O Leo o Le Au Paia o Aso e Gata Ai
Na Aumaia e Agelu le Malamalama i Lo’u Aiga
I se tasi taeao o le Aso Sa sa fesiligia ai a’u pe ou te manao e asia a’u e faiaoga o aiga. E lei leva ona tatalaina la’u faaipoipoga ma sa ou i ai i se taimi faigata o le taulimaina o lo’u olaga fou o se tina nofofua ma se fanau laiti e toalua. Sa ou fai atu ou te talisapaia se asiasiga. I lena taimi, sa ou lagonaina le ita e uiga i lo’u tulaga ma lagona le tuuatoatasi i a’u tauiviga.
O le vaiaso na sosoo ai, na oo mai ai ni tuagane se toalua i lo’u aiga. I le taimi o le la asiasiga sa la fesili mai ai ni fesili masani ma faasoa mai se savali puupuu o le talalelei faatasi ma lo’u aiga.
Ona fesili mai lea o nei tuagane lelei, “Sister Nereida, o le a se mea e mafai ona ma faia mo oe?”
E aunoa ma se mafaufau tele i ai, sa ou tau atu ia i la’ua ia matauila o moli i luga o le faasitepu e alu i luga o le fogafale lua o loo pepe. Sa i ai ni a’u matauli e sui ai, peitai e le mafai ona ou au atu i luga e suiina, ma sa ou popole e uiga i le faaaogaina o se apefai i luga o faasitepu. Sa ou tau atu foi ia i la’ua e leai ni a’u moli o ola i tuafale.
I le taimi lava lena sa la tutu ai i luga. Sa alu se tasi i fafo o lana taavale ma toe foi mai ma se pusa o meafaigaluega. Sa toeitiiti ono ma le afa futu (1.9 m) lona maualuga, lea sa ia ae ai i faasitepu ma sui ia matauila e aunoa ma se faigata. O le taimi lea, sa alu atu lana soa i tuafale ma iloa ai le sese o le fesootaiga o uaea. E lei umi ae uma ona ia faaleleia.
Oka sou faafetai i o’u faiaoga o aiga i le aluga o tausaga mo faatinoga faigofie o le agalelei, alofa, ma le tuuto ma mo lesona matagofie sa la aoaoina ai a’u. O o’u faiaoga o aiga o ni agelu moni lava o e e le gata ina aumaia le malamalama i lo’u aiga ae aumaia foi le filemu, faamoemoe, ma le saogalemu o le talalelei, lea e aumaia le malamalama i soo se ituaiga o pogisa.