Malolosi i le Vaiaso Atoa

Ua faasoa mai e nei talavou le auala e faamanuia ai i latou e le Alii a o latou ‘aai ma feinu i le faamanatuga ma manatua a latou feagaiga i le vaiaso atoa.

O le po o le Aso Sa. O lona uiga o taeao o le Aso Gafua—toe foi atu i meaaoga, lau galuega, aoga lakapi, lesona ta piano, ma isi mea. E mautinoa lava le tele o mea e fai i lenei vaiaso! Ae e mafai ona outou taulimaina uma. E mafai ona outou faamaeaina a outou lisi umi o mea e faia i lenei vaiaso.

Tou te fia iloa le auala e faia ai?

Ua i ai i lo outou itu le malosi faaleagaga. O Aso Sa uma, e mafai ai ona outou ‘aai ma feinu i le faamanatuga ma faafou feagaiga sa outou osia. A o outou faia, ua folafola atu ia te outou, afai tou te ave i o outou luga le suafa o Iesu Keriso, manatua o Ia, ma tausi Ana poloaiga, o le a outou maua i taimi uma Lona Agaga e faatasi ma outou (tagai i le MF&F 20:77, 79). O lona uiga e mafai ona outou lagonaina le faamalosia faaleagaga e tusa lava po o a mea o le a fetaiai ma outou i lenei vaiaso.

Sa matou talosagaina nisi o talavou e faasoa mai a latou aafiaga o le faamanatuga ma le auala na faamalolosia ai i latou a o latou manatua a latou feagaiga i le vaiaso atoa. Faitau i nisi o a latou tala. Atonu sa e feagai ai ma ni mea faapena!

O le manatua pea o le Faaola e fesoasoani ia te a’u ia maua le lototoa e feagai ai ma tofotofoga faigata. I le ogatotonu o lo’u tausaga faaiu i le aoga maualuga, sa toe siitia atu lo’u aiga i le Iunaite Setete, ae sa ou nofo na o a’u i Ausetalia e faamaeaina le tausaga aoga. I le mavae ai o lo’u asiasi atu ia i latou i le taimi o aso malolo o le aoga, sa ou toe lele i Ausetalia, ma sa ou lagona le matuai tuuatoatasi. Ae peitai, sa faafuasei ona ou iloaina e le o tuua na o a’u; e le’i tuua lava na o a’u ma e le tuua lava na o a’u aua e faatasi mai pea le Agaga o le Faaola ia te a’u a o o’u taumafai e mulimuli ia te Ia. O le faamafanafanaga sili lena sa mafai ona ou mauaina i lena taimi.

Shannon S., 19, Sini, Ausetalia

Pe a ou faalogo i tatalo o le faamanatuga, ou te faamanatu ia te a’u lava afai o’u te tausia la’u vaega o le feagaiga o le papatisoga, e mafai ona ou faatumauina le Agaga ia te a’u. E sili atu le faigofie o lo’u vaiaso pe a ou faalatalataina mai le Agaga. Mo se faataitaiga, o le toatele o tamaiti aoga o la’u aoga e faaaoga gagana le lelei ma tautatala i ni auala e le talafeagai. O le manatuaina o aʼu feagaiga e fesoasoani ia te a’u e aua le amanaiaina mea ou te faalogo i ai ma e oo lava i le uunaia o nisi o a’u uo ia aua le tautatala faapena.

Jacob B., 14, Colorado, ISA

I le aoga sa i ai se teineitiiti e i ai se manaoga faapitoa. Na faaaoga e le toatele o tagata lena mea e fai ma alofaga e ula ai ia te ia. Sa na o a’u ma la’u uo tagata ia na taumafai e fesoasoani ia te ia. O nisi aso sa foliga mai o le vasega atoa lea na faasagatau atu ia te ia. Sa faigata le iloaina pe faapefea ona tali atu. Sa na o lo’u manao lava e savali ese atu, ae sa ou filifili e manatua o ia o se afafine o le Atua ma mafaufau ai pe faapefea ona taulimaina o ia e Iesu. Sa ou lagonaina le aafiaga toafimalie o le Agaga Paia. Sa ou manatua e mafai ona ou faia se eseesega. O le mulimuli ai i le faataitaiga a le Faaola sa fesoasoani tele ia te a’u, ma sa ou iloaina o le a lelei mea uma.

I la’u feagaiga o le papatisoga ua folafola mai ia te a’u o le a faatasi mai pea le Agaga Paia ma a’u pe afai ou te amio e faapei o le Faaola. Ou te faafetai sa ou lagonaina lena mafanafana ma le malosi mai le Agaga Paia.

Alexis L., 13, Kansas, ISA

O le iloaina sa ou osi feagaiga e ave i o’u luga le suafa o Keriso ua aumaia ai ia te a’u se lagona o le tiute ia mulimuli ia te Ia, ae e le faigofie i taimi uma. I se tasi taimi i se gaoioiga faalevaega, sa ou vaaia ai se tamaitiiti e lei i ai se tasi e talanoa i ai. Sa ou lagonaina e tatau ona ou alu atu e talanoa ia te ia. I le taimi muamua, ou te lei manao ai. Ou te le lelei tele i le faamasani i tagata ma faia ni uo. Ae o le manatuaina o le mea e faia e Keriso, sa ou maua ai le malosi e faia se uo fou. A o o’u talanoa atu ia te ia, sa ou lagonaina le Agaga o musuia a’u e tuuina atu ni fesili ma ia maua le fiafia.

Evan A., 16, Iuta, ISA

I le taimi o le faamanatuga, sa masani ona ou mafaufau i mea e pei o a mea e tatau ona ou faia i le vaiaso, o mea i le aoga, po o a’u uo. Ae i le agai atu i vasega o le Aoga Sa ma savali a o tatou perofeta, sa amata ai ona ou malamalama i le uiga o le faamanatuga. O loo o’u mafaufau nei e uiga i le Togiola a Iesu Keriso, na Ia tuuina mai ai Lona ola mo i tatou, totogi a tatou agasala, ma mafatia ai mo mea uma. E aumaia ia te a’u e lena mea le uunaiga i aso uma e faapea atu ai, e mafai ona ou taumafai e faapei o Ia ma faaalia le alofa lava e tasi lea sa Ia faaali atu i isi. E mafai ona ou faasoa atu le talalelei i isi. E mafai ona ou faia se mea ina ia agavaa atili ai e ulu atu i le malumalu ma ‘ai ma inu i le faamanatuga.

Alessandra B., 17, Santiago, Chile

O le faamanatuga o se siitiaga faaleagaga mo le vaiaso. E faamanatu mai ia te a’u feagaiga na ou osia ma lo’u Tama o i le Lagi, ma e na te taitaia a’u i le aluga o le vaiaso. E faamanatu mai ia te a’u ina ia mafaufau i le taulaga a Iesu Keriso mo i tatou, ma e saunia ai a’u faaleagaga mo le vaiaso a sau.

I se tasi taimi sa ou atuatuvale ai ma loto vaivai, ae ina ua ou ‘ai ma inu i le faamanatuga ma faitau le viiga o le faamanatuga, sa faatumulia a’u i le Agaga. Sa galo ia te a’u o’u atugaluga ma taulai atu i le Faaola.

Brett B., 17, Colorado, ISA

Mo a’u, o le ave i o’u luga o le suafa o Iesu Keriso o lona uiga o le manatuaina lea e mafai pea lava ona faatasi mai Lona Agaga ma i tatou ma e tatau ona tatou filifili e faia le mea sa’o. I se tasi taimi i se pati o se aso fanau, sa inu ai a’u uo, ma sa latou ofoina mai ia te a’u se meainu malosi. Sa ou fai atu leai. Ona sau ai lea o se tasi o a’u uo i le Lotu ma tau atu ia i latou o matou e le inu i meainu malolosi ona o la matou tapuaiga. O le manatuaina o le Faaola e faalatalata mai ai pea le Agaga ia te a’u ma taofia mea leaga mai ia te a’u.

Miguel C., 16, Paraná, Pasila

O le ‘ai ma le inu i le faamanatuga e aumaia ia te a’u se lagona filemu ma mafaufauga e faatalitonuina ai a’u e mafai ona ou taulimaina soo se mea e ono tupu i le olaga. Ia Iuni ua tuanai atu, sa ou oo ai i se taimi faigata i lo’u olaga. Sa masii atu se tasi o a’u uo mamae, sa ou tauivi ma le faanoanoa, ma sa ia te a’u ni manatu le mautonu e uiga i faatusa o le tino. I se tasi Aso Sa, sa ou ‘ai ai ma inu i le faamanatuga, ma sa faafuasei ona ou lagonaina ni lagona o le filemu. Sa ou lagonaina le fiafia moni.

Olivia T., 14, Virginia, ISA