faamoemoe ina ia taitai atu ai isi i Lona Tama. O le naunautaiga atoa ma le misiona a le Faaola ia laveai fanau a le Tama Faalelagi (tagai i le 2 Nifae 26:24). I la tatou taumafaiga e aoao atu e faapei ona Ia faia, e mafai ona tatou aoao ina ia uunaia e le faamoemoega lava e tasi lea na faaosofia ai o Ia.

I se isi faaupuga, o le aoao atu i le ala a le Faaola o le avea lea ma se faiaoga o le o loo avea ma ana faamoemoega le fesoasoani e laveai agaga.

O Le Manao e Laveai Isi

O se tasi o tala e siili ona ou fiafia i ai i le Tusi a Mamona o loo faamatala ai atalii o le Tupu o Mosaea ia na lafoaia le malo o sa Nifae, ina ia mafai ona latou faatuina le malo o le Atua i totonu o sa Lamana. Na latou lafoaia se malo faalelalolagi mo le malo o le lagi. Sa latou lafoai mea matagofie o le saogalemu ma le puipuiga i totonu o sa Nifae ae o atu i totonu o o latou fili, o tagata sa Lamana, ina ia mafai ona latou “faaolaina ni isi e toaitiiti o o latou agaga” (Alema 26:26).

O le a le mea na uunaia ai nei auauna a le Alii? “Sa le mafai ona latou talitalia le fano o le agaga o soo se tagata; ioe, e oo lava i le mafaufau ifo e faapea o le a oo i se agaga le mafatia e lē gata sa galulu ma tetete ai i latou” (Mosaea 28:3). O lena uunaiga na mafua ai ona onosaia le “tele o latou puapuaga” (Alema 17:5, 14).

O lenei tala e masani ona uunaia a’u e mafaufau, O o’u faia ea le mea ou te mafaia e aumai ai isi ia Keriso? O lava ea lo’u taulai atu i le laveaiina o agaga?

Avea ma se Faiaoga e Fesoasoani e Laveai Agaga

Pe a tatou mananao e aoao atu mo le mafuaaga lava e tasi na faia ai e le Faaola, o mataupu faavae o le faapefea ona Ia aoao ua i ai se uiga sili atu. O le sili atu nai lo o ni metotia, ua avea ma mamanu mo le avea faapei o Ia. A o tatou faaaogaina pea lava pea ia manatu nei, faapea foi ma isi o loo maua i le Aoao Atu i le Ala a le Faaola, e le gata ina mafai ona tatou aoao atu atili e faapei o Ia ae ia avea atili foi e faapei o Ia.

Saili Faaaliga i se Taimi Vave

Ina ia fesoasoani i le galuega o le laveaiina o agaga, tatou te manaomia faaaliga. E oo mai faaaliga i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30)—ma e alu ai le taimi. O lea e amata ai ona tatou vave sauniuni ma tatou saili soo ia faaaliga.

Alofa i Tagata

O le alofa atonu o le auala sili lea ona malosi e mafai ona fesoasoani i se faiaoga e laveai ai agaga. Atonu e faigofie e pei o le iloaina o igoa o tagata taitasi o le vasega, fesili atu i ai e uiga i o latou vaiaso, ma tau i ai e ese le manaia o le lauga sa latou tuuina atu, pe faamalo i ai i se mea taua po o se mea na ausia. O le faaali atu o le naunau ma le alofa e tatalaina ai loto ma fesoasoani ia i latou o tatou aoaoina ina ia gauai atu i le Agaga Paia.

Sauni e Aoao Atu ma Mafaufau i Manaoga o Tagata o loo Aoaoina

O se faiaoga o loo fesoasoani e laveai agaga e taulai atu i le tagata o loo aoaoina. A o tatou iloiloina anomea o le lesona, tatou te taulai atu i mea o le a sili ona taulimaina ai o latou manaoga, ae le o tatou [manaoga]. Tatou te faagalo le faatumuina o le taimi ae taulai atu i le faatumuina o loto ma mafaufau. Tatou te le mafaufau i na o a tatou upu ma taga, ae o upu ma taga a tagata o loo aoaoina. Tatou te mananao ia i latou ia faasoa mai o latou manatu aua e fausia ai le lotogatasi, tatalaina ai o latou loto, ma fesoasoani ia i latou e faatino le faatuatua.

Ia Taulai Atu i le Aoaoga Faavae

O se mea masani mo faiaoga le iloilo o lo latou mataalia e ala i le aofai o le auai sa latou uunaia, ae ua na o se vaega lena e tasi o le aafiaga. Afai na tele le faasoa a la tatou vasega ae matua itiiti lava le aoaoga faavae, ua matou saunia le mea na ta’ua e Elder Jeffrey R. Holland o le Korama a Aposetolo e Toasefululua “o se ‘alu falai.” Ua matou tuuina atu se mea e tofo lelei, ae ua matou toilalo i le fafagaina o a matou tagata o le vasega ma le mana lagolago o le aoaoga faavae.

Na aoao mai le Perofeta o Iosefa Samita, “O le tagata e faasaoina e le sili atu lona saoasaoa i lo lona mauaina o le atamai.”¹ E tatau ona tatou fesoasoani ia i latou o tatou aoaoina ia maua le ituaiga atamai sili ona taua—le mataupu faavae a Iesu Keriso.

Afai e fefaasoaai faatasi o tatou manatu ma lagona ma tagata o le vasega, e tatau lava ona tatou toe faafesootai atua i tusitusiga paia ma upu o perofeta o aso e gata ai. Talu ai nei, sa aoao mai ai Brother Tad R. Callister, Peresitene Aoao o le Aoga Sa: “O le faiaoga lelei e taumafai pea lava pea ia fesootai manatu o le vasega i le mataupu faavae. Mo se faataitaiga, atonu e faapea mai se faiaoga, ‘O le aafiaga sa e faasoaina ua ou manatua ai se mau.’ Po o le, ‘O a upumoni o le talalelei ua tatou aoao mai ni faamatalaga ua tatou faalogo i ai?’ Po o le, ‘E i ai se tasi e fia molimau atu i le mana o le upumoni ua tatou talanoaina?’“²

Valaaulia le Agaga Paia e Molimau Atu

O se faiaoga e fesoasoani e laveai agaga e malamalama o mea tatou te tau atu ma faia o ni faiaoga ua faamoemoe e valaaulia ai le uunaiga a le Agaga Paia i olaga o isi. O le Agaga Paia o le faiaoga. O se tasi o matafaioi a le Agaga Paia o le molimau atu i le upumoni, ae maise lava e uiga i le Tama ma le Alo. Ma ao tatou aoao atu e uiga ia i Laua ma la Laua talalelei, tatou te valaaulia le Agaga Paia e molimau atu i tagata o le vasega. I le tulaga latou te faataga ai, o le a faamalosia e Lona mana a latou molimau ma suia o latou loto. O Lana molimau e sili atu le malosi nai lo o le vaai.³

Valaaulia Tagata o loo Aoaoina e Aoao ma Faatino mo i Latou Lava

Sa ou i ai talu ai nei i se vasega o le Aoga Sa lea na amataina i le fai atu o le faiaoga i tagata o le vasega e faasoa mai se mea e sili ona taua ia i latou ao latou faitau i galuega atofaina o le vaiaso mai tusitusiga paia ma le auala na latou faaaogaina ai i o latou olaga. O lenei mea na taitaiina atu ai i se talanoaga malosi e uiga i malamalamaaga ma mea ua latou iloa mo i latou lava. O le tulaga masani lava mo le faiaoga le faaopoopo atu i lenei talanoaga ia manatu o le aoaoga faavae sa ia saunia e aoao atu. O le mea na matua faagaeetia ai a’u o le ala sa ia taulai atu ai i le uunaia o tagata o lana vasega ina ia lagona le mana o afioga a le Atua mo i latou lava.

O la tatou sini i le avea ai ma faiaoga e le tau na o le mauaina o se aafiaga maoae i le vasega po o le faatumuina o le taimi po o le tuu atu se lesona lelei. O le sini moni o le savavali faatasi ma isi i la latou malaga toe foi atu i lo tatou Tama Faalelagi ma Iesu Keriso. O la tatou sini o le avea ma ni faiaoga e fesoasoani e laveai agaga.