Tulimanu o Fesili

E faapefea ona ou iloa pe ua lava lou matua e amata ai ona anapogi?

I le Aso Sa anapogi, e masani lava ona tatou le aai pe feinu mo ‘aiga e lua. Tatou te tuuina atu foi le tupe o le tau lea o a tatou ‘aiga e fesoasoani ai i tagata o e manaomiaina. E ta’ua lena mea o se “taulaga anapogi.” A tatou anapopogi, e mafai ona tatou manatua a tatou faamanuiaga, tatalo mo tagata, ma lagona le latalata atu i le Tama Faalelagi. E mafai ona amata ona e anapogi pe a lagona e oe ma ou matua ua e saunia. Afai e le mafai ona e anapogi ona o se faafitauli o le soifua maloloina, e mafai lava ona e tatalo ma lagonaina le Agaga Paia, a o anapopogi isi.

Sa ou iloaina ua lava lo’u matua e amata ai ona ou anapogi ina ua ou lagona ua ou fia anapogi, ma sa tau mai e le Agaga Paia ia te a’u ua ou faia le mea sao. Ina ua ou amata, sa ou faia i lea laasaga ma lea laasaga. Muamua sa ou anapogi mo le ‘aiga e tasi. Ona ou taumafaia lea o le lua.

Anne D., 9 tausaga, Nevada, ISA

E mafai ona e tatalo i le Tama Faalelagi e iloa ai po o le a taimi e tatau ai ona amata ona e anapogi. Ou te iloa e mafai ona taliina e le Tama Faalelagi au tatalo.

Liam P., 7 tausaga, Iuta, ISA

E lelei le anapogi pe a e manao e fesoasoani e faamanuia ai isi ma lagona ai le Agaga. O se taimi lelei e anapogi ai pe a uma ona e papatiso.

Eddie O., 9 tausaga, Kalefonia, ISA

Ou te iloa le lava o lo’u matua aua o le a ou maua se lagona mai le Agaga Paia o loo tau mai ia te a’u o se taimi sa’o lea e anapogi ai. Ona ou fesili lea i lo’u tina ma lo’u tama pe o se lagona sa’o lena lagona.

Brooklyn R., 7 tausaga, Aukilani, Niu Sila

Pe a ou papatiso, ou te manatu o le a ou lagonaina le saunia e amata ai ona anapogi. E mafai ona ou tatalo i le Tama Faalelagi mo Lana fesoasoani ma ole atu ia te Ia po o le a le taimi ma le auala e tatau ai ona ou amata.

Brian K., 7 tausaga, Uosigitone, ISA