O Le Tausiaina o Lo Ma Tama Tama i se Faigapaaga ma le Atua
E alala le tusitala i Iuta, ISA.
Ina ua ou aoao e faaaoga ia punaoa faaleagaga ia sa ou maua, sa faatumulia a’u i manatu o auala e fesoasoani ai i la’u tama tama ma taulimaina lelei o’u foi tofotofoga.
Ata na tusia e Robert Hunt
O lo’u malamalamaaga e uiga i le tulaga faalematua, o ni fanau e atoatoa le amio o e sa laei ma le matagofie ma sa le palapala lava. Sa vave ona ou iloaina o le malamalamaaga sa ou faamemelo i ai sa o se tala fatu. Ua amata ona ou masani e talia le mesi o lo’u fale ma le tatafe o isu aua ou te iloa e oo mai faatasi ma faamanuiaga sili ona ofoofogia e mafai ona ou mauaina. Ae o le mea sa le mafai ona ou vaai faalemafaufau i ai o le tauiviga o le a feagai ai a o tausia lau fanau, aemaise lava la’u tama o Brad.
Sa sau Brad i lenei olaga o se tamaitiiti mama e pei o soo se tamaititi, ae e lei umi ae ma iloaina e ese lava o ia. Sa le mafai ona alu o ia i le vasega pepe e aunoa ma lo’u toalua po o a’u aua sa faasaua tele o ia. Ina ua faasolosolo ina matua ma taaalo faatasi ma isi tamaiti, sa manaomia e ia le vaavaaiga. Ina ua ma sailia se fesoasoani, sa tau mai ia i maua e tatau lava ona ma tumau ai pea i le aoaiina o ia. Sa ma faia mea uma ma te mafaufau i ai: sa ma saili i le initoneti, faitau i tusi e uiga i le avea ma matua, ma fesili atu i fomai ma tagata o le aiga. Mulimuli ane, ina ua amata ona aoga Brad, sa maua o ia i le faama’i o le faaitiitia o le gauai atu o le mafaufau, po o le ADHD, faapea foi ma le tele o isi faafitauli.
Mo le taimi muamua sa ma lagonaina sa i ai se ma faamoemoe. Talu ai ua matou iloaina le ma’i, ua mafai nei ona amata se fuafuaga o le togafitiga. Sa ma faamoemoe o le a lelei le tali atu a Brad i se vailaau lea sa fesoasoani i isi. Ae paga lea, sa sili atu ona leaga le amio a Brad i vailaau nai lo le le inuina, o lea sa taofi ai loa. Sa ou lagonaina le aluese atu o sina faamoemoe mulimuli.
I se tasi aso ina ua ono tausaga o Brad, sa ou fetaiai ma se tasi o ana ma’i oso o aso taitasi. Sa ou manao e lafoai. Sa ou alu i lo’u potu mo sina taimi mo a’u lava, ma sa tafe ifo loimata i o’u alafau. Sa ou tatalo mo le malosi e taulimaina ai le faiga masani o le a oo mai pe a momoe. E mafai faapefea ona ou faia pea lenei mea, i lea aso ma lea aso? Sa ou lagona le pei ua ou pasiina le mea e mafai ona ou onosaia. Pe sa malamalama le Tama Faalelagi i le faigata tele ua i ai? Afai e alofa moni o Ia ia te a’u, sa ou mafaufau ai, e Na te aveesea lenei avega mai ia te a’u ma tuu atu i la’u tama se olaga malosi masani ai. Na siomia a’u e na mafaufauga ma lagona a o foliga mai ua atili ona faateteleina le leaga o tofotofoga ia ua feagai ma a’u nai lo le faaleleia.
O Le Natura Moni o Tofotofoga
Sa ou manatu ou te malamalama i tofotofoga. E tatau ona tatou oo i ai e pei o se ulo o loo faavevelaina i se ogaumu. Tatou te o atu i totonu ma o mai i fafo o le afi, ona toe foi lea o le olaga i le mea masani seia oo i le isi taamilosaga o le faavevelaina ma le faaleleia. Ae sa ou feagai ma lenei tofotofoga mo le tele o tausaga, ma e le aluese lava. Sa ou lagonaina le faatupulaia o le avega, ma o le lagona o le leai o se faamoemoe na faalotomaualaloina ai a’u ma ou talosaga atu ai mo se fesoasoani e ala i le tatalo.
Ona ou iloaina lea o le nofoaga sa ou manaomia ou te alu i ai mo le faamafanafanaga o le malumalu. E ala i musumusuga, na ou iloaina tatou te le filifilia ni tofotofoga tatou te maua i lenei olaga faaletino po o le a foi le umi. O le mea e mafai ona tatou puleaina o le auala tatou te mafaufau ma faatino ai pe a oo mai tofotofoga.
Sa ou iloaina o le mafuaaga na ou lagonaina ai le faanoanoa mo a’u lava ona sa ou faatagaina le inoino faaletagata lava ia e faatumu ai lo’u mafaufau. O le mea muamua sa ou filifili e faia o le taofia lea o manatu le lelei e oo mai i lo’u mafaufau, e pei o le “E le talafeagai lenei tulaga,” “E le mafai ona ou gafatiaina lenei tulaga,” “Aisea e le mafai ai e Brad ona manuia?” po o le manatu sili ona leaga, “O a’u o se tina leaga tele.” Sa ou galue malosi e taofi le mauaina o nei manatu le lelei, ma sa ou vaaia ua amata ona onosai atili ma agaalofa lo’u leo moni pe a ou taulimaina a’u fanau uma.
Sa ou uunaia foi mafaufauga lelei. Sa amata ona ou mafaufau, “O loo e lelei,” ma ou te faia ia te a’u lava se upu lelei, e pei o le “Sa e tausia le maualalo o lou leo ma e te lei ee. O le mea lelei lena e fai!”
Faalagolago i le Atua
Ina ua mavae se aso faigata faapitoa, sa ou fai atu i lo’u toalua e tuuina mai se faamanuiaga ia te a’u. I le taimi o le faamanuiaga sa toe faamanatu mai ia te a’u o a’u o se afafine o le Atua, e Na te silafia a’u ma o’u manaoga, ma o la’u tama o se atalii o le Atua. O Brad sa avea muamua ma atalii o le Atua, ma o ma’ua ma lo’u toalua o se faigapaaga ma le Atua mo Brad. Sa ou iloaina ou te lei faaaogaina meafaigaluega uma sa saunia e le faigapaaga mo a’u. Sa ma sailia ma mauaina ma lo’u toalua le tele o punaoa e fesoasoani ia i maua, ae sa ma faagaloina le punaoa e tasi e sili ona taua: o le tatalo lea.
Sa amata ona ou tatalo i aso uma e uiga i le auala e mafai ai ona ou fesoasoani ia Brad. Pe a oo o ia i se ma’i oso faalelagona, ou te faia se tatalo vave mo musumusuga ae ou te lei alu atu ia te ia. A o o’u faalagolago i le Atua mo lo’u lava tausiga ma musumusuga mo la’u tama, sa ou maua sina vaaiga o mea e mafai ona ou avea ai ma mea e mafai ona ou faia mo ia. Sa ou taumafai e mulimuli i upu a Alema: “Ma o lou mitamitaga lenei, atonu ia mafai ona avea a’u o se auupega i aao o le Atua” (Alema 29:9).
Sa vave ia suiga. Sa ou mafaufau i le tele o auala e fesoasoani ai ia Brad. Sa ou faaaogaina le afiafi faaleaiga ia avea o se meafaigaluega ma tatalo mo ni manatu e uiga i mea e aoao atu. Sa ou faitau foi ia tusitusiga paia ma le manatu moni i ai ma iloaina le fautuaga maoae faalematua o loo i ai. Sa amata ona faatumulia a’u i le faamoemoe ma le mafanafana.
A o faaauau pea ona ou faataitaia le manatu o i ma’ua ma lo’u toalua o ni paaga faatasi ma le Atua i le tausiaina o la maua fanau ma faaaoga meafaigaluega na Ia tuuina mai ia i maua, sa amata ona faateleina lo’u faalagolago atu i le Atua. Sa ou iloaina o lo’u malamalama i le tulaga faamatua na faatapulaaina, ae e mafai e se Tama Faalelagi alofa, o Le e silafia mea uma ma sili atu ona alofa i la’u tama nai lo a’u, ona fesoasoani ia te a’u ia avea o se tina malosi atu ma sili ona lelei. Ma e ui o loo ou tauivi lava i nisi taimi, ou te iloa le mea e saili i ai mo le fesoasoani. Ua ou malamalama nei o nisi o tofotofoga e le mafai ona i ai se taimi faatapulaa, ae a ou taulai atu i le tulaga o le faavavau, o le a fesoasoani mai le Atua ia te a’u.
Ia Lagona le Olioli i Taimi Laiti
Pe a oo mai taimi faigata, ua ou aoao ina ia lagona le olioli i taimi laiti—o meaalofa—lea ua tuuina mai ia i tatou. Pe a manao lo’u atalii e kisi mai ia te a’u, ou te lagona le faafetai. Pe a ou vaai atu i la’u tama o tietie i le pasi e aunoa ma se tasi o la nonofo, ua faamanuiaina a’u i le oo mai o lenei mau i lo’u mafaufau: “Ou le a ou alu muamua atu i o outou luma. O le a ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’uagelu, e sapasapai outou i luga” (MF&F 84:88). Sa ou iloaina sa le tuuatoatasi lava Brad ma e le tuuatoatasi lava.
O i matou o se aiga e faavavau, ma faatasi ai ma le fesoasoani a tagata o e alolofa ia i matou ma le tausiga o i matou e lo tatou Tama Faalelagi alofa, e mafai ona ou talisapaia meaalofa laiti ua tuuina mai ia te a’u i aso taitasi ma lagonaina le olioli ma le fiafia lea e tatau ona tatou mauaina. Ma faatasi ai ma na faamanuiaga laiti ma le fesoasoani a le Alii, e mafai ona ou avea ma tagata e tatau ona ou avea ai, e tusa lava po o le a le umi e manaomia ai.