O Leo o Le Au Paia o Aso e Gata Ai
Faamafanafanaina Ina ua Mavae se Maitaga na Fafano
Ata na tusia e Allen Garns
E sefuluvalu vaiaso i totonu o lo’u maitaga lona fa, ou te ala ae ua alu laitiiti lo’u palapala. Sa ou popole ina ua le muta le alu o le palapala, o lea sa ou filifili ai loa e alu i le potu o faalavelave faafuasei.
I le taimi o le tietiega umi i le falemai, sa ou faamoemoe ma tatalo o le a manuia mea uma. Sa ou mafaufau faapea, o le mea sili ona leaga e mafai ona tupu o le faatonuina lea o a’u e le fomai ou te malolo mo le tele o aso.
Ina ua ou taofia i le falemai, sa faia e le aufaigaluega le tele o suesuega. Sa latou mauaina e le o tata le fatu o le pepe. O le faaiuga o le suesuega e faapea “ua maliu le pepe.” Sa leai se isi mea na toe mafaia e le fomai i lena tulaga, o lea sa ia tuuina mai ai a’u ou te tuua le falema’i.
Sa ou alu i le fale ma le lagona o le faanoanoa ma le fefe. Sa le mafai ona ou moe i lena po. Ina ua ou aluese mai le moega i le taeao na sosoo ai, sa uunaia a’u ou te alu i se sauniga o le faaeega paia i le vaveao i le malumalu.
E latalata atu i le faaiuga o le sauniga, ua taulai atu o’u mata i le mama faaipoipo ma le mama faamau lea sa i lo’u tamailima tuumama. O le tina o lo’u tinamatua e anaina le mama lea na faaigoaina ai a’u. Na maliu o ia ina ua lima o’u tausaga, ma sa ou faitauina talu ai nei le talaaga o lona olaga. Ou te manatua sa ia aafia i le tele o ma’itaga na fafano ao ia i ai i le vaitau o le 20 tausaga.
O le taeao atoa lava sa ou tauivi e taofiofi loimata o le faanoanoa ma le fefe, ae i lena lava taimi, sa ou lagonaina ai se lagona malosi o le filemu. Sa ou lagona le faamafanafanaina. Sa aafia foi le tina o lo’u tinamatua i ia foi tofotofoga talitutusa i lona foi olaga, ma sa fesoasoani le Faaola ia te ia. Sa ou lagonaina le mautinoa o le a Ia fesoasoani mai foi ia te a’u.
“O le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata e tusa ma o latou vaivaiga” (Alema 7:12).
Ou te matuai faafetai lava mo le filemu e maua mai i le auai i le malumalu, mo se talatuu o ni tuaa faamaoni, ma le mea silisili o mea uma, mo le taulaga togiola a le Faaola o Iesu Keriso.