E faapefea ona ou faapaleniina le le faamasinoina o isi ma le le taliaina o le agasala?

Ua poloaiina i tatou e faamagalo atu i isi ma tuu atu le faamasinoga mulimuli i le Atua (tagai i le MF&F 64:9–11), ae e le faapea e alofaga mai ai i le agasala. Pe a tatou i ai faatasi ma isi o e o loo faia amio agasala, e tatau ona avea i tatou ma malamalama ia i latou ma tutu atu mo le mea sao. I se tulaga itiiti ifo, o lona uiga o le faia o se faataitaiga lelei e ala i lo tatou le auai i le agasala ma aua tatou te tuuina i tatou lava i tulaga po o vaega e fesiligia ai. Ae e tatau ona tatou faailoa atu ia uiga leaga o tagata ma faailoa atu ia i latou tulafono a le Atua ma le tulaga o tatou i ai ma i latou? Ma afai o le tulaga lea, o afea ma e faapefea ona tatou faia?

Atonu o le tali e faalagolago lea i le tulaga, o le ituaiga o sootaga ua tatou i ai faatasi ma tagata o loo aafia, ma lo latou malamalama e uiga i tulafono a le Atua. Mo se faataitaiga, o le talanoa atu taitoatasi i tagata o le aiga ma uo mamae e sili atu i lo le tauina atu i se potu e tumu ni uo masani ina ia salamo. Saili le uunaiga a le Agaga Paia. E mafai ona Ia taialaina au upu ma faatinoga ina ia mafai ona e faaali atu le paleni sa’o o le alofa, faapalepale, ma se tautinoga mausali i tulaga faatonuina a le Alii.